Thaum uas ntsib lub caijnyoog muaj kev txomnyem, xws li tshuav luag nuj nqi, tsis muaj nyiaj, lossis thaum uas yus pom tias yus muaj tsis txaus nyob rau hauv txoj kev cheem tsum rau lub neej tamsim, peb yuav hnov txhawj. Ntau zaug tej kev txhawj ntawd loj txog qhov uas peb cia li hnov qab tus Vajtswv uas peb tab tom pehawm yog tus Tswv ntawm txoj kev cheem tsum, Nws yog tus uas yuav pub rau peb. yuav ua li cas kom peb thiaj yuav sawv tau khov kho cia siab ntsoov rau ntawm Vajtswv? Yuav ua li cas kom yus txoj kev ntseeg thiaj yuav tsis raug tej kev txhawj tiam no tav kev?
Hnub no, yog hnub 17/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Pat Robertson dhau ntawm Zaj kawm VAJTSWV MAM UA TUS NPAJ.
“Nej sim ua tib zoo xav saib tej noog uas ya saum nruab ntug, cov noog ntawd tsis cog qoobloo, tsis hlais thiab tsis sau ntim rau hauv txhab; tiamsis nej Leej Txiv tus uas nyob saum ntuj ceebtsheej tseem yug cov noog ntawd!” (Mathais 6:26a).
Koj puas tau muaj zaug twg hnov tej neeg ib ncig lawv hais tias “lawv txhawj heev txog qib uas ua rau lawv muaj mob lawm tau?
Tsis paub koj puas nkag siab txog qhov tseeb no nyob hauv Vajluskub lawm tau, tiamsis Vajtswv txojlus qhia tias txhawj yog kev txhaum! Vajtswv txojlus puav leej ntuas kom peb “tsis txhob txhawj!” Txhawj nws yeej tsis coj ib yam dabtsi muaj nqis los li, tiamsis nws yuav ua kom puas tsuaj. Ntau tus raug mob ncauj plab twb yog vim txhawj dhau.
Tswv Yexus hais rau Nws cov thwjtim tias: “Vim li ntawd kuv thiaj qhia rau nej, kom nej tsis txhob txhawj hais tias nej yuav tsum muaj zaub mov lossis yuav tsum muaj ris tsho hnav thiaj nyob taus. Nej tej kev txhawj ntawd puas yuav pab tau kom nej muaj txojsia nyob ob peb xyoos ntxiv? (Mathais 6:25a,27).
Tswv Yexus thiaj muab pov thawj los ua tim khawv rau tej uas Nws hais li no: “Nej sim ua tib zoo xav saib tej noog uas ya saum nruab ntug, cov noog ntawd tsis cog qoobloo, tsis hlais thiab tsis sau ntim rau hauv txhab; tiamsis nej Leej Txiv tus uas nyob saum ntuj ceebtsheej tseem yug cov noog ntawd! (Mathais 6:26a).
Koj puas tau muaj ib zaum twg pom ib tug noog nws muaj kev txhawj lawm tau? Lawv yeej tsis txhawj vim lawv paub tias Vajtswv yog tus tu lawv. Nco ntsoov Tswv Yexus tej lus: “Nej tseem muaj nqis dua cov noog ntawd” (Mathais 6:26b).
Peb ntau qhov kev txhawj pib los ntawm qhov uas peb lub siab ntshaw lub ntiajteb no. Kev ntseeg ces yog vamkhom rau ntawm Vajtswv yog tus pab.
Tswv Yexus hais:
“Cov neeg uas tsis ntseeg Vajtswv, lawv niaj hnub txhawj txog tej no. Nej Leej Txiv tus uas nyob saum ntuj ceebtsheej yeej paub hais tias nej yuav tsum muaj tej no. Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:32,33).
Thaum peb muaj txoj kev sib raug zoo ua ke nrog tus Tswv txhua hnub, peb yuav nrhiav pom txoj kev kaj siab nyob rau hauv peb lub hlwb. Tiamsis txoj kev kaj siab ntawd yuav nrhiav nyob qhov twg yog peb pheej cim civ tawm yus li tswv yim, muab peb lub sijhawm los khiav caum tej uas nyob rau hauv lub ntiajteb. Lub ntiajteb no niaj hnub nqus peb rau hauv nws tej teeb meem thiab ua rau kom peb txhawj. Ib tsab xov xwm xa ib qhov xov phem, tej xov txaus ntshai thiaj yuav muag tau nyiaj! Dab ntxwgnyoog xav muab peb tuav twjywm rau hauv tej kev cheem tsum thiab kev tawm tswv yim ntawm tus kheej, ua rau kom peb txhawj txog txhua yam. Tiamsis Vajtswv ho ntuas kom peb, “Txhob ntshai!”.
Thaum uas tseem ua neej nyob rau hauv lub ntiajteb no, txhob hnov qab ib txoj koob hmoov tau pub rau koj: Yog Vajtswv! Vajtswv yog tus hlub koj thiab paub zoo koj tej kev cheem tsum, txawm yog ntawd yog tej kev cheem tsum ntawm sab nqaijtawv, nyiaj txiag lossis tej kev sib raug zoo hauv lub ntiajteb no. Yog li cia li mus nyob ze Vajtswv los ntawm txoj kev ntseeg, muab koj lub nra nyhav rau Vajtswv, nrhiav Vajtswv lub ntsej muag, qhuas Vajtswv thiab koj yuav saj tau Vajtswv yog tus pub rau koj!
Thov caw nrog kuv peb thov Vajtswv ua ke:
Ua Vajtswv tsaug vim koj niaj hnub tu peb lub neej. Txawm yog tej nyuag noog ntsev me me los nyob hauv koj lub qhov muag koj yeej tabncuab txog lawv, ces peb yog tus uas koj hlub thiab koj cawm! Koj yeej yuav pab peb. Thov Vajtswv koj tig peb lub qhov muag los rau ntawm koj, thiab ntxiv zog rau peb, kom peb saj tau Vajtswv koj txoj kev muab pub nplua mias. Kuv thov hauv Tswv Yexus Khetos lub npe. Amees.
Cov kwv tij, “tus noog ntsev nyob hauv Vajtswv lub qhov muag Vajtswv tseem saib ntsoov ces Vajtswv yuav tsis muaj hnub hnov qab peb?” Nyob twj ywm hauv Vajtswv txoj kev tshwm ntsej muag kom thiaj yuav paub tias tej kev khwv, kev txomnyem thiab tej kev txhawj nyob rau hauv lub neej no los Vajtswv yeej tseem tshua txog thiab yuav foom koob hmoov rau koj. Cia li muab koj tej kev cheem tsum fij pub rau Vajtswv, thiab Vajtswv yuav teb koj thaum txog Vajtswv lub sijhawm.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.