Peb txhua tus ib leeg nyias yeej muaj nyias ib txoj kev cia siab rau nyias lub neej, tej zaug ntawd yuav yog tej kev cheem tsum ntawm sab nqaij tawv, muaj kev zoo siab lossis lub dag zog… ntau zaug peb mus cuag Vajtswv tiamsis yeej txais tsis tau Vajtswv lo lus teb. Tiamsis txhob hnov qab tej lub sijhawm zoo li ntawd, Vajtswv yuav cob qhia peb kom peb paub tias peb yuav tau cia siab rau Vajtswv ntau dua, thiab Vajtswv yuav teb peb thaum txog Vajtswv lub sijhawm uas zoo kawg nkaus.
Hnub no, yog hnub 03/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andrew Murray dhau ntawm Zaj kawm KUV TXOJ KEV CIA SIAB.
“Tus Tswv, nimno kuv yuav cia siab rau dabtsi? Kuv cia siab rau koj nkaus xwb. Thov cawm kom kuv dim ntawm kuv tej kev txhaum, thov tsis txhob cia cov neeg ruam luag kuv plig thiab ua saib tsis taus kuv” (Ntawv Nkauj 39:7-8).
“Tus Tswv, nimno kuv yuav cia siab rau dabtsi? Kuv cia siab rau koj nkaus xwb. Thov cawm kom kuv dim ntawm kuv tej kev txhaum, thov tsis txhob cia cov neeg ruam luag kuv plig thiab ua saib tsis taus kuv” (Ntawv Nkauj 39:7-8).
Muaj tej lub sijhawm peb tsis paub tias peb tab tom cia siab tos yam dabtsi, lossis muaj tej lub sijhawm peb paub, tiamsis tej zaug nyob rau lub sijhawm ntawd, peb ho tsis paub yuav tau thov Vajtswv yam dabtsi. Peb paub Vajtswv muaj cuab kav ua tau ntau tshaj tej uas peb thov thiab peb xav txog. Tiamsis thaum uas peb cia txoj kev tsis ntseeg nkag los rau hauv peb txoj kev thov Vajtswv, ces ntawd yog lub sijhawm uas peb tav Vajtswv lub hwjchim. Tej lub sijhawm zoo li ntawd, cia li mus cuag Vajtswv thiab nug Vajtswv zoo li txoj kev uas tus sau Ntawv Nkauj tau nug: “Tus Tswv, thaum no kuv tos yam dabtsi?” – thiab “Tus Tswv, kuv txoj kev cia siab nyob rau hauv koj.”
Thaum ub cov neeg Yixalayees lawv tau tav Vajtswv lub hwjchim! Thaum Mauxes hais rau cov pej xeem tias lawv yuav muaj nqaij noj nyob rau tom roob moj sab qhua, ces lawv txawm ua xyem xyav: “Vajtswv yuav pab peb rau tej thaj chaw qhuav qhawv li no los? Vajtswv twb muab lub pob zeb tsoo kom peb muaj dejhaus, tiamsis Vajtswv puas yuav pub mov rau peb noj, thiab puas yuav pub nqaij rau peb noj? Tiamsis yog nug cov pejxeem tias: “ Nyob tom moj sab qhua, Vajtswv puas pub ib tug dej rau lawv haus?” lawv yuav teb tias “muaj”. Tseeb tiag, Vajtswv tau ua qhov ntawd, thiab Vajtswv kuj muaj cuab kav ua tau txhua yam.
Thaum cov pejxeem xav txog qhov uas Vajtswv yuav ua ib yam tshiab ces lawv ho tav Vajtswv lub hwjchim; lawv yeej tsis kam xav txog tej yam uas loj tshaj tej xwm txheej uas yav dhau los. Ntau zaug peb kuj muab Vajtswv lub hwjchim tuav cia, vim muaj ntau zaug peb tsis nkag siab tag nrho Vajtswv tej lus cog tseg lossis tej uas Vajtswv yuav ua. Nyob rau hauv tej lo lus thov Vajtswv, yuav tau ceev faj kom koj tsis txhob tav Vajtswv lub hwjchim, tus uas yog cov neeg Yixalayees tus Tswv dawbhuv. Nco ntsoov tias Vajtswv tej lus cog tseg puav leej muaj lub ntsiab lus dawbhuv, thiab nyob siab tshaj peb txoj kev nkag siab. Thiab kuj paub tias Vajtswv muaj cuab kav ua tiav Vajtswv tej lus cog tseg los ntawm Vajtswv lub hwjchim nyob hauv Vajtswv txoj kev hlub nplua mias, tag nrho puav leej nyob siab tshaj peb tej kev xav. Yog li, yuav tsum tau cia siab ntsoov rau ntawm Vajtswv, tsis yog tej kev cheem tsum tamsim xwb, tiamsis yuav tau ntseeg Vajtswv txoj kev hlub thiab Vajtswv lub hwjchim niaj hnub nrog nraim peb.
Txhua lo lus thov Vajtswv tiag puav leej muaj ob lub ntsiab. Ib lub yog koj lub siab yog koj li siab ntshaw, koj kev cheem tsum, xav kom Vajtswv ua ib yam dabtsi twg pub rau yus. Ob yog Vajtswv lub siab; Vajtswv foom hmoov tiamsis yuav tsum nyob hauv Vajtswv lub homphiaj. Koj xav li cas? Thaum thov Vajtswv koj lub siab puas tau tsom ntsoov mus rau lub siab ob? Tiamsis thaum thov Vajtswv, peb yuav tau tig peb lub siab mus rau ntawm Vajtswv. Tiamsis qhov no pheej hnov qab lawm.
Thaum peb cia siab rau ntawm Vajtswv, peb tseg peb txoj kev saib ntsoov mus rau ntawm Vajtswv txoj kev hlub thiab kev cawmdim zoo kawg nkaus. Peb lees tias peb yeej tsis nkag siab tag nrho txhua yam uas Vajtswv yuav ua rau peb. Zoo li tus sau Ntawv Nkauj, peb muaj cuab kav hais rau Vajtswv tias: “Tus Tswv thaum no kuv tab tom tos yam dabtsi?” Txawm yog kuv hais tsis tau los Vajtswv paub txhua yam thiab tos yuav pub yam uas kuv ntshaw rau kuv. “Tus Tswv, kuv txoj kev cia siab nyob hauv koj.”
Tus sau Ntawv Nkauj thov Vajtswv tias, “Thov tso kuv dim ntawm txhua txoj kev txhaum”. Tej zaug koj twb thov Vajtswv kom tau tso dim ntawm tej kev npau taws, kev khav theeb, tub qaug rau tus kheej, tiamsis vim li cas koj ho pom tias koj yeej cheem tsum tej ntawd. Tej zaug koj tau vam khom rau koj tej kev xam thiab koj lub zog ntawm koj tus kheej, tiamsis tsis ntseeg tias Vajtswv yuav ua haujlwm nyob rau ntawm koj tej kev qaug zog. Koj tsis ntseeg Vajtswv txoj kev nplua nuj hauv Vajtswv lub hwjchim ci ntsa iab, kom Vajtswv ua tej yam uas siab tshaj yam uas koj tos.
Cia li pehawm Vajtswv, yog tus uas yuav ua tej haujlwm xav tsis thoob. Nyo hau nqes thiab tos Vajtswv, txog rau thaum koj tus ntsujplig pom tias koj lub neej nyob hauv tus uas Tsim ib puas tsav yam los txhais tes. Thaum koj tab tom tos Vajtswv, koj yuav tau paub tias Vajtswv yuav ua dabtsi, thiab yuav ua yam ntawd li cas; paub tias txhua yam yuav ua rau kom txoj kev hlub Vajtswv dhau los muaj nqis, cia li tos Vajtswv nyob hauv txoj kev txo hwjchim, thiab koj yuav txais tau yam uas koj thov dhau los ntawm Vajtswv lub hwjchim saum ntuj.
Cia tus sau Ntawv Nkauj tej lus thov dhau los ua cov lus thov nyob hauv peb txoj kev cia siab: “Tus Tswv thaum no kuv tos yam dabtsi? Kuv txoj kev cia siab nyob ntawm koj.” Ntseeg tias koj yuav teb kuv tej lus thov thaum txog koj lub sijhawm.
Thaum tos Vajtswv, ntau zaug koj yuav hnov qaug zog, vim cuag li koj tsis paub koj yuav txais tau yam dabtsi. Tiamsis ruaj siab tau – lub sijhawm txomnyem yuav yog ib lub cim qhia rau koj paub tias yam uas zoo yuav los. Vajtswv xav qhia kom koj paub muab txhua yam tso rau hauv Vajtswv txhais tes thiab tsuas cia siab rau Vajtswv tib leeg xwb.
“Cia siab ntsoov rau peb tus Tswv, muaj lub siab tawv thiab tsis ntshai. Yog, cia li cia siab rau Vajtswv.”
“Kuv tus Ntsujplig, kuv yuav so hauv Vajtswv, vim kuv txoj kev cia siab nyob ntawm Nws.”
Thov caw nrog kuv peb thov Vajtswv ua ke:
Tus Tswv thaum kuv txhais ko taw txhais ruam mus rau ntawm tej qhov kev phem, kev txomnyem; thaum uas kuv ntsia tsis pom koj ua haujlwm, thov Vajtswv pab kom kuv tuav rawv kuv txoj kev cia siab rau ntawm Vajtswv. Thov kom kuv tus ntsujplig yuav tsis tag kev cia siab lossis yuav tsis yoj yees thaum uas ntsia tsis tau pom Vajtswv teb, vim paub tias Vajtswv xav yam uas zoo tshaj plaws pub rau kuv thaum txog Vajtswv lub sijhawm. Kuv thov hauv Tswv Yexus Khetos lub npe. Amees.
Cov kwv tij txhua tus, koj tab tom thov Vajtswv zoo li cas? Tej zaug koj twb nchuav nthwv koj lub siab, tiamsis koj puas tau tshua txog Vajtswv lub siab lawm tau? Hnub no thov kom Vajtswv zam txim thiab pab kom koj ruaj siab cia siab rau Vajtswv, nrhiav Vajtswv, kawm txoj kev ua siab ntev nyob rau hauv tej lub caijnyoog sib txawv nyob hauv lub neej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply