Peb tab tom ua neej nyob rau tiam uas luag saib txoj kev kawm txawj thiab kev txawj ntse tseem ceeb. Ob peb xyoos los no, peb hnov hais txog “Kev txawj ntse uas luag tsim los” (lossis hu ua AI) tau siv nyob rau hauv ntau feem thiab ntau tes haujlwm. Tiamsis, qhov tseeb yog muaj ib tug twg muaj kev txawj ntse rau ib yam dabtsi twg ces nws tsuas ho paub yam ntawd xwb nws ho tsis paub lwm yam ntxiv lawm. Yog li, qhov twg thiaj yog kev txawj ntse tiag?
Hnub no, yog hnub 23/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Matthew Loomis dhau ntawm Zaj kawm KEV TXAWJ NTSE TIAG.
“Cov neeg uas ua lub neej tsis muaj leejtwg thuam tau, thiab ua lub neej raws li tus Tswv txoj kevcai yog cov uas tau koob hmoov.” (Ntawv Nkauj 119:1).
Nyob rau hauv tsev neeg txoj kev ua si, peb pheej saib tej game shows. Tsis ntev los no peb saib ib qhov kev ua si xws li tias “nug nyuaj teb yooj yim”. Thaum tus coj nws nyeem cov lus nug, tus neeg teb tsis txhob xav deb deb vim lo lus teb tej zaug nyob kiag ntawm hauv ntej. Txhua zaug uas pib, tus coj yuav nug cov uas teb tias vim li cas lawv ho xav tias lawv muaj txaus peev xwm los teb txoj kev ua si no. Muaj ib tug tub hluas teb meej meej tias: Vim kuv muaj kev txawj ntse siab.
Yam txuas ntxiv ua rau kuv xav tsis thoob: tus tub hluas uas muaj kev txawj ntse siab ntawd nws twv tsis dhau. Tseeb tiag, nws twv tsis zoo – nws teb tsis tau thiab tso tseg ntxov.
Qhov uas peb saib txoj kev sib tw no ua rau kuv nco ntsoov tias muaj tswv yim thiab txawj ntse puav leej yog qhov khoom plig los ntawm Vajtswv los, tiamsis tej no ib leeg xwb yeej yuav ua tsis tau kom peb tau lub neej zoo nyob rau hauv txhua yam uas peb ua.
Tej zaug luag yuav pom koj yog ib tug neeg nrawm, muaj peev xwm thiab yog ib tug kws txawj rau ib yam dabtsi cheem tsum kev txawj ntse ces qhov uas txo hwjchim ib me ntsis yog ib yam uas txawj ntse.
Ib qhov piv txwv zoo tseg rau qhov no yog zaj xwm txheej hais txog vajntxwv Xalumoos. Nyob hauv Vajluskub, zaj xwm txheej uas hais txog yawg ua rau pom tias kev txawj ntse thiab muaj tswv yim yog tej koob hmoov tiamsis tej ntawd yeej hloov pauv tsis tau Vajtswv qhov chaw hauv peb lub neej. Thaum ib tug neeg nws muaj tswv yim txawj ntse, nws yuav tau ceev faj tsis txhob khav nyob rau hauv nws txoj kev txawj ntse.
Nyob hauv I Vajntxwv, peb yuav ntsia pom tag nrho txog tej uas tau tshwmsim los raug rau Xalumoos. Nyob hauv tshooj 10, vajntxwv tab tom nyob rau lub neej uas vam meej tshaj plaws hauv nws txoj kev ua vajntxwv. Yawg txoj kev txawj ntse nrov mus txog txhua lub tebchaws tej vajntxwv yuav tau tuaj hauv Yeluxalees nrhiav yawg txoj kev txawj ntse (I Vajntxwv 10:23-24). Yam uas tshwmsim nyob rau tshooj txuas ntxiv tseem ua rau peb xav tsis thoob txog qhov uas peb ntsia pom nyob hauv txoj kev ua si: Xalumoos, yog ib tug uas txawj ntse tshaj plaws nyob rau hauv lub ntiajteb tiam thaum ntawd, tau tsis mloog Vajtswv lus ntxiv. Ntawm no yeej tsis yog ib txoj kev xaiv txawj ntse rau peb cov txhua txhia tus li.
“Xalumoos nyiam ntau tus pojniam uas yog neeg txawv tebchaws. Dua li cov Iziv tus vajntxwv tus ntxhais lawm, nws tseem yuav cov Hitis, cov Mau-am, cov Edoos thiab cov Xidoos tej ntxhais los ua pojniam thiab. Xalumoos tseem mus yuav cov neeg uas tus Tswv txwv kom cov Yixalayees tsis txhob yuav lawv tej ntxhais los ua pojniam, rau qhov lawv yuav coj cov Yixalayees mus pe lawv tej vajtswv. Xalumoos yuav xya pua tus pojniam uas yog ntxhais vajntxwv thiab peb puas tus pojniam uas tsis yog ntxhais vajntxwv. Cov pojniam ntawd thiaj ua rau nws tso Vajtswv tseg, thiab thaum uas nws laus lawm, nws cov pojniam ntawd thiaj coj nws mus pe cov neeg txawv tebchaws tej vajtswv. Nws tsis muab lub siab npuab tus Tswv uas yog nws tus Vajtswv li nws txiv Daviv lawm” (I Vajntxwv 11:1-4).
Txawm yog Xalumoos tsis hnov lub tswb nrov ceeb toom tias “ yawg teb yuam kev los”- tej zaug yawg yeej yuav hnov mob siab thiab tag kev cia siab vim tab tom twb mus yuav txog rau ntawm qhov chaw “muaj yeej” tiamsis thaum kawg ho yog puas tsuaj?
Peb yeej tsis paub tias yawg tus kheej ua li cas, tiamsis peb paub tias tej lo lus teb “tsis yog” tom qab no nyob hauv yawg lub neej tau ua rau kaum ob xeem neeg Yixalayees sib faib. Yeej tsis muaj ib yam dabtsi tau hais ntxiv txog yawg txoj kev tuag thiab muab yawg faus rau hauv Yeluxalees.
Los ntawm yawg txoj kev txawj ntse uas Vajtswv muab pub, Vajntxwv Xalumoos paub ntau dua. Tiamsis yawg xaiv tsis mloog Vajtswv lus. Yawg yuav lwm haiv neeg tej ntxhais uas Vajtswv txwv tsis pub yuav – yawg dhau los koom nrog 700 tus poj niam kwv ib tug quab thiab pe lawv tej mlom thiab mus nrhiav dua lwm tus vajtswv! Vajtswv twb ceeb toom ua ntej tias qhov no yuav ua rau yawg yuam kev ntawm sab ntsujplig, tiamsis yawg pheej ua.
Thaum Xalumoos yog ib tug tub hluas, yawg tsis thov kom Vajtswv pub yawg muaj nyiaj txiag ntau lossis muaj koob npe nrov. Pauv qhov ntawd, yawg thov Vajtswv pub rau kom yawg muaj tswv yim thiab kev txawj ntse (I Vajntxwv 3:7-9). Ntawm no yog ib lo lus teb zoo heev puas yog! Tiamsis qhov uas yawg nrog tsis tau Vajtswv mus tas yawg tiam neej ua rau peb pom tias peb cheem tsum Vajtswv npaum cas. Yog Xalumoos nyob tsis taus hauv txoj kev ncaj ncees mus li ces leej twg yog tus yuav nyob tau? Dhau ntawm Tswv Yexus lawm yeej tsis muaj ib tug twg li. Tag nrho peb txhua tus puav leej cheem tsum Vajtswv – txawm yog peb txoj kev txawj ntse yuav ntau npaum cas lossis peb yuav teb tau pes tsawg lo lus nug nyob rau ib txoj kev sib tw twg los. Peb txoj kev txawj ntse yuav tsis muaj hnub hloov pauv tau Vajtswv li.
Peb cheem tsum Vajtswv coj peb txhua hnub tsis yog tsuas yog ib nyuag ntu twg lossis ib lub sijhawm twg xwb. Peb cheem tsum Vajtswv txoj kev txawj ntse tsis yog vam khom rau peb txoj kev txawj ntse.
Cia siab tias peb yuav nrhiav Vajtswv tag siab thiab nrog tus Tswv mus ua ke txhua hnub zoo li tus sau Ntawv Nkauj 23:3 “[Thov] coj kuv mus rau hauv txoj kev ncaj ncees los ntawm koj lub npe”.
Thov caw nrog kuv peb thov Vajtswv ua ke:
Tus Tswv thov pub koj txoj kev txawj ntse rau kuv kom kuv ua lub neej haum koj siab. Thov pab kom kuv txo hwjchim, mloog lus thiab ncaj ncees mus ib txhis. Nyob hauv txhua txoj kev txiav txim siab hauv lub neej, thov pub kev txawj ntse thiab txoj kev nkag siab rau kuv. Thov Vajtswv kom Vajtswv lub siab nyiam tau ua nyob rau hauv kuv lub neej. Kuv thov hauv Tswv Yexus Khetos lub npe. Amees.
Cov kwv tij txhua tus, cia siab tias peb yuav nco ntsoov tias Vajtswv yog lub hauv paus ntawm txhua yam uas peb cheem tsum, muaj kev txawj ntse thiab Vajtswv ua tus coj nyob rau hauv lub neej. Thiab Vajtswv txojlus yog lub teeb yuav ci rau kom peb pom kev nyob rau hauv lub ntiajteb no. Tseg sijhawm rau Vajtswv tej lus, qhib siab los kawm Vajtswv txojlus yuav pab kom nej paub Vajtswv thiab Vajtswv tej lus qhia kom ntau dua.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.