Thaum peb siv zog ua neej tseem nrog tej kev maj nroos thiab ntxhov nyho hauv lub ntiajteb no, peb yuav hnov qaug zog heev. Thaum peb vam khom rau peb lub zog, peb ob txhais taw yooj yim dawm tej pob zeb ntawm kev. Qhov uas peb tsis muaj kev kaj siab yog peb tsis kam so rau hauv Vajtswv txhais tes. Vajtswv yog tus npaj txhij muab txhua yam uas peb cheem tsum pub rau peb, Vajtswv tib leeg thiaj yog peb lub hauv paus cawmdim.
Hnub no, yog hnub 06/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andrew Murray dhau ntawm Zaj kawm SO HAUV VAJTSWV.
“Kuv ua siab ntev tos Vajtswv ua tus cawm kuv, kuv muab siab npuab Nws tib leeg xwb” (Ntawv Nkauj 62:1).
Yog tias txoj kev cawmdim los ntawm Vajtswv los thiab tsuas yog Vajtswv xwb, ces peb qhov haujlwm yog yuav tau so hauv Vajtswv thiab tos Vajtswv ua tiav Vajtswv tes haujlwm. So hauv Vajtswv yog tib txoj kev kom peb saj tau txoj kev cawmdim zoo kawg nkaus, thiab yog tib txoj kev kom peb paub peb tus Cawm Seej. Tag nrho tej kev tab kaum yuav ua rau kom peb saj tsis tau tej koob hmoov ntawm txoj kev cawmdim puav leej yog pib ntawm no mus: peb tsis tau nkag siab tiag thiab ua tsis yog raws li txoj kev kom tau so hauv Vajtswv.
Pawg Ntseeg thiab peb txhua tus yuav tau ua li cas kom nthuav tawm Vajtswv lub hwjchim nyob rau hauv lub ntiajteb no? Yuav tsum nco ntsoov tias peb yog leej twg: peb yog cov neeg uas cheem tsum Vajtswv txhua lub sijhawm. Cia li xav txog qhov uas vim li cas peb yuav tau so hauv Vajtswv yog ib qhov haujlwm yuav tau ua, thiab kuj yog ib txoj koob hmoov uas Vajtswv pub. Thaum nkag siab qhov no, peb thiaj yuav pom txog qhov tseem ceeb thaum peb tu txoj kev hlub no, thiab qhov uas Pawg Ntseeg thiab txhua tus ntseeg yuav tau nrhiav thiab ua qhov haujlwm so hauv Vajtswv.
Txoj kev cheem tsum kom tau so nws nyob tob tob hauv peb txhua tus tib neeg. Vajtswv tsim peb tib neeg los zoo li tej lub laujkaub av ntim Vajtswv txoj kev zoo thiab Vajtswv lub hwjchim. Tib neeg tus kheej yeej tsis muaj txojsia, tsis muaj zog, tsis muaj kev hlub – tsuas yog Vajtswv tib leeg tus uas muaj sia nyob thiaj yog tus uas pab tau tib neeg tej kev cheem tsum. Tib neeg txoj kev vam meej thiab kev hlub tsis yog lawv cim civ khwv tau tiamsis nyob ntawm Vajtswv txoj kev nplua nuj thiab Vajtswv txoj kev hlub tsis muaj nrim xwb. Tib neeg txoj kev zoo siab loj tshaj plaws yog lawv paub tias lawv tau txaus siab rau hauv txoj kev muaj txaus uas Vajtswv muab pub ntawd yog thaum uas tib neeg tsis tau ua txhaum.
Tiamsis thaum tib neeg ua txhaum thiab khiav deb Vajtswv, lawv dhau los vam khom Vajtswv ntau dua. Yog tsis muaj Vajtswv, tsis muaj Vajtswv txoj kev hlub thiab Vajtswv txoj kev hlub tshua ces peb yeej tsis muaj kev cia siab dabtsi kom tib neeg rov qab sawv taus. Vajtswv twb pib Vajtswv tes haujlwm cawmdim thiab yuav ua kom tiav tes haujlwm ntawd rau peb txhua tus, txhua feeb. Txawm yog tus uas twb tau yug dua tshiab lawm los kuj tsis muaj ib lub zog twg nyob sab nraud lub hwjhcim Vajtswv pub rau lawv, thiab txoj kev tau so rau hauv Vajtswv zoo li txoj kev ua pa – tsis so li.
Vim peb tsis pom tias peb tab tom tshaib thiab yeej ua tsis tau dabtsi ntawm Vajtswv xub ntiag, muaj coob tug ntseeg Vajtswv lawv thiaj tsis pom tias lawv yuav tau vam khom Vajtswv, thiab Vajtswv txoj kev hlub tsis muaj nrim thaum paub vam khom rau ntawm Vajtswv tsis so. Tiamsis thaum uas peb pom tias txhua yam zoo puav leej yog los ntawm Vajtswv los, ces txoj kev tau so hauv Vajtswv dhau los ua kev zoo siab thiab kev cia siab loj tshaj plaws.
Thaum uas peb pom tias Vajtswv zoo siab hlo pub rau peb kom txaus nkaus txhua yam, Vajtswv yeej tsis sab thaum uas Vajtswv tiv thaiv thiab ntxiv zog rau peb, ces peb yuav tau nkag siab tias tau so rau hauv Vajtswv yog ib txoj koob hmoov uas tsim nyog peb twb txais los lawm ntev! Vajtswv yeej foom hmoov tsis tseg rau peb txoj kev ua haujlwm; thiab peb yog Vajtswv cov menyuam ces peb yuav tau so thiab tau txais: Ntawm no yog ib lub neej puv npo koob hmoov!
“Kuv tus ntsujplig yuav so rau ntawm Vajtswv; kuv txoj kev cawmdim los ntawm Vajtswv los” Thib ib, peb tau so rau hauv Vajtswv kom txais tau kev cawmdim. Tom qab ntawd peb pom tias kev cawmdim tsis yog tsuas coj kom peb mus ze rau ntawm Vajtswv xwb, tiamsis tseem qhia peb txoj kev kom tau so rau hauv Vajtswv. Thiab thaum kawg, peb saj tau ib qhov tseeb zoo dua thiab: So hauv Vajtswv yog txoj kev cawmdim dawbhuv tshaj plaws. Ntawd yog qhuas Vajtswv yog tus loj dua ntais txhua yam: ntawd yog saj tau tias Vajtswv yog txhua yam tag nrho pub rau peb.
Thov Vajtswv pub rau peb saj tau txoj koob hmoov tau so nyob rau hauv Vajtswv.
“Kuv tus ntsujplig, kuv yuav so rau hauv Vajtswv.”
Thov caw nrog kuv peb thov Vajtswv ua ke:
Tus Tswv thaum no kuv thov muab kuv tej kev xav kuv lub nra nyhav fij rau koj kom kuv tau so nyob hauv koj txhais tes muaj hwjchim. Thov Vajtswv Koj tiv thaiv kuv los ntawm koj txoj kev hlub thiab nyob rau hauv txoj koob hmoov tsis muaj nrim thaum kuv tau nyob hauv Vajtswv txhais tes tiv thaiv. Thov kom kuv yuav saj tau txoj kev cawmdim nyob hauv koj yog tus hlub thiab saib xyuas kuv. Kuv thov hauv Tswv Yexus Khetos lub npe. Amees.
Cov kwv tij, ntev los no nej puas tau so rau hauv Vajtswv os? Los yog koj yeej tseem ua txhua yam tsis so nyob hauv txoj kev txhawj txog lub neej no? Cia li muab tej ntawd fij rau Vajtswv, thiab tsau tsawv rau hauv Vajtswv txoj kev hlub tab tom ntws hauv koj lub neej. So hauv Vajtswv txhais tes kaj siab lug mus ib txhis. Thaum ntawd koj yuav saj tau txoj kev zoo kawg nkaus rau ntawm thaj chaw no, nyob hauv Leej Txiv txoj kev hlub loj.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj.Thiab peb xav kom txuas tau nrog koj.
Leave a Reply