Tau ua Vajtswv haujlwm yog ib txoj koob hmoov loj uas Vajtswv muab pub rau peb, tiamsis puas muaj zaum twg peb hnov qaug zog thaum ua Vajtswv haujlwm? Tej zaug peb tau tso ntau yam tseg los ua Vajtswv haujlwm; tiamsis koj puas paub, tej uas peb tso tseg pub rau Vajtswv thiab Vajtswv tes haujlwm puav leej tsimnyog thiab yuav tau Vajtswv pauj rov qab rau peb.
Hnub no, yog hnub 04/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tori Troncone dhau ntawm Zaj kawm QHOV KOOB HMOOV UAS LOJ TSHAJ.
“Tiamsis Yexus hais rau lawv hais tias: Cia nws ua nws! Tsis txhob ua rau nws nyuaj siab! Qhov uas nws ua rau kuv ntawd yog ib qho zoo.” (Malakaus 14:6).
Kuv yog ib tug neeg uas txuag nyiaj heev. Tsis yog kuv tsis xav siv nyiaj, tiamsis kuv xav khaws tseg thiab siv raws li txoj kev txawj ntse.
Ua ntej uas yuav yuav ib yam dabtsi twg uas nqi kim kim, kuv tseg sijhawm txhua hnub, ntau zaug tseem yog txhua thiv los muab tej ntawd los sib piv saib tus nqi sib txawv li cas, thiab xam saib yuav yuav yam twg kom nws muaj tus nqi pheej yig zog. Ua ntej uas txiav txim siab yuav zoo li ntawd, kuv nug kuv tus kheej tias, “Yuav li no puas tsimnyog?”
Txawm yog kuv ntseeg tias kuv yog ib tug txawj nyob hauv txoj kev yuav tau tej khoom zoo pheej yig los kuv yeej tsis xav nrog Vajtswv xam lossis nrog Vajtswv hais nqi thaum uas kuv nrog Vajtswv mus ua ke. Nrog tus Tswv mus yuam kom peb yuav tau tso ntau yam tseg los ntawm ntau txoj kev sib txawv. Tej zaug ntawd yuav yog nyiaj txiag, sijhawm, tej kev npaj ntawm tus kheej lossis peb tus kheej txoj haujlwm ua, tsis yog li xwb, tseem tshuav ntau yam ntxiv uas peb yuav tau muab fij rau Vajtswv. Thaum uas kuv paub tias kuv yuav tau muab qee yam fij rau Vajtswv, kuv tau nug kuv tus kheej tias puas yuav tsimnyog?
Malakaus 14:3-9 tham txog zaj xwm txheej Tswv Yexus raug ywg roj nyob hauv Npethanis. Ib tug pojniam tau nqa ib hwjroj kim kim heev, muab tsoo tawg thiab pleev rau Tswv Yexus lub taub hau. Muab ua lwm lo lus hais tus pojniam no tau siv tag nrho nws txoj kev khwv nyiaj hauv ib lub xyoo vim pog muab Tswv Yexus tso ua Vajntxwv thiab ua pog tus Cawm Seej. Muaj ob peb tug neeg zaum ntawd lawv tau chim heev rau tej uas lawv ntsia pom:
Muaj ob peb tug lawv chim thiab lawv sib tham hais tias: “Cov neeg uas nyob ntawd muaj qee leej tsis txaus siab thiab hais tias, “Ua li cas nws yuav muab cov roj tsw qab ntawd nkim povtseg? Yog muab coj mus muag yuav tau ntau dua peb puas lub nyiaj, w thiab muab cov nyiaj ntawd mus pub rau cov neeg pluag kuj zoo dual” Thiab lawv thuam tus pojniam ntawd heev” (Malakaus 14:4-5).
Tiamsis Tswv Yexus tsis cem pog.
“Tiamsis Yexus hais rau lawv hais tias, “Cia nws ua nws! Tsis txhob ua rau nws nyuaj siab! Qhov uas nws ua rau kuv ntawd yog ib qho zoo. Kuv qhia tseeb rau nej hais tias qhov uas tus pojniam no ua yuav nrov ncha mus rau txhua qhov hauv qab ntuj uas muaj neeg mus qhia Txojmoo Zoo, kom sawvdaws nco txog tej uas tus pojniam no tau ua lawm” (Malakaus 14:6,9).
Ntawm no yog ib txoj haujlwm zoo tshaj, los ntawm tib lub homphiaj yog txhawb nqa Tswv Yexus – yog tus Cawm Seej, ntawd kuj yog yam uas peb yeej tseem hais los txog niaj hnub nim no? Peb pom pog yuav tau them tus nqi siab thaum uas xav ywg roj rau Tswv Yexus. Tsis yog tsuas siv ib me ntsis roj xwb, lossis ib cov roj kom txaus xwb, tiamsis tus pojniam no tsis khuv xim dabtsi kom tau ua Tswv Yexus tes haujlwm.
Peb puas zoo siab hlo los ua tej yam zoo li ntawd? Tej zaug peb yeej tseem tsis tau kam muab peb lub neej tag nrho fij rau Vajtswv los vim peb ntshai tsam lwm tus xav tias peb yog neeg ruam. Thaum peb tso txhua yam tseg vim Tswv Yexus lub npe, muaj ntau tus ib ncig peb lawv tsis nkag siab tag txhua yam. Kuj zoo li cov neeg nyob hauv Npethanis, lawv xav tias lawv muab pub rau Vajtswv ces tsuas yog nkim lawv lub sijhawm, lawv tej nyiaj txiag thiab lawv lub zog xwb. Tiamsis Tswv Yexus hais tias:
“Tus uas hlub kuv yeej ua raws li kuv tej Ius qhia. Kuv Txiv yuav hlub tus ntawd; kuv Txiv thiab kuv yuav los cuag nws thiab nrog nws nyob” (Yauhas 14:23).
Thaum peb hlub Vajtswv thiab ua lub neej pub rau nws peb paub tias peb tab tom koom tes rau hauv lub neej ib txhis nrog Tswv Yexus ua ke. Yav dhau los, tej zaug peb tau siv zog txhawm rau peb lub siab los ntawm qhov uas khiav caum lub ntiajteb no, tiamsis tag nrho tej ntawd yeej piv tsis tau rau txoj kev sib raug zoo ua ke nrog Cawm Seej Tswv Yexus.
“Koj yuav qhia txojkev uas mus tau txojsia rau kuv, koj nrog nraim kuv ua rau kuv txaus siab thiab zoo siab mus ibtxhis” (Ntawv Nkauj 16:11).
Thov caw nrog kuv peb thov Vajtswv ua ke:
Tus Tswv yeej tsis muaj ib yam dabtsi yuav tau koob hmoov npaum li thaum uas kuv paub koj thiab tau ua neej nyob hauv koj. Ua Vajtswv tsaug vim koj tau pub peb muaj feem los ua tej lub laujkaub nyob hauv koj txhais tes. Thov Vajtswv pab kom peb nco koj tshav ntuj vim tau ua haujlwm nyob rau hauv ib lub tebchaws tsis yoj yees. Thov koj ntxiv zog rau peb, kom peb tsis qaug zog lossis tsis nkees, tiamsis yim hnub yim loj hlob tawg paj txi txiv hauv txoj kev ua koj dejnum.
Kuv thov hauv Tswv Yexus Khetos lub npe. Amees.
Cov kwv tij thaum uas paub Vajtswv txoj koob hmoov loj uas Vajtswv pub rau peb, koj yuav teb Vajtswv li cas? Peb puas xav kom tau ua Vajtswv haujlwm, lossis pheej nyob rau hauv lub neej qub thiab tsis loj hlob sab ntsujplig? Vam khom Vajtswv cia Vajtswv pab kom koj loj hlob hauv kev ua Nws dejnum. Thov kom koj txoj kev ntseeg yuav coj txoj kev hloov pauv los rau tej neeg ib ncig.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply