Muaj ntau tus lawv ua lub neej sab nraud zoo kawg nkaus tiamsis hauv lawv lub siab zais ntshis tej yam kev phem tsis muaj twg paub. Tib neeg lawv yuav tsim muaj txoj kev zoo nkauj nyob sab nraud kom npog tej qhov tsis zoo sab hauv, thiab cim civ txhawb tus kheej tias txhua yam puav leej zoo. Tiamsis thaum uas muaj teeb meem tshwm tuaj, ces tej yam tsis zoo ntawd yooj yim muab nthuav tawm los ntawm qhov kaj, tseg rau txhua tus ib lo lus nug loj: tsis paub yus yuav kho tej qhov pob puas ntawd lossis yuav nrog tej ntawd nyob ua ke, thiab yooj yim cia tej ntawd noj puas peb lub hlwb?
Hnub no, yog hnub 06/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dan Betzer dhau ntawm Zaj kawm KEV PUAS TSUAJ ZAIS NTSHIS.
“Nws muab tej uas neeg tsis paub thiab tsis porn los nthuav qhia rau sawvdaws; nws paub tej uas nyob nraim nkoos hauv qhov tsaus ntuj nti thiab muaj qhov porn kev ci kaj nrig nyob puagncig nws.” (Daniyees 2:22).
Xyoo tas los, tau muaj ib nthwv cua loj heev ntsawj dhau peb lub zos thiab rhuav tshem lawm ntau yam puas tsuaj. Peb lub tuam tsev kuj raug puas tsuaj loj. Ntau tus ntseeg li cuab tam poob tas. Wb ob niam txiv ua Vajtswv tsaug thaum uas wb lub tsev tsis ua cas.
Tiamsis tsis ntev los no, wb kuj ntsib dhau ib qhov teeb meem yeej tsis yog me li thiab. Thaum uas wb npaj yuav rov qab kho wb lub chav pw, wb tshem txhua yam tawm huv tibsi.
Thiab tom qab, wb mam pom feem tsis tau hais txog nyob hauv zaj xwm txheej. Thaum uas tej cuab yeej thaiv ntawd tsis muaj lawm, wb mam pom tias muaj ib ceg kaum nyob hauv wb chav pw nws pob puas loj heev lawm dej txheem los rau hauv. Cuag li nthwv cua loj heev ua rau cov vuas yaws lawm ua tau tej kab dej ntws los rau hauv daim phab ntsa, ntau hli dhau los, peb yeej tsis pom li.
Nws yeej tsis puas tsuaj ntau, tiamsis yuav tau kho. Oh, ntev loo los wb lub chav pw twb puag lwj li no tiamsis tej daim ntaub thaiv ua rau wb ntsia tsis pom li.
Qhov no ua rau kuv tus kheej kawm tau ib zaj kawm ntawm sab ntsujplig. Peb yuav tau nug peb tus kheej tias: Muaj pes tsawg yam muab zais cia hauv lub neej uas tsuas yog Vajtswv xwb thiaj paub – tej kev xav zais ntshis, tej lus tsis tau hais tawm (txawm yog twb xav ntev hauv yus lub hlwb), kev iab siab thiab kev npau taws, kev xav ua pauj rau tej teeb meem uas twb muaj ntev los lawm?
Peb twb muab zais tib zoo cia. Tiamsis txog rau ib hnub, muaj ib yam teeb meem twg tshwm sim tuaj, ua rau peb yuav tau nthuav tawm peb lub siab tab meeg rau ntawm Vajtswv txojlus. Thiab muaj ib lo lus nug rau peb tias, thaum ntawd peb yuav ua li cas?
Peb puas yuav npaj kho? Txawm yog qhov ntawd yuav poob nyiaj lossis tab kaum luaj twg? Lossis peb yuav cia kav liam nrog tej ntawd nyob ua ke zoo li tuaj pwm, tej kev xav tsis zoo, tej tus cwjpwm tsis zoo yim hnub yim loj tab tom loj hlob tuaj voob peb lub neej? Txoj kev txiav txim siab nyob hauv koj txhais tes.
“Nws muab tej uas neeg tsis paub thiab tsis porn los nthuav qhia rau sawvdaws; nws paub tej uas nyob nraim nkoos hauv qhov tsaus ntuj nti thiab muaj qhov porn kev ci kaj nrig nyob puagncig nws. (Daniyees 2:22).
Thov caw nrog kuv peb thov Vajtswv ua ke:
Vajtswv Leejtxiv tus dawbhuv, Thov kom koj tus duab ci pom kev yuav nthuav tawm tej qhov tsaus ntuj nyob hauv kuv lub siab, tej qhov puas tsuaj uas kuv yuav tau kho. Thov pab kom kuv pom thiab kam ntsib tim ntsej tim muag tej yam uas muab zais ntshis hauv kuv lub siab, tej yam uas peb muab khaws cia thiab zais rau tom qab txoj kev dag. Txawm yog qhov ntawd yuav muaj kev sim siab thiab txom nyem los thov Vajtswv pab kom peb paub ua siab ntev thiab muaj kev txawj ntse los kho tej uas twb pob puas lawm, dhau los ntawm Vajtswv lub hwjchim kho zoo. Kuv thov hauv Tswv Yexus Khetos lub npe. Amees.
Cov kwv tij, ntau zaug Vajtswv tso cai rau tej teeb meem tshwmsim tuaj kom peb muaj caij tig rov qab los mus ntsia tus kheej thiab hloov pauv. Thaum uas daim ntaub thaiv muab yaws lawm, peb yuav tsis lam cia tej qhov pob puas ntawd nyob yuav tau muab kho. Yuav tau ntsia kom pom thiab kam ntsib tej ntawd, vam khom Vajtswv lub zog los rhuav tshem tej ntawd tawm hauv peb lub neej mus, kom peb dawbhuv thiab hloov dua tshiab hauv Vajtswv lub xub ntiag.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply