Thaum kev sim siab vij puas ncig, tej zaug peb kuj tau nug tias: “Tus Tswv, Koj tab tom nyob rau qhov twg lub sijhawm uas kuv cheem tsum koj tshaj plaws?” Tseeb tiag Vajtswv tsis tau tso peb tseg txawm yog ib feeb xwb. Vajtswv siv tej kev sim siab ntawd los cob kom peb ruaj khov. Thiab Vajtswv kuj yog tus pab peb ris lub nra nyhav ntawd ua ke, rub peb tes dhau txhua txoj kev.
Hnub no, yog hnub 01/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer E. Jones dhau ntawm Zaj kawm TUS TSWV UAS PAB PEB RIS LUB NRA NYHAV.
“Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv”. (Yakaunpaus 1:3).
Yog ib tug ntseeg Vajtswv, peb paub tias Vajtswv “tsis so” ib zaug li. Vajtswv tsis tas yuav so, thiab kuj tsis pw. Ntawm no yog qhov tseeb, tiamsis thaum muaj kev sim siab vij puas ncig, kuv pheej hais mus hais los ib lo lus tias: “Tus Tswv, koj tab tom nyob qhov twg?” Kuv pom cuag li kuv nyob ib leeg thiab ris txhua lub nra nyhav, tsis muaj kev tawm thiab tsis muaj ib txoj kev cia siab nyob qhov twg ua rau kom kuv pom tias tej teeb meem no yuav dhau mus sai. Yog li, kuv thiaj cim civ nug tias yog Vajtswv tab tom nyob ntawm no vim li cas Vajtswv ho tsis pab kuv?
Tsis ntev los no, kuv nyuam qhuav xav txog qhov no nyob rau hauv kuv thaj chaw- yog ib qhov chaw haus café ntsiag to. Qhov chaw kuv ib txwm zaum saib mus rau ntawm qhov rai thiab xav txog lub neej. Ntau zaug qhov uas zaum saib lub neej tej zaug yuav pab rau peb hnov qab peb tus kheej mus.
Ua ntej uas yuav txiav txim siab tias hom dej haus twg yuav ua rau kom kuv muaj zog, kuv saib pom muaj ib nkawm niam txiv hluas nrog ob tug menyuam – ib tug nyuam qhuav yug thiab ib tug tab tom xyaum mus kev. Nkawd tawm hauv lub chaw yuav khoom los. Nkawd tsev neeg ib leeg tuav rawv ib hnab – tus menyuam uas nyuam qhuav xyaum mus kev los kuj tuav ib hnab thiab. Nws tuav rawv ib lub hnab ntim cov ris ntim zis menyuam thiab cab taug kev.
Nws siv zog tuav ruaj ruaj kom nws lub hnab txhob poob, txawm yog lub hnab ntawd twb loj yuav luaj nws. Tau ib pliag nws cia li ntog kuv hnov nws tab tom hu nws niam pab nws. Nws niam thiab txiv mus ua ntej me ntsis.
Yog leej twg twb tau tu tej menyuam uas tab tom xyaum mus kev ces yuav nkag siab tias peb yuav tau mus qeeb heev. Kuv xam mas ntshai nws txiv yuav pab nws nqa nws lub hnab. Nws txiv tsis nqa khoom ntau, thiab yog ib tug muaj zog. Qhov no yuav pab lawv txuag tau lub sijhawm ntau.
Tiamsis tsis yog li ntawd, leej txiv nres, nws maj mam muab lub hnab rov qab los tso qhov qub, thiab tsa tus menyuam sawv. Ib pliag, tus menyuam rov qab ua poob, txiv rov qab ua li ntawd dua. Nws tsis cem nws tus menyuam qhov uas tus menyuam maj mam mus. Zaum peb, leej txiv muab tus metub txhais tes mus ntxig rau ntawm lub tes hnab, muab ua ib lub hnab ris. Tus metub txhais ruam mus luag ntxhi taug kev.
Thaum pib kuv xav tias qhov haujlwm no yog ib qhov haujlwm ntxim hlub, tiamsis thaum muab los xav, kuv pom tias ntawm no yog ib zaj kawm uas zoo heev. Tsis yog peb zoo tib yam nkaus li tus menyuam mos ntawd los? Txawm yog kam thiab tsis kam los, ntau zaug peb yuav tau ris tej lub nra nyhav tshaj peb lub zog.
Kheev lam Vajtswv muab tag nrho tej kev txhawj hauv lub neej no tshem mus kom dhau los yooj yim? Tsuas yog tib pliag xwb, Vajtswv cia li xa nyiaj tuaj puv nkaus rau peb lub chaw rau nyiaj, kho zoo txhua tus mob lossis muab lub siab puas ntsoog lawm kho kom zoo li qub. Tej haujlwm no tsuas yog lub nyuag suab zeb me me hauv lub ntiajteb uas Vajtswv tsim los xwb.
Vajtswv tsis xaiv qhov uas pab peb daws tej kev sim siab ntawd, Vajtswv cia peb cim civ tiv dhau. Vajtswv nrog nraim peb ua ke, maj mam ua rau kom peb lub nra sib, pab kom peb txhais ib kaujruam zuj zus. Qhov no saib cuag li nyuaj, tiamsis tseeb tiag ho yog ib zaj kawm muaj nqis.
Yakaunpaus 1:3 hais txog qhov tseeb ntawm no: “Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv”. Ntau zaug lub homphiaj ntawm tej kev sim siab yog pab kom peb dhau los ua ib tug neeg khov kho. Txhua hnub tiv lub nra nyhav ntawd, koj yuav dhau los ua tau ib tug neeg muaj lub siab tawv dua nag hmo. Saib cuag li khwv, tiamsis tseeb tiag ntawm no yog lub sijhawm uas cob qhia peb sab ntsujplig muaj nqis uas Vajtswv tseg rau koj.
Ib qhov ntxiv yog, txawm yog tus menyuam no siv zog los, lub hnab nws tsis nyob twj ywm saum nruab nraub qaum. Nws pheej swb los rau ntawm tus menyuam ob lub xub pwg. Thaum kawg leej txiv maj mam pab rub lub hnab nce.
Tej zaug yeej tseem hnov nyhav, tiamsis tseem tiag, Vajtswv twb ris lub nra ntawd lawm. Thiab paub tias Vajtswv yuav tsis muaj hnub cia koj nyob ib leeg, thiab nws yuav yog lub hauv paus txhawb zog, ua rau kom koj khov kho nyob hauv txoj kev rov los mus tsev.
Thov caw nrog kuv peb thov Vajtswv ua ke:
Tus Tswv, thaum lub neej tsaus ntuj nti, kuv nrhiav koj qhov pom kev. Thov Vajtswv koj pub lub zog rau kuv kom kuv kov yeej thiab tiv dhau. Thov qhia rau kom kuv paub ntseeg koj lub homphiaj, txawm yog kuv ntsia tsis pom tag nrho txoj kev tom ntej. Kuv ua koj tsaug vim koj tsis tso kuv tseg, thiab yog kuv qhov chaw nkaum ruaj khov. Kuv thov hauv Tswv Yexus Khetos lub npe. Amees.
Cov kwv tij, thaum uas lub hnub tawm tuaj, thiab qhov tsaus ntuj ploj mus, peb yuav pom Tswv Yexus nrog nraim peb hauv txoj kev taug. Tus Tswv yeej tsis cog lus tias peb lub neej yuav tsis ntsib kev txomnyem, tiamsis Nws cog lus tias yuav nrog nraim peb nyob, nrog peb ris lub nra ua ke, rub peb tes kom tiv dhau tej kev sim siab. Thiab lub sijhawm uas muaj kev txomnyem ntawd, peb yuav kawm tau txoj kev kom dhau los muaj zog ruaj khov, vim Vajtswv nrog nraim peb nyob.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply