Gơs tŭ lơi oh mi git lam gơnoar pran crih-crai tus bơh ală jơnau pơndom pơndiang sơl? Jơnau pơndom pơndiang rgơi gơlik gơs dô bơta gơchôl, bơtơl tai bơta pran kơldăng nang bol he in lòt gan bơta bă lĭa să tom dê. Bơh hơ̆, Yàng òs sùm ngui ală jơnau pơndom pơndiang gùt dar nang bơtơl pran tai bol he in, dọ̆ng bol he khin cha ntào di đap bơta gơlòng mơ lơh dô bă pran kơldăng. Hơ̆ la bơta mơ Yàng ngui nang dọ̆ng bol he kơ̆ nùs, kung bè bơt bơtao dô mpôl cau duh rngòt dọ̆ng kơl bal mơ gơp.
Ngai dọ, ngai 05/08/2024, Bơta Hòi Dăn Kờp Ngai dan jà jơh ală cau ơm iat kơlôi sơnơng bal Jơnau Yàng kơnom di bơta dọ̆ng kơl Rich Miller dê bơh tơnggume GƠNOAR PRAN JƠNAU PƠNDOM PƠNDIANG DÊ.
“Dăn ông lơh tĕ pran kơldăng mơ khin cha.” (Jôsuê 1:18)
Tom ală sơnam bơtê, añ neh kơnhơl ală bơta nang lơh pran să jan kung bè dô nă cau kơnhơl ò kơnhơl sùm. Ală cau tề lăm ò gơs tŭ lơi bơdơh chôl bol he pal bơtê bơta pran, bơtơl tai bơta pran kơldăng mơ lơh pran bơta kong jai. Bol khai chò-hop ngan tom tŭ sồr lòt gan ală rơnoas bè òs să tom bol he dê, mơ òs sùm “lơh kơnjơ̆” bol he mơ ală bơta bơtê pràn să jăn! Añ neh mòng ngan mơ ală tŭ oh mi tom mpôl nggà driau nang tom chôl bal mơ gơp gul ală jơ bơtê: “Guh tĕ”, “Pơnđơl pran tĕ, gam ming 5 nơm lơm”, “Bi ngan rgơi lơh”, “Bañ kong alah”… Ală jơnau driau gơtom chôl kư̆ nggà dơng ò tŭ lơi dơh wơl. Mơ tơm ală tŭ hơ̆, añ sền gŏ he pran kơldăng rlau mơ ală bơta añ kơlôi, tai bơh bơta pran kơldang mpôl dê neh gơchôl añ ò dơh pal ntoat hơđap.
Ală tŭ do, añ dòp git lah bơta mor drom bal behơ̆ tơm tŭ añ kơlôi sơnơng tap sơnròp sră Jôsuê. Digơlan oă cau tom bol he neh mong mơ tap sră do, krơi is tai la Jôsuê 1:8-9. Rlau mơ hơ̆, ur klau añ jê kung neh yồng seng tom do tom ơdŭ wă rò nac he dê:
“Sră bơta bọh-lăm dọ băñ ngai bơh di bơr mê, kơlôi sơnơng tĕ gơ ngai mơ măng, nang kơrhia lơh jat jơh ală bơta neh cih tơm hơ̆; lơh behơ̆ sông mê rơp geh bơtoah tom gung dà mê dê mơ gơlik công nha. Ăñ ò di neh ai jơnau gơnoăr sồr mê in ò ơ? Lơh tĕ pràn kơldăng mơ khin cha. Băñ kơndap kla; băñ gơplơ̆ nùs, bơh ăñ la Jehôwa Yàng Tom Trồ mê dê rơp ơm băl mơ mê tơm tiah mê lòt.” (Jôsuê 1:8-9)
Neh tus di tŭ ai lang bol Ysơrael lòt tiă nhiong Jôdan mơ dòp geh Tiah Yàng ho. Tŭ Môise ò gam tai, Jôsuê dòp geh gơnoar broă tề lăm lang bol mut tom dồ pah rài pa. Yàng Tom Trồ neh ho rơp ơm bal mơ Jôsuê kung bè Kơnràñ neh ơm bal mơ Môise, mơ Kơnràñ òs sùm pơndom pơndiang Jôsuê pal “pràn kơldăng mơ khin cha”, bal mơ hơ̆ ò tŭ lơi pơdơh kơlôi sơnơng Sră Bọh Lăm.
Jôsuê neh dòp geh jơnau đơs Yàng Tom Trồ dê, mơ ai gơnoar sồr ală cau at bồ rcang sir ceng lang bol Ysơrael mut hơ Canaan. Ông kung tơngkah ală cau gơrê mơ jơi bơtian Ruben, Gat mơ nggul jơi bơtian Manase bơh jơnau ho bol khai dê. Bulah bol khai neh sac rwah tiah đah hiong Jôđan nang lơh gơs srê brê, bol khai gam jơnau ho lòt bal mơ ală mpôl nang pha rlau mơ ală bơta gơlòng di đap, lai mơ tŭ rê wơl mơ hiu nhă.
Tom tŭ geh tơngkah bơh jơnau ho do, seng ho bol khai dê ceng wơl dô gơtha dơng màng mơ lai mơ tŭ hơ̆ añ ò tŭ lơi kơlôi: Bol khai tom ho rơp dọ̆ng kơl Jôsuê mơ jơh nùs don-sọ̆ng kung be bol khai neh lơh mơ Môise , lơh nên mơ ông lah:
“Cau lơi tơmdră mơ jơnau đơs ông dê, mơ ò don bơr lơh jat jơnau gơnoar-sôr lơi ông dê, gen cau hơ̆ rơp kọ̆ng tơnchơt. Dăn ông lơh tĕ pran kơldăng mơ khin cha!” (Jôsuê 1:18)
Oh mi đal git bơta lơi sơl? Bơta mơ bol khai đơs mơ Jôsuê kung la bơta mơ Yàng Tom Trồ neh đơs mơ ông, hơ̆ la “pran kơldăng mơ khin cha tĕ”. Hala đơs jat bơta đềt mềr rlau: “Pơnđơl pran tĕ, ông rơp rgơi lơh!” Yàng Tom Trồ ngui ală jơnau dọ nang pơndom pơndiang Jôsuê kơ̆ nùs, tò ông in pran kơldăng tề lăm Ysơrael dòp geh tiah mơ Yàng ho ai bol khai in.
Digơlan bol he đơs lah Yàng Tom Trồ đơs mơ Jôsuê la tơl rau nang pơndom pơndiang ông tai bơh dilah Yàng Tom Trồ ntào đah mơ bol he gen ñcau tomdră wơl mơ bol he taih? (Rôma 8:31). Bulah behơ̆, Kơnràñ neh sol pơnđàng nang jơnau pơndom pơndiang ală jơi bơtian loi Jôsuê in geh cih tom Sră Goh, bơh Kơnràñ sền gŏ bơta hơ̆ la kwơ màng bol he in.
Ñchi bơh tai? Tai bơh Yàng niam nùs ngui ală jơnau pơndom pơndiang jơh ală cau dê nang bơtơl pràn bol he in. Kờp nă bol he la dồ pơnah dơng màng tom să jan Kơnràñ dê, mơ tom tŭ dồ nùs bal gen bol he rơp sơlo ngai sơlo pran kơldăng rlau. Kơno Jơnau Yàng mơ hòi dăn la bơta pal cang, mơ ya gơs tŭ Yàng kung pơndom pơndiang bol he gan ală jơnau gơchôl, pơndom pơndiang ală cau gùt dar dê. Pò tĕ nùs dòp rò Yàng Hwềng Goh, nang đal git bơta tề lăm Yàng dê bơh ală jơnau pơndom pơndiang kờp ngai, oh mi yo!
Dan jà bol he dô nùs bal tòm bơta hòi dan:
Ưnngai Yàng tai bơh Kơnràñ sùm la tơm ryàs bơta pran kơldăng kòn dê. Dăn dọ̆ng kòn pò nùs dòn dòp ală jơnau pơndom pơndiang Kơnràñ ai, gan ală jơnau pơndom pơndiang jơh ală cau gùt dar kòn. Dăn Kơnràñ kung ngui kòn nang gơlik gơs cat pơndom pơndiang ală cau gùt dar in. Dăn bơta pran kơldăng Kơnràñ dê gơrề mơ sol pơnđang lam bă tiah gan rài kis kòn dê. Kòn jơh nùs hòi dan tom sơnđăn Yàng Jesu Krist, Amen.
Ơ jơh ală ông mò, oh mi koñ gơboh, ai tĕ ală jơnau gơchôl gùt dar gơlik gơs cat pơndom pơndiang, dọ̆ng kơl oh mi pran kơldăng mơ khin cha rlau kờp ngai. Bañ rngòt tơm pà bơta dòn mơ tơm chôl cau ndai, tai bơh dô nùs bal, bol he rgơi lơh ală bơta crih-crai. Kah tĕ lah Yàng rgơi ngui kờp jơnau đơs, kờp broă lơh oh mi dê nang tơnpơrgơl rài kis cau ndai dê, jat bè bơta rơndap niam ngan Kơnràñ dê! Ngai do, gơs cau lwoi pal cang kơno ală jơnau pơndom pơndiang oh mi di sơl? Oh mi rơp pơndom pơndiang mơ bơtơl pran tai bol khai in mbe lơi?
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply