“Fij” yog ib qhov haujlwm uas cov ntseeg Vajtswv ib txwj coj. Ua li puas yog “fij” tsuas yog fij nyiaj rau hnub pehawm lossis rau Pawg Ntseeg tej haujlwm xwb lod? Thiab Vajtswv xav kom peb fij zoo li cas thiaj yuav haum Vajtswv siab thiab tau Vajtswv txais yuav?
Hnub no, yog hnub 22/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marissa Nordlum dhau ntawm Zaj kawm FIJ YAM ZOO TSHAJ PLAWS.
“Yexus hais tias, Kuv qhia rau nej hais tias, tus pojntsuam no tso ntau dua lwm tus. Rau qhov lwm tus muab tej nyiaj uas seem tuaj tso xwb; tiamsis tus pojntsuam uaspluag pluagno, nws muab hlo ob lub txiaj toog uas nws muaj tuaj tso huv tibsi.” (Lukas 21:3-4).
Qhov uas koj txais tau ib daim ntawv ntawm koj cov menyuam uas lawv cim civ muab tes ua yog yam khoom plig uas zoo siab tshaj plaws lawm . Yog tias koj yog ib leej niam leej txiv, koj yuav saj tau qhov no. Tau ob peb xyoos dhau los, ncaj rau niam hnub, yog thawj zaug uas kuv tus txiv thiab kuv tus tub hlob nkawd tau koom tes kos ib daim duab nrog lub ntsiab lus tias “Kuv hlub niam”. Tomqab ntawd kuv tus tub tseem muab nws cov ntiv tes mus raus rau hauv cov kua mem, tas muab nws txhais tes, txhais taw los nias ua lub cim rau ntawm daim duab thiab.
Kuv yeej tsis hnov qab lub sijhawm uas kuv tau txais qhov khoom plig ntawm kuv tus txiv thiab kuv tus menyuam. Txawm yog kuv tus txiv twb muab pub kuv nrog tej khoom kim nyiaj tshaj los, tej zaug qhov khoom plig no yog qhov khoom uas muaj nqis yog daim duab kos tes no. Txog niaj hnub nim no daim duab yeej tseem muab daim hauv peb lub tsev, kuv tau saib mus los txhua zaug uas kuv tawm mus thiab nkag los rau hauv. Txhua zaug uas pom daim duab, kuv luag ntxhi vim paub tias nws muaj nqis heev rau kuv.
Txawm yog daim duab no nws tsis muaj nqis rau lwm tus los, nyob ntawm kuv, nws yog tag nrho lub ntiajteb, vim ntawm no yog qhov khoom plig uas tau kuv tus tub nws siv tag nrho nws lub siab los ua.
Kuv nyiam zaj xwm txheej uas tus poj ntsuam fij nyiaj nyob hauv Lukas tshooj 21 vim zaj xwm txheej ua rau peb pom txog ib txojcai zoo tib yam nkaus li ntawd. Ntawd yog qhov khoom plig muaj nqis tshaj plaws tau muab fij pub rau Vajtswv los ntawm lub siab dawbhuv. Lukas 21:1-4 sau tseg li no:
“Yexus tsa qhov muag saib nws pom cov neeg nplua nuj tso nyiaj rau hauv lub phijxab uas nyob hauv lub Tuamtsev, thiab porn ib tug pojntsuam pluag pluag tabtom muab ob lub txiaj toog tso rau hauv. Yexus hais tias, “Kuv qhia rau nej hais tias, tus pojntsuam no tso ntau dua lwm tus. Rau qhov lwm tus muab tej nyiaj uas seem tuaj tso xwb; tiamsis tus pojntsuam uaspluag pluagno, nws muab hlo ob lub txiaj toog uas nws muaj tuaj tso huv tibsi.”
Tus poj ntsuam no yeej tsis muab dabtsi muaj nqis los ua khoom fij, nyob ntawm lwm tus, ob lub nyiaj me me ntawd cuag li yeej tsis yog dabtsi thiab tsis tsimnyog luaj twg. Ob nyuag lub nyiaj tsawg luaj li no yuav pab tau Pawg Ntseeg li cas? Kuv xav tias ntawm no yog txoj kev xav ntawm cov neeg uas tau ntsia pom pog qhov nyiaj tsawg tsawg uas pog fij. Tiamsis qhov teeb meem tsis yog nyob ntawm nyiaj ntau lossis tsawg, tiamsis nyob hauv lub siab uas pog muab fij. Pog fij tag nrho tej uas nws muaj, ntawd yog lub siab fij dav fo rau ib tug pojntsuam.
Kuv xam tau Tswv Yexus lub ntsej muag luag ntxhi thaum uas nws tham zaj xwm txheej no rau cov thwjtim. Tswv Yexus qhia cov thwjtim ib zaj kawm muaj nqis tias tsis yog cov khoom ntawd ntau lossis tsawg, loj lossis me, tiamsis qhov tseem ceeb yog thaum fij, tus neeg ntawd lub siab puas huv. Tus poj ntsuam no fij tag nrho tej uas nws muaj, txawm yog me los lub siab dawbhuv, vim li nws thiaj dhau los ua qhov khoom loj dua ntais tej uas tau muab fij.
Peb yuav pom qhov no yog nyob hauv txoj kev nrog tus Tswv mus. Thaum peb muab tej qoob loo fij los ntawm lub siab dawbhuv, txawm yog tsis ntau rau lwm tus los, nws yeej tseem muaj nqis rau Vajtswv. Ib yam li Vajluskub tau sau, peb tej khoom nyob qhov twg ces peb lub siab yeej nyob qhov ntawd (Mathais 6:21) – Kuj zoo ib yam li daim duab uas kuv tus tub tau muab kos, kuv muab kuv lub siab tso rau ntawd. Nyob hauv txhua qhov khoom plig kim nyiaj uas kuv tau txais, qhov khoom plig no nws chwv txog kuv lub siab los ntawm tej uas qhov khoom tau coj los: dawbhuv, zoo thiab muaj nqis nyob hauv kuv lub qhov muag ntsia pom.
Hnub no, koj yuav fij yam dabtsi pub rau Vajtswv? Vim peb txhua tus ib leeg nyias yuav fij nyias ib yam sib txawv pub rau Vajtswv, yog li peb tsis tas yuav siv zog ua kom tau li lwm tus. Tej zaug Vajtswv tab tom xav kom koj muab lub sijhawm fij rau Vajtswv, xav kom koj fij nyiaj, lossis ntau zaug yog koj lub siab. Tej zaug Vajtswv tseem nqua hu kom koj mloog Vajtswv lus nyob rau lub sijhawm uas muaj kev txomnyem tshaj plaws. Txawm yog yuav yog dabtsi los, koj cia li mus cuag nws hnub no, hauv koj lub sijhawm thov Vajtswv, tso koj lub siab thiab nug Vajtswv: “Tus Tswv, hnub no koj xav kom kuv fij yam dabtsi rau koj?”
Nco qab ntsoov tias cov khoom fij tau muab fij rau Vajtswv los ntawm lub siab dawbhuv thiab mloog lus yuav yog cov khoom fij muaj nqis tshaj plaws ntawm Vajtswv qhov muag.
Thov caw nrog kuv peb thov Vajtswv ua ke:
Tus Tswv, thov qhia rau peb kom peb paub fij yam dabtsi nyob hauv peb lub neej kom haum Vajtswv koj siab. Thov pub rau peb kom tsis yog tsuas fij nyiaj, sijhawm xwb, tiamsis tseem yog tag nrho peb lub neej. Thov Vajtswv koj ntxuav peb lub siab kom dhau los ntawm Tswv Yexus cov ntshav, peb lub neej yuav dhau los ua cov khoom ciaj thiab dawbhuv rau koj, thiab kuj yog cov khoom fij uas zoo tshaj plaws tau muab fij rau koj. Kuv thov hauv Tswv Yexus Khetos lub npe. Amees.
Cov kwv tij, Tswv Yexus zoo siab muab Nws lub neej fij rau Vaj Leej Txiv, thiab kuj txaus siab muab Nws lub cev, txojsia los cawm peb. Hnub no, cov neeg uas tau txhiv hauv Nws cov ntshav dawbhuv, koj puas yuav zoo siab hlo muab yam uas zoo tshaj plaws ntawm koj fij pub rau Nws? cia li vam khom Vaj Ntsujplig cia kom Vajtswv pab koj tiv dhau tej kev tab kaum hauv lub siab thiab zoo siab hlo los mloog Vajtswv lus nyob hauv txhua yam.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.