Lees txim yog tig rov qab los cuag Vajtswv, paub yus tej kev txhaum thiab tso qhov kev txhaum ntawd pov tseg. Txawm yog lo lus “lees txim” nws yog ib lo lus uas coob tug paub tiamsis lees txim tiag yog ib qhov haujlwm tseem ceeb heev nyob hauv lub neej uas xav tau hloov pauv tiag thiab tau koob hmoov. Txo hwjchim, nrhiav Vajtswv hauv txoj kev lees txim yog txoj kev uas yuav nrhiav tau Vajtswv txoj kev hlub tshua pub rau peb thiab peb lub tebchaws.
Hnub no, yog hnub 31/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Macnab dhau ntawm Zaj kawm TSO KEV TXHAUM TSEG KOM ROV QAB TAU KHO ZOO.
“koj lees koj tej kev txhaum thiab txo hwjchim tabmeeg kuv, koj quaj tu siab nrho thiab dua rhe koj lub tsho, thaum koj paub hais tias kuv yuav rau txim rau lub nroog Yeluxalees thiab cov neeg huv tibsi. Kuv yuav ua kom lub nroog puastsuaj tas, thaum luag porn luag yuav ntshai heev, thiab luag yuav tuav lub nroog no lub npe foom tsis zoo. Tiamsis vim kuv twb hnov koj tej lus thov lawm” (2 Vajntxwv 22:19).
Sim xam tias. Lub sijhawm tshaj 50 xyoo, cov Yixalayees lawv pehawm Vajtswv thiab siv zog coj raws li Vajtswv tej lus, tiamsis tib txhij ntawd, lawv kuj pe lwm haiv neeg tej mlom kub, mlom tooj. Tsis yog li ntawd xwb, lawv tseem ua yam uas phem ntawd hauv Vajtswv lub tuam tsev. Thiab cov thawj coj saib xyuas txoj kev ntseeg lub sijhawm ntawd lawv ua tug tsis paub thiab tso cai rau tej pej xeem tsau tsawv hauv txoj kev puas tsuaj. Thaum uas tab tom tag kev cia siab,tsim nyog lawv yuav nrhiav tus Vajtswv muaj sia nyob, tiamsis lawv mus nrhiav txiv neeb, saib yaig. Lawv muab lawv tej menyuam fij rau tej mlom. Txoj kev phem qias no pom muaj ntau zuj zus nyob hauv cov ntseeg Vajtswv. Thaum zoo li no, Vajtswv txoj kev txiav txim dai ncuv saum lawv taub hau.
Ntawm no yog tej uas tau hais txog lub teb chaws Yudais sab qab teb (tomqab 10 xeem qaum teb cais ua lub tebchaws hu ua Yixalayees). Ntawm no yog lub sijhawm uas ua ntej tebchaws Yudais poob rau Npanpiloos, thiab Npanpiloos zoo li ib txoj hau kev Vajtswv siv los rau txim rau lawv tej kev txhaum. Lub sijhawm ntawd, Amoos yog cov neeg Yudais ib tug vajntxwv ua phem, raug tua tuag, thiab yawg tus tub Yauxiyas, pib kav teb chaws thaum uas nws tseem me heev. Xav tsis thoob thaum uas Yauxiyas yog ib tug vajntxwv hwm Vajtswv – thiab yog ib tug vajntxwv uas hluas ua Vajtswv haujlwm thaum nws nyuam qhuav muaj 16 xyoo; yawg ua lub neej hwm Vajtswv heev thaum uas nyuam qhuav muaj 20 xyoo xwb, yawg samhwm kom nws lub tebchaws yuav tau ntxuav tej mlom ntawd tawm hauv nws lub tebchaws mus. Yawg ua haujlwm tawm tsam cov pej xeem tej kev txhaum, thiab qhov ntawd pib hloov pauv tag nrho yawg lub tebchaws.
Tsis ntev xwb, Yauxiyas pib coj cov pej xeem mus kho tuam tsev cia cov pej xeem muaj chaw pehawm Vajtswv. Kuj tib lub sijhawm ntawd, yawg nrhiav tau Vajtswv phau ntawv kevcai, uas yog tus Tswv tej lus lub sijhawm ntawd. Thaum Yauxiyas nyeem Vajtswv tej lus vajntxwv pom cov pej xeem tej kev txhaum thiab kev tsis mloog Vajtswv lus zoo li cas. Qhov ntawd ua rau yawg lub siab lwj puas ntsoog, yawg dua yawg lub tsho thiab lees txim. Tas vajntxwv thiaj hu cov pej xeem tuaj ua ke cog lus nrog Vajtswv thiab cog lus yuav mloog Vajtswv lus.
Kom yog mas txoj kev txiav txim yuav los raug vim cov pej xeem tau ua txhaum, tiamsis thaum Yauxiyas xaiv lees kev txhaum thiab mloog Vajtswv lus, txo hwjchim los lees txim, qhov ntawd ua rau muaj kev hloov pauv tsis yog tsuas pub rau yawg xwb tiamsis tseem tseg rau tag nrho lub tebchaws. Vajluskub qhia rau peb paub tias tus Tswv teb Yauxiyas cov lus li hauv qab no:
“koj lees koj tej kev txhaum thiab txo hwjchim tabmeeg kuv, koj quaj tu siab nrho thiab dua rhe koj lub tsho, thaum koj paub hais tias kuv yuav rau txim rau lub nroog Yeluxalees thiab cov neeg huv tibsi. Kuv yuav ua kom lub nroog puastsuaj tas, thaum luag porn luag yuav ntshai heev, thiab luag yuav tuav lub nroog no lub npe foom tsis zoo. Tiamsis vim kuv twb hnov koj tej lus thov lawm, kuv yuav tos kom koj tuag tso, kuv mam li rau txim rau lub nroog Yeluxalees. Kuv yuav cia koj tuag kaj siab lug.” Lawv coj tej lus ntawd mus piav rau Vajntxwv Yauxiyas mloog” (2 Vajntxwv 22:19-20).
30 xyoo uas Yauxiyas ua vajntxwv kav, Vajtswv tsis rau txim rau cov pej xeem. Vajtswv lub siab hlub tshua txog cov pej xeem vim muaj ib tug vajntxwv tau xaiv txo hwjchim thiab mloog raws li Vajtswv txoj kev. Kuj ib yam li ntawd, niaj hnub nim no, txhua lub tebchaws khiav deb Vajtswv zuj zus, thiab txoj kev txiav txim tab tom los txog ze zuj zus. Tiamsis peb muaj kev cia siab thaum uas paub tias Vajtswv zaum ntawm Nws lub zwm txwv kav; txhua tag kis sawv ntxov, Vajtswv lub siab hlub tshua rov qab tshiab tuaj. Thiab Vajtswv lub siab hlub tshua ntawd txawm yog tsuas yog ib tug xwb los, cia Vajtswv lub siab hlub ntawd pub rau koj lub neej.
Puas tau muaj zaum twg Vajtswv twb cob qhia koj kom koj xyaum ua tus neeg txo hwjchim zoo li Paulus (Tes Haujlwm 26:14). Koj puas txo koj lub hwjchim rau ntawm Vajtswv xub ntiag thaum uas paub koj lub tebchaws lub neej txojsia nyob hauv Vajtswv txhais tes? Koj puas txiav txim siab cog lus thiab muab koj tus kheej fij rau Vajtswv kom tau Vajtswv rov qab ua kom muaj txoj kev sib raug zoo ua ke nrog Nws dua? Koj puas xav kom tau saj Vajtswv txoj kev ncaj ncees dhau los ntawm Vajtswv tej lus cog tseg?
Yeej muaj ib txoj kev cia siab rau txhua lub tebchaws, tiamsis tag nrho yuav tau pib los ntawm txoj kev lees txim.
Thov caw nrog kuv peb thov Vajtswv ua ke:
Tus Tswv ntau zaug peb tsau tsawv rau hauv peb tej kev txhaum thiab tsis maj nroos lees txim. Thov Vajtswv pab kom peb paub lees txim, tso peb tej cwjpwm phem uas ua rau peb mus qeeb nyob hauv txoj kev sib tw no tseg. thov Vajtswv pab kom peb lub neej yuav yog ib txoj koob hmoov rau tej neeg ib ncig peb thiab peb lub tebchaws. Kuv thov hauv Tswv Yexus Khetos lub npe. Amees.
Cov kwv tij, thaum nyeem Vajtswv txojlus koj puas quaj tu siab rau koj tus kheej thiab tej neeg ib ncig ib yam li vajntxwv Yauxiyas tau quaj rau nws cov pej xeem thaum ub? Thov Vaj Ntsujplig pab tej nyuaj siab ntawd pauv los ua txoj kev lees txim tiag, kom rov qab ua rau peb lub siab huv thiab koj lub zej zog huv. Yuav tau ntshaw kom tau lub neej hloov pauv nyob hauv koj lub siab thaum koj tso kev txhaum tseg thiab tig rov qab los mloog Vajtswv txojlus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply