Tòm tú roh bơta gơn kơnòm tòm rai kis kòp ngai, bol he òs sùm kơlôi rcang bơh ală ngai rơp tus mơ blai soh bơh di ală ngai neh sơrlèt rlau. Mơya gơs dô bơta ò tú lơi tòm gơl tòm rai kis he lah: Yàng la Bơtau hơđăng rlau jơh, rlau mơ ală tú tơngai, Kơnrẵn gơs dô bơta rơndap tap seng niam rlau jơh kòp nă cau in lài mơ tú cau hớ gơs mat tòm dunnia do. Kơnrẵn kung ho rơp sum sên gar bol he jơh rài.
Ngai do, ngai 09/08/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Lina Johnson dê bơh tơnggume: JƠNAU HO JƠL JƠH RÀI.
“Bañ kơlôi rcang bơh bơta lơi, mơya tòm jơh ală bơta ai tĕ jơnau hòi dan, rac dan, mơ bơta ưnngài mơ yal tơlik ală bơta kòñ dan he dê Yàng Tom Trồ in git. Gen bơta lơngap lơngai Yàng Tom Trồ dê, la bơta jòng rlau jơh ală bơta git wă, rơp sền gàr nùs mơ bơta kơlôi sơnơng oh mi dê tòm Yàng Krist Jesu.” (Philip 4:6-7)
Gơs tú lơi ồng mò oh mi lùp is lah: ẵn do la ncau? Ẵn do tus bơh tiah lơi? Hala jơi bơtian ẵn jê gơs cau lơi ndai tai sơl?
Hala gơs tú lơi ồng mò oh mi kơlôi bơh ală ngai rài tơnớ ò? Gơs tú ồng mò oh mi lùp is lah oh kòn he dê rơp gơlik gơs la cau mbe lơi? Hala rài tơnớ tòm jơi bơtian ẵn jê rơp mbe lơi?
Sră I Yal Yau sơntòm bơh dô nơm jơi bơtian – ẵn sên gó bơta do la niam ngan. Tú kơlôi sơnưng bơh di jơi bơtian do mơ ală jơi bơtian ndai tòm Sră Goh, bol he rơp gó dô jơi bơtian bơh di rai ồng Ađam tus dê rai Yàng Jesus Christ. Ẵn gó gơboh ngan bơh di ală bơta do bơh gơ la cơng tang lah Yàng Tòm Trồ la cau tòm tòm ală rai dê. Kơnrẵn git lai ală cau rơp gơs pơnah tòm bơta yal yau dơng ơnang do, mơ ală bơta rơp gơlik gơs mbe lơi. Rlau mơ hớ, Yal Tơlik 13:8 cih wơl bơh Yàng Jesus la “Belàt Kòn dê neh kong chơt.” Ală bơta neh geh lơh nên lài mơ tú ồng Ađam sa plai bơrkớu.
Yàng git ồng pang ẵn jê mơ jơh ală cau rơp gơs mat tơnớ ẵn. Kơnrẵn git jơh ală bơta neh gơlik gơs mơ rơp gơlik gơs.
Ală ngai rềp neh rlau, ẵn gó lah Yàng Hwềng Goh tề lam ẵn kơlôi sơnơng bơh ală jơnau ho tòm Sră Goh. Ală jơnau Kơnrẵn neh ho neh gơlik gơs di ngan rau – bơh Kơnrẵn ò kong kơryan bơh tú jơ ò, tú tơngai ò rgơi kơryan Kơnrẵn. Behớ, ală jơnau ho Kơnrẵn dê gơwèt mơ bol he neh geh wil tơl tòm tú do, tòm jơ do.
“Jơnau ho” jat jơnau Hy Lạp la epagelia, kung geh cih gơtha la “yal tơlik”. Gơwèt mơ ẵn, “jơnau ho” kung geh gơtha la bơta nền cê. Tú Yàng ho bơta lơi, bol he rgơi don nền bơh di ală bơta hớ. Kơnrẵn neh lơh sir rau. Bol he rgơi hòn chò tú bol he ò hềt gó ală bơta hớ gơlik gơs.
“Bañ kơlôi rcang bơh bơta lơi, mơya tòm jơh ală bơta ai tĕ jơnau hòi dan, rac dan, mơ bơta ưnngài mơ yal tơlik ală bơta kòñ dan he dê Yàng Tom Trồ in git. Gen bơta lơngap lơngai Yàng Tom Trồ dê, la bơta jòng rlau jơh ală bơta git wă, rơp sền gàr nùs mơ bơta kơlôi sơnơng oh mi dê tòm Yàng Krist Jesu.” (Philip 4:6-7)
Ồng mò oh mi gó behớ sơl? Ưnngài Yàng! Bơh bol he hòn chò mơ dòp git lah ală broă neh lơh sir rau. Bol he geh bơta lơngai bơh git lah Bèp bol he neh lơh jat ală jơnau ho Kơnrẵn dê.
Pa do mơ, hiu kòn ẵn jê tìp ồs sa. Ông mò oh mi git nchi bơh tài ẵn yal bơya do sơl? Bơh tòm dô poh lài, ẵn tus còp kon klau ẵn jê, tú sên gó gơtung mơ chi nàng guh hơđang mơ jur hơđơm, ẵn gơs dô bơta kơlôi sơnơng lah: “Dilah gơs bơta ồs sa , gơtung dô gơ sa mhar ngan”. Mơ ẵn hòi dan mơ tòm tú hớ lah: “Khoai Yàng, dilah gơs bơta lơi gơlik gơs, dan Yàng dong hiu nhă kon klau kon dê rgơi jur hơđơm lài mơ tú ồs sa.” Hớ la dô jơnau hòi dan liah, mơya ẵn git lah Yàng neh kơno jơnau hòi dan hớ ẵn jê. Tú ồs sa, kon klau mơ sau klau 10 kơnhai ẵn jê gam ơm tòm hiu. Kon ẵn jê gó ồs hơng bơh di mpồng dềt, khai mhar kwar sau klau ăn mơ ntoat dô. Bơtoah ồs mơ nhǔ ò hềt gơ rề dơng – bàr nă bol khai neh klàs. Ẵn dòn lah Yàng Hwềng Goh neh chồl ẵn hòi dan mơ sơnio kon klau ẵn in gó ồs hớ. Bàr nă bol khai neh lơngap lơngai.
Sră I Yal Yau ai he in gó Yàng Tòm Trồ la Bơtau sên gar ală jơi bơtian mơ ceng Yàng Jesus tus tòm dunnia do. Mơ Kơnrẵn kung rơp sên gar bol he. Ẵn git nên lah Kơnrẵn neh sên gar jơi bơtian ẵn jê bơh ồs hơng. Bol he dòn kơnòm di Jơnau Yàng – bơh Yàng Tòm Trồ la Bơtau don song mơ lơbơn niam.
Dan jà bol he dô nùs bal tòm bơta hòi dan:
Khoai Yàng, dan toh glài kon in bơh oă tú kon pin wil wơl mơ rung rang tòm bơta dòn di Kơnrẵn. Dan ai bol kon in sum dòn kơnòm di Kownrawxn, la Bơtau dơng rlau mơ tú tơngai mơ tú jơ, Bơtau git jơh bơh sơnròp tus lôi dut. Dan Yàng pò nùs kon, nàng kon git mơ dòn kơnòm di ală jơnau ho Kơnrẵn dê, git lah ală bơta hớ la bơta kớ nền mơ bol kon rgơi gơn kơnòm mơ hòn chò. Bol kon ưnggai Yàng bơh ală bơta Kơnrẵn neh lơh wil tơl bol kon in! Kon hòi dan tòm sơnđan Yàng Jesus Krist, Amen.
Ơ ală ồng mò oh mi kỡn gơboh, kừ kớ nùs mơ cơnđoà lòt tòm gung dà he, git lah ală ngai tơnớ ò git loh lang mơ ală ngai neh rlau ò jat nùs he kỡn, Yàng gam sên gar bol he tòm mpang tê kỡn gơboh Kơnrẵn dê. Kơnrẵn ho rơp rong siam mơ sên gar bol he, mơ jơnau ho hớ neh gơlik gơs di ngan! Hớ la ală bơt nền cê gam sum sum, la bơta dòn pơnđơl pràn he in tòm kòp tú. Dòn kơnòm té di bơta rơndap tap seng niam mơ Kơnrẵn neh rcang mơ kis gơn kơnòm tòm jownau ho Kơnrẵn dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply