Tej zaug peb twb muaj kev khuab xeeb lossis qee lo lus nug txog ntuj ceebtsheej. Ntawd yog qhov chaw uas Vajtswv npaj tseg rau cov neeg uas ntseeg Nws. Tiamsis lub tebchaws tiag ntawd puas zoo li lub ntiajteb uas peb tab tom nyob no? Tej kev cheem tsum hauv lub neej nyob ntiajteb no puas tseem muaj nyob saum ntuj ceebtsheej? Tshuav peb cov neeg txheeb ze, xws li peb ob niam txiv ne ho yuav zoo li cas?
Hnub no, yog hnub 02/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Janice Moore dhau ntawm Zaj kawm VIM LI CAS NTUJ CEEB TSHEEJ TSIS MUAJ KEV SIB YUAV.
“Lawv yuav zoo ib yam li cov timtswv ceebtsheej thiab yuav tsis tuag li. Lawv yog Vajtswv cov menyuam, rau qhov lawv twb sawv hauv qhov tuag rov qab los lawm.” (Lukas 20:36).
Thaum tseem hluas, kuv ntshaw kom ntsib ib tug neeg tshwj xeeb, muaj ib rooj tshoob zoo kawg nkaus, npaj txhua yam zoo, muaj cov nkauj nyab cuav zoo nkauj heev. Kuv ntshaw kom txog hnub uas kuv ntsib kuv tus txij nkawm, muaj sijhawm nyob ze ntawm nws ib sab, tas peb koom siab qhia peb tej menyuam… muaj ib tsev neeg zoo kawg nkaus.
Niaj hnub nim no muaj ntau tus xav kom lawv rooj tshoob nto npe yog lawv npaj ua tshoob rau saum tej qhov chaw txawv txawv xws li, ya saum nruab ntug nrog tej lub kaus ya, lossis tus nkauj nyab caij kaus ya saum lub dav hlau los hauv av rau ntawm tus nraug vayv tabtom sawv tos, lossis muaj tej tus nkauj nyab lawv dhia tawm hauv dav hlau los ntsib nws tus nraug vauv tab tom tos ntsib nws. Lawv yeej tsis khuv xim lawv tej nyiaj thiab tseg ntau hli ua ntej ntawd los npaj rau lawv rooj tshoob.
Thaum peb nyeem Vajluskub nyob hauv Lukas 20:34-36, Tswv Yexus hais tias: “Yexus teb hais tias, “Cov pojniam thiab txivneej tiam no thiaj li sib yuav xwb, tiamsis cov poJmam thiab cov txivneej tsimnyog sawv los tau txojsia thiab mus nyob tiam tom ntej, cov ntawd tsis sib yuav li lawm”.
DAB TSI? Nyob saum ntuj tsis muaj sib yuav los? Qhov no ntseeg tsis tau li, thiab peb kuj yuav xav tsis txog li. Yuav ua li cas ntuj ceebtsheej yog ntuj ceebtsheej yog tsis muaj lub neej txijnkawm? Muaj ntau tus lawv cia siab thiab tos ntev heev kom tau sib yuav. Muaj ib txhia lawv tsis tau muaj hnub tso tseg thaum lawv sib yuav tas sib nrauj rov qab sib yuav ob peb zaug ntxiv. Tswv Yexus hais tias Nws yog tus nraug vauv yuav los tos tus nkaujnyab uas yog – Vajtswv Pawg Ntseeg (Efexaus 5:25-27).
Tswv Yexus tab tom yuav rov qab los koom ua ke nrog nws Pawg Ntseeg – tsis yog cov mus pehawm hauv tuam tsev tiamsis yog cov neeg uas ntseeg Vajtswv tiag tiag.
Txoj kev xav txog lub neej txij nkawm thiab txoj kev hlub hauv lub ntiajteb no yim hnub yim raug muab los ua tsis ncaj ncees thiab suav tias yus thiaj yog tus tseem ceeb. Tib neeg lub neej txij nkawm tej zaug nws yuav nyob ib ncig ntawm tej yam xws li tau nyob ze yus kev txij nkawm, muaj sijhawm muaj nyiaj txiag ntau, muaj tej kev ntshaw qia dub. Tiamsis Vajtswv txoj kev ntsia rau lub neej txij nkawm nws txawv. Vajtswv tsim lub neej txij nkawm los cia kom tib neeg tsis nyob ib leeg, kom lawv yug menyuam thiab tau ua ib tug tib neeg muaj kev txaus siab rau lawv sab nqaij tawv (Chivkeeb 2:18, 9:7, I Kauleethaus 7:1-9).
Saum ntuj ceebtsheej, lub neej txijnkawm tsis cheem tsum lawm. Qhov chaw ntawd tsis muaj kev kho siab lawm. Tswv Yexus yuav nyob ntawm peb ib sab. Yuav tsis tag yug menyuam vim peb yuav nrog nws nyob ib txhis – peb caj ces yuav tsis muaj hnub xaus thiab peb yuav dhau los muaj lub neej zoo li tej tim tswv, thiab lawv yog cov uas tsis sib yuav lawv tsuas tsom ntsoov rau ntawm Vajtswv xwb. Peb kuj yuav tsis tuag ntxiv lawm vim peb yog Vajtswv cov menyuam thiab peb yog cov menyuam sawv hauv qhov tuag rov qab los (Lukas 20:36).
Kuv lub neej txijnkawm zoo kawg nkaus. Tsis yog vim nws tsis muaj teeb meem, lossis tsis muaj kev qaug zog, tiamsis kuv hlub kuv tus txiv thiab kuv saib taus tej lus wb sib cog ua ke “tsuas yog txoj kev tuag xwb thiaj yuav cais tau wb”. Kuv paub tias Vajtswv yuav muab ib yam dabtsi twg zoo dua los hloov lub neej txij nkawm no. Thiab qhov ntawd yuav zoo li lo lus: “Txog rau thaum twg txoj kev tuag coj peb rov qab los ua ke” nyob rau hauv lub neej ib txhis nrog Tswv Yexus thiab Pawg Ntseeg nyob ua ke mus li.
Vajtswv txojlus nyob hauv I Kauleethaus 2:9 sau tias: “Tej uas qhovmuag tsis tau porn lossis qhovntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm”.
Vajtswv twb npaj ntau yam zoo kawg nkaus tseg rau peb nyob saum ntuj ceebtsheej lawm txog qib uas peb npau suav hauv lub ntiajteb no yeej piv tsis tau rau tej ntawd.
Cia siab tias peb yuav saib taus peb lub neej txijnkawm hauv ntiajteb no thiab tuav txoj kev cia siab rau ntuj ceebtsheej puv npo koob hmoov uas Vajtswv cog lus yuav muab pub rau peb.
Thov caw nrog kuv peb thov Vajtswv ua ke:
Tus Tswv, kuv ua Koj tsaug vim Koj tau tsim muaj lub neej txijnkawm pub rau kuv nyob hauv ntiajteb no. Ua Vajtswv tsaug rau koj lub siab nyiam thiab txhua qhov khoom plig zoo uas koj muab pub rau kuv. Thov hloov pauv kuv txoj kev xav nqaim nqaim txog ntuj ceeb tsheej kom kuv txhob ntsia ntuj ceebtsheej los ntawm lub neej hauv ntiajteb no. Tiamsis kuv ntseeg rau koj txoj kev hlub thiab kev zoo. Thov Vajtswv pab kom kuv paub zoo siab rau txoj kev sib raug zoo hauv ntiajteb no los ntawm txoj kev sib hwm thiab pab kom kuv cia siab rau leej txiv lub tsev tau koob hmoov, qhov chaw uas kuv yuav ntsib koj thiab tau nrog koj nyob mus ib txhis. Kuv thov hauv Tswv Yexus Khetos lub npe. Amees.
Cov kwv tij txhua tus, yog tias koj tab tom nrhiav txoj kev hlub hauv yus lub neej, cia siab tias koj yuav nrhiav tau txoj kev hlub zoo kawg nkaus nyob hauv Tswv Yexus. Thiab phooj ywg, koj txoj kev cia siab hauv lub ntiajteb no, tshwj xeeb yog kev sib yuav, kuj yuav tau Vajtswv coj thiab ua tiav. Txawm yog koj tseem yog ib tug hluas tsis tau sib yuav lossis twb sib yuav lawm los, peb yeej tau ntuas kom yuav tau tu yus txoj kev sib raug zoo ua ke nrog Vajtswv. Vim ntawm no yuav yog txoj kev sib raug zoo mus ib txhis tsis hloov pauv txawm yog nyob hauv lub ntiajteb no lossis nyob saum ntuj ceebtsheej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.