Yam uas loj tshaj nyob hauv leej txiv txoj kev hlub tej zaug yog ua lub siab tus. Txawm yog tsis muab nthuav tawm, tsis zoo nkauj, los txiv txoj kev hlub zoo li ib phab pob zeb ruaj khov tsis co, kom tej menyuam tau vam khom rau txhua lub caij hauv lub neej. Siab tshaj txiv txoj kev hlub, ces yog txoj kev hlub uas Vajtswv pub rau Vajtswv cov menyuam, yog ib txoj kev hlub tsis yuav ib yam dabtsi, nyob mus ib txhis, txawm yog koj thiab kuv tsis tsimnyog kom tau txais txoj kev hlub ntawd.
Hnub no, yog hnub 18/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Linda Vulcano dhau ntawm Zaj kawm LEEJ TXIV SAUM NTUJ TXOJ KEV HLUB.
“Leej txiv teb hais tias, ‘Metub, koj yeej ibtxwm nrog kuv nyob, txhua yam uas kuv muaj puavleej yog koj li”(Lukas 15: 31).
Tswv Yexus tham txog ib zaj lus piv txwv rau peb mloog hais txog tus tub loj leeb nyob hauv Lukas 15:13-19:
“Tau ob peb hnub tom qab, tus tub yau muab tej uas yog nws tug muag tau nyiaj, ces nws txawm khiav mus rau lwm lub tebchaws deb deb lawm, nws tsis txuag nws tej nyiaj, nws ywj siab siv ua dog ua dig, nws muab nws tej nyiaj phob tas, thaum ntawd muaj kev tshaib plab thoob plaws lub tebchaws, nws tsis tshuav dabtsi li lawm. Nws thiaj mus nrog ib tug txivneej hauv lub nroog ntawd nyob, tus ntawd txib nws mus zov npua tom teb. Nws xav noj cov plhaub taum uas npua noj , kom tsau nws plab los tsis muaj leejtwg pub rau nws noj. Thaum nws nco dheev txog hais tias, ‘Kuv txiv cov tub zog muaj noj muaj haus tsis tas, ua li cas kuv yuav tuaj yoo tshaib ntawm no? Kuv yuav rov mus cuag kuv txiv thiab hais tias, “Txiv, kuv ua txhaum rau Vajtswv thiab ua txhaum rau koj lawm. Kuv tsis tsimnyog ua koj tus tub lawm; thov koj suav kuv ib yam li kuv yog koj ib tug tub zog xwb.”
Qhov uas leejtxiv ua ntxiv rau tus tub ntawd nthuav tawm txoj kev hlub uas Leej Txiv saum ntuj tseg rau peb. Tswv Yexus pib zaj xwm txheej ntxiv:
“Thaum nws los tsis tau txog uas tseem nyob hov deb, nws txiv porn nws thiab hlub nws kawg; nws txiv dhia loo mus puag nkaus tus tub nwj… Tiamsis leej txiv hais rau cov tubtxib hais tias, ‘Nej tsawg tsuag nqa cev ris tsho uas zoo zoo tuaj rau nws hnav. Nqa nplhaib tuaj rau nws coj, muab khau tuaj rau nws rau. Thiab mus muab tus menyuam nyuj uas rog rog coj los tua ua ib rooj mov rau sawvdaws noj ua kev zoo sab. Rau qhov kuv tus tub no twb tuag lawm, tiamsis nimno nws ciaj rov los; nws twb ploj lawm, tiamsis nimno nws rov los.’ Ces sawvdaws txawm noj haus zoo sab” (Nqe 20-24).
Txawm yog peb yuav yuam kev li cas los leej txiv saum ntuj yeej tseem yuav hlub peb. Vajtswv hlub peb los ntawm txoj kev hlub tsis xaiv ntsej muag, tsis muaj ib zaum twg yoj yees. Txawm yog peb yuav ua rau Vajtswv nyuaj siab npaum cas los, txoj kev hlub ntawd nws nyob mus ib txhis, nws yeej nyob khov kho tseg rau peb.
Tiamsis, tus tub hlob tsis zoo siab ib yam li nws txiv. Nws rau siab ntso ua haujlwm tom teb, thiab hnov tsis txaus siab rau nws tus kwv uas tau ntxeev siab tiamsis ho tau txais tos zoo li ntawd. Nws hais tias, vim nws tau ua haujlwm ntau dua yog li nws yuav tsim nyog tau Vajtswv hlub ntau dua:
“Txiv, koj sim xav saib, kuv ua haujlwm rau koj ib yam li tus qhev tau ntau xyoo, kuv tsis tau tawv nauj ib zaug li. Koj twb tsis pub ib yam dabtsi rau kuv. Txawm yog ib tug nyuag menyuam tshis los koj twb tsis muab rau kuv tua pub kuv cov phoojywg noj ib pluag zoo siab li!” (nqe 29).
“Leej txiv teb hais tias, ‘Metub, koj yeej ibtxwm nrog kuv nyob, txhua yam uas kuv muaj puavleej yog koj li”(Nqe 31).
Leej txiv maj mam qhia rau tus tub hlob tias koj tsis yog ib tug tub qhe ua haujlwm rau txiv, tiamsis koj yog txiv tus tub. Tus tub no yeej tsis tau nkag siab nws lub meej mom tiag. Nws rau siab ntso ua haujlwm rau txiv, tiamsis nws ho tsis nkag siab nws txiv. Nws thiaj nroo txog qhov uas nws tsis tau ib tug tshis los nrog nws tej phooj ywg noj ua si, thaum uas nws twb ho yog ib tug uas tau txais tej qub txeeg qub tes loj tag npaud!
Kuv pheej pom kuv kuj zoo li tus tijlaug ntawm no, thaum uas kuv tsa suab tias: “Tus Tswv, kuv twb siv tag nrho zog, tiamsis kuv tseem tsis tau pom koj pub yam uas kuv taij thov rau kuv!” Kuv pheej xav tias tej haujlwm zoo uas kuv ua, kuv tsimnyog tau Vajtswv foom hmoov ntau dua. Tiamsis tseeb tiag, tej koob hmoov uas Vajtswv pub yog ib qhov khoom plig tsis yuam kom peb ua dabtsi, txawm yog peb tsimnyog thiab tsis tsimnyog txais los. Peb tau Vajtswv foom hmoov tsis yog vim peb tej kev khwv, tiamsis los ntawm Vajtswv txoj kev ua siab ntev. Thiab vim Vajtswv txoj kev txawj ntse nws siab tshaj peb tib neeg txoj kev nkag siab yog li Vajtswv thiaj lis tsis foom koob hmoov rau peb txhua tus raws li ib tug qauv twg, tiamsis raws li Vajtswv lub siab zoo. Vim Vajtswv yog kev hlub- ib txoj kev hlub dawbhuv, niaj hnub hliv rau peb yam tsis yuam kom peb ua dabtsi.
Thov caw nrog kuv peb thov Vajtswv ua ke:
Oh Vajtswv tus uas muaj kev hlub mus ib txhis, ua koj tsaug rau koj txoj kev hlub uas tau muab pub dawb dawb rau kuv. Thov Vajtswv zam txim rau kuv tej kev xav tau xav yuam kev tias tej haujlwm kuv ua ces yuav tswj tau Vajtswv txoj kev hlub pub rau kuv. Thaum no kuv nkag siab tias Vajtswv txoj kev hlub tsis hloov pauv, nyob mus li. Thov Vajtswv qhib kuv lub siab kom kuj saj tau txoj kev hlub siab, kev hlub dav, uas tsis yuav ua dabtsi koj niaj hnub hliv rau kuv lub neej. Kuv thov hauv Tswv Yexus Khetos lub npe. Amees.
Cov kwv tij, tag nrho peb txhua tus puav leej yog cov menyuam uas muaj tus cwjpwm npau taws sai, tsis sib haum, yeej tseem ua rau Leej Txiv saum ntuj muaj kev tu siab. Muaj ntau zaug peb tsis mloog lus, ua xyem xyav, chim rau Vajtswv. Tiamsis ua Vajtswv tsaug rau Vajtswv txoj kev ua siab ntev txoj kev hlub uas tsis yuav ib yam dabtsi tau muab pub rau peb, kom peb tseem muaj sijhawm tig rov qab los nyob rau hauv txiv txhais tes, Koj yuav cog lus rau yam dabtsi thaum koj saj tau Vajtswv txoj kev hlub ruaj khov uas Vajtswv tseg rau koj?
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply