Thaum muaj txoj kev sim siab tshwmsim los raug rau hauv lub neej, tej zaug peb yuav nug tias vim li cas Vajtswv ho cia tej no tshwmsim los raug rau yus. Tseeb tiag, txhua yam tshwmsim nyob rau hauv peb lub neej puav leej nyob hauv Vajtswv txoj kev tswjhwm. Txawm yog tej teeb meem ntawd yuav loj npaum twg los peb yeej muaj kev kaj siab vim paub tias ntawm no yog Vajtswv lub siab nyiam. Vajtswv tsis yog tsuas nyob deb deb saib xwb tiamsis tseem nrog peb ua ke, coj peb hla dhau tej kev txomnyem. Qhov tseem ceeb yog peb yuav tsum tau paub Vajtswv lub siab nyiam nyob hauv peb txhua lub caijnyoog hauv lub neej.
Hnub no, yog hnub 29/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tony Evans dhau ntawm Zaj kawm VAJTSWV LUB SIAB NYIAM.
“Nws yuav tsis pub koj ntog; tus tiv thaiv koj yeej tsis tsaug zog ib zaug li” (Ntawv Nkauj 121:3).
Koj puas tseem nco zaj xwm txheej Tswv Yexus cov thwjtim ntsib cua ntawm hiav txwv? Vajtswv xav qhia rau peb paub txog tej zaj kawm muaj nqis dhau los ntawm tej kev sim siab no.
Thib ib, nco ntsoov tias Yexus Khetos yog tus muaj cai tuav txhua txoj kev sim siab. Phau Mathais hais meej meej tias: “Tswv Yexus yuam kom lawv mus rau hauv nkoj”. Qhov uas lawv mus zaum no yog Tswv Yexus lub homphiaj, tsis yog cov thwjtim xav mus. Lawv tseem xav nyob rau qhov Tswv Yexus nyuam qhuav ua qhov txujci tseem ceeb muab mov pub rau tsib txhiab leej noj. Qhov no ua rau lawv muaj kev txaus siab.
Koj puas pom, lawv kuj tsis txawv cov pej xeem coob coob xav muab Tswv Yexus pauv los ua lawv tus tswv koob hmoov. Tiamsis Tswv Yexus yeej tsis xav li ntawd. Cov thwjtim xav tias ntawm no ntshai yuav yog ib lub tswv yim zoo, tiamsis tej uas lawv xav thiab tej yam uas lawv cheem tsum yog ob yam sib txawv. Lawv ntshaw kom muaj hwjchim tiamsis lawv ho txais tau ib lub nyuag nkoj me me nyob tom hiav txwv thaum muaj cua daj cua dub, vim Tswv Yexus xav kom lawv saj tau qhov no.
Yog li cov thwjtim lawv thiaj raug nyob rau tom hiav txwv. Cua ntsawj tuaj ntaus lawv lub nkoj tsis so. Lawv yim siv zog nquam lub nkoj mus rau tom ntej los cua muab ntsawj rov qab los thiab thawb lawv txav deb. Phau Malakaus hais tias “Lawv nquam lub nkoj khwv kawg” (Malakaus 6:48) tsis muaj kev cia siab lawm. lawv qaug zog thiab tag kev cia siab. Lawv yeej tsis xav nyob rau hauv lub caijnyoog zoo li no!
Hnub no, tsis paub koj puas tab tom ntsib cua daj cua dub ib yam li ntawd. Yam thawj thawj uas koj xav paub yog nyob ntawm peb cov ntseeg Vajtswv, yeej tsis muaj ib txoj kev sim siab twg nws txawm yuav cim civ tshwm lossis tshwm los tsis muaj nqis li. Txawm yog cua nag tab tom ntws los rau saum koj los, yog Tswv Yexus coj koj mus rau hauv, ces Nws lub hwjchim kuj tab tom tswj nthwv cua ntawd.
Yog koj tseem tab tom nyob hauv txoj kev sim siab, nco ntsoov tias Vajtswv muaj ib lub homphiaj tseg rau qhov no. Nws yog tus uas yuav tua kom ncaj daim phiaj tsis pub kom tus hmuv nkhaus! Vajtswv muaj cuab kav siv tej kev sim siab uas yog peb tej kev txhaum lossis peb tej kev puas tshuaj tau tshwm tuaj los qhia peb thiab ua kom muaj nqis rau peb. Yexus Khetos lub hwjchim yuav tsis yoj yees rau ib txoj kev sim siab twg li.
Vim txoj kev uas lawv nqes mus rau hauv lub nkoj ntawd yog Tswv Yexus ua tus npaj thiab yeej muaj homphiaj. Vajtswv paub zoo txhua nthwv cua uas koj ntsib, thiab Vajtswv paub zoo Vajtswv lub siab nyiam tseg rau koj lub neej hnub no.
Thov caw nrog kuv peb thov Vajtswv ua ke:
Kuv thov muab lo lus taij thov fij rau Vajtswv, yog tus uas tswj txhua nthwv cua nyob rau hauv lub neej. Txawm yog kuv yuav mus dhau lub tiaj nrag tsaus ntuj nti lossis muaj kev sim siab ntsawj mus los, Vajtswv yeej nyob ntawm kuv ib sab, tuav ruaj ruaj kuv txhais tes hauv lub neej. Thov Vajtswv ntxiv lub zog tshiab rau kuv thaum muaj kev sim siab, thiab pab kom kuv sawv khov kho hauv Vajtswv txoj kev tiv thaiv. Kuv thov hauv Tswv Yexus Khetos lub npe. Amees.
Cov kwv tij, thaum rov tig mus saib txojkev tau taug dhau los, peb yuav pom tias yeej tsis muaj ib qhov teeb meem twg yuav tsis nyob hauv Vajtswv txoj kev tswj. Nyob hauv Vajtswv lub hwjchim, kev sim siab yuav dhau los ua lub sijhawm zoo, txoj kev mob yuav dhau los ua kev zoo siab, thiab kev ua xyem xyav yuav dhau los ua kev ntseeg siab. Thov muab fij thiab pheeb rau ntawm Vajtswv, vim Vajtswv lub siab nyiam yog zoo. Yuav coj peb mus txog rau ntawm tus ciam kaj siab lug, qhov chaw uas txhua qhov teeb meem thaum kawg kuj yuav tau tiaj tus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply