Koj puas hlub Vajtswv? Hnub no koj nco Vajtswv tshav ntuj txog yam dabtsi? Muaj ntau zaug peb yooj yim teb cov lus nug no, tiamsis muaj lwm lub sijhawm peb ho teb tsis tau. Yuav ua li cas peb thiaj tuav tau peb lub siab kom nyob ze Vajtswv, kom haum Vajtswv lub siab?
Hnub no, yog hnub 30/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sandra Holcombe dhau ntawm Zaj kawm LUB SIAB UAS HAUM VAJTSWV SIAB.
“Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav” (Pajlug 4:23).
Koj puas paub tias Vajtswv hlub koj ntau npaum li cas? Lossis koj ua xyem xyav rau qhov tseeb no? Cia li ntuas yus tus kheej los ntawm nqe Vajluskub nyob hauv Yauhas 3:16 thiab nyeem kom nrov nrov nqe Vajluskub no. cia kom nws dhau los ua ib cov tshuaj vitamin sab ntsujplig rau koj.
“Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis”
Vajtswv hlub koj zoo li ntawd! Nws hlub sawv daws uas Nws tau tsim los! Ntau zaug, thaum txoj kev ua xyem xyav nkag los rau hauv lub siab, ua rau peb cim civ nug Vajtswv tias peb yuav ua li cas rau yus lub neej. Vim lub sijhawm, ntau zaug peb yuav muaj kev tu siab ntau tsawg thiab tej zaug peb twb ua lossis hais tej yam uas thaum no peb hnov khuv xim. Peb paub peb tus kheej txoj kev ua tsis tau… thiab ntseeg tias Vajtswv kuj paub. Thaum peb ua xyem xyav rau Vajtswv txoj kev hlub tseg rau lwm tus, ces peb kuj yuav ntsia tsis pom Vajtswv daim duab nyob hauv lawv thiab yuav cim civ nug tias vim li cas Vajtswv yuav siv lawv rau ib yam dabtsi twg zoo. Piv txwv li peb ntsia ntau tus thawj coj nyob hauv txoj kev tswj teb kav chaw, thiab ntau tus thawj coj sab kev ntseeg, peb txiav txim rau lawv los ntawm peb txoj kev tos ntawm lawv thiab raws li tej kab lig kevcai. Tej zaug peb yuav hais tias: “Tus neeg no kuj paub cai thiab” thiab hais tej uas lawv ua tsis tshua yog. Lossis peb yuav hais tias tus tod lub neej yav dhau los tsis zoo, muaj teeb meem lossis lam tau lam ua. Lossis peb yuav hais tias lawv muaj tus cwjpwm tsis yog, tsis muaj txaus lub peev xwm lossis tsis muaj txaus kev kawm los ua.
Tiamsis Mauxes ne ho zoo li cas? Yawg yog ib tug tsis txawj hais lus thiab yawg kom Vajtswv xaiv lwm tus, Mauxes tau tua neeg dhau los thiab tsis yog tias thaum twg twb ua raws li tej uas Vajtswv hais.
Ximoos Petus yog ib tug neeg siab kub, txiav tus pov thawj hlob ib tug tub qhe pob ntseg tu nrho, thiab tseem tsis lees paub Tswv Yexus.
Paulus ho zoo li cas? Yawg ris lub nra uas tua ntau tus ntseeg thawj thawj tau los ntseeg Yexus Khetos.
Txog vajntxwv Daviv. Txawm yog yawg muaj kev txhaum, ua txhaum kev nkauj nraug thiab tawm tswv yim phem tua nws tus hluas nkauj tus txiv pov tseg los, tom qab no Vajtswv yeej zam rau yawg lub siab uas tso kev txhaum tseg. Yog, Daviv muaj qee yam tsis zoo ntawm nws tus cwjpwm, tiamsis Vajtswv yeej siv yawg. Tsuas yog Vajtswv xwb thiaj paub Daviv lub siab thiab ntsia pom Daviv txoj kev tu siab tiag. Vajtswv zam txim rau Daviv thiab siv yawg – dhau ntawm Daviv, Vajtswv thiaj xaiv Tswv Yexus caj ces! Daviv ua pov thawj qhia tias nws yog tus ua “raws li Vajtswv lub siab nyiam” ib yam li Vajluskub qhia rau peb paub.
Lub siab lees txim ntawm Mauxes, Ximoos Petus, Paulus thiab Daviv lawv tau ua rau Vaj Leej Txiv zam txim rau lawv. Thiab los ntawm peb lub siab lees txim ces Vajtswv kuj yuav zam txim ib yam nkaus li ntawd rau peb.
Tsuas yog Vajtswv xwb thiaj paub tau tib neeg lub siab. Yog li, tej zaug tus neeg uas koj tsis cia siab ntau ho yuav dhau los ua ib tug thawj coj zoo, yog tus neeg uas Vajtswv siv los ua ib yam dabtsi twg zoo kawg nkaus.
“Tiamsis Vajtswv xaiv yam uas neeg xav hais tias ruam kawg nkaus hauv lub ntiajteb no kom cov neeg txawj ntse txajmuag; thiab Vajtswv xaiv yam uas neeg suav hais tias tsis muaj zog hauv lub ntiajteb no kom cov neeg muaj zog pooh ntsejmuag.” (I Kauleethaus 1:27).
Thov Vajtswv pab kom peb muaj lub siab caum Vajtswv zoo li Daviv. Vajtswv tsis hu tus neeg zoo los caum Nws, tiamsis Vajtswv hu peb txhua tus – cov neeg uas Vajtswv hlub- nrog Vajtswv mus. Thiab Vajtswv yuav ntsia pom txoj kev uas nrog tus Tswv mus ntawd peb yuav tau hloov pauv kom dhau los zoo li Tswv Yexus ntau dua.
Thov caw nrog kuv peb thov Vajtswv ua ke:
Leej Txiv, thov pab kom kuv ntsia pom kuv tus kheej thiab lwm tus los ntawm koj lub qhov muag tsis yog raws li peb lub qhov muag. Thov pab kom peb ntsia pom lub peev xwm koj muab tso rau hauv peb txhua tus kom peb ua lub neej raws li Vajtswv lub suab hu. Thov pub kom peb paub koj yog tus uas tsim peb los thiab pab kom txhua hnub peb dhau los zoo li koj dua. Thov pab kom peb muaj lub siab caum koj ib yam li Daviv, kom peb kuj tau Vajtswv koj hu hais tias yog cov neeg uas haum Vajtswv koj siab.
Peb taij thov txhua yam los ntawm Tswv Yexus Khetos lub npe. Amees.
Cov kwv tij txhua tus,
Lub siab yog yam uas Vajtswv tab ncuab ntau tshaj plaws nyob rau ntawm peb. Yog li, yuav tau tu, tswj thiab tiv thaiv peb lub siab kom zoo. Yog koj xav muab yam uas zoo tshaj plaws fij rau Vajtswv, ces hnub no cia li muab koj lub siab thiab koj lub neej fij rau Vajtswv hnub no. Ntseeg tias Vajtswv yuav zoo siab nkag los rau hauv, ua tus coj thiab hloov pauv koj raws li Vajtswv lub siab nyiam uas zoo kawg nkaus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply