Thaum Vajtswv nqes tes ua haujlwm hloov pauv koj lub neej uas tabtom nyob tiaj tus, thaum ntawd koj pheej yuav ua li cas? Koj puas yuav txais yuav txhua yam los ntawm lub siab nco tshav ntuj, koom tes rau Vajtswv tes haujlwm tshiab, lossis koj yuav nyob twjywm rau ntawm thaj chaw tso siab plhuav uas koj cim civ tsim rau koj tus kheej? Thiab Vajtswv xav kom peb ua li cas thaum uas Vajtswv nqes tes ua haujlwm rau hauv peb lub neej?
Hnub no, yog hnub 08/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Richard Spangler dhau ntawm Zaj kawm THAUM VAJTSWV UA HAUJLWM.
“Tus Tswv uas kav ib puas tsav yam, koj lub hwjchim thiab tus zog loj zog nchav tsim lub ntiajteb thiab lub ntuj; tsis muaj ib yam dabtsi nyuaj rau koj ua tsis tau li.” (Yelemis 32:17).
Peb thov Vajtswv kom Vajtswv ua haujlwm nyob rau hauv txhua seem ntawm peb lub neej, ntawm peb tus kheej mus txog peb tsev neeg, hauv peb lub nroog mus txog rau peb lub tebchaws thiab hauv lub ntiajteb uas dav li dav no. Tiamsis thaum Vajtswv ua haujlwm, peb txhua tus nyias ho coj nyias lawm ib yam sib txawv. Kuv pom tias muaj plaub yam uas peb ib txwm coj pheej tshwmsim:
Tib ib yog peb… khiav nkaum. Nyob hauv Khiavdim 20:18-21, cov neeg Yixalayees xav ntsib Vajtswv thiab tos kom Vajtswv tshwm los ntsib lawv. Thiab Vajtswv tau los saum roob ntsib lawv los ntawm qhov uas lawv xav tsis thoob thiab puv npo lub hwjchim.
Tiamsis lawv ho tso tseg thiab tsuas sawv deb deb xwb. Tseeb tiag lawv twb sau txhua yam thiab txav mus nyob rau lub tiajnrag sab tid lawm, cia Mauxes ntsib Vajtswv tib leeg xwb. Ntau tus neeg niaj hnub nim no kuj coj ib yam li ntawd. Thaum Vajtswv pib ua haujlwm lawv yuav nres twj ywm lossis txav deb deb Vajtswv tej haujlwm uas Vajtswv tab tom ua.
Thib ob yog: tso Vajtswv tes haujlwm tseg, ntau zaug tseem tsim txom cov neeg uas txais tej dej num ntawd. Piv txwv li cov pov thawj hlob, cov neeg Falixais thiab cov neeg Xadukais thaum ub. Cov neeg no lawv tsis txais yuav Tswv Yexus thiab Tswv Yexus cov thwjtim, lawv pheej coj raws li tej qub kevcai thiab tej kev xav yuam kev txog Vajtswv txoj kevcai. Lawv tus cwjpwm uas coj nruj no ua rau lawv thiaj tsimtxom Tswv Yexus thiab cov thwjtim tes haujlwm tshiab uas lawv tab tom ua. Nyuaj siab tshaj lawv rov qab tawm tsam yam uas lawv niaj hnub taij thov (Saib Tes Haujlwm 5:39). Txawm li los Vajtswv lub hwjchim tau nthuav tawm dhau ntawm Vajtswv Pawg Ntseeg thiab yeej huam vam los txog niaj hnub nim no.
Thib peb yog, tso dhau tej uas Vajtswv nqes tes ua. Lub ntiajteb no yeej ntsia ntsoov pom tej haujlwm uas Vajtswv ua dhau los ntawm keeb kwm, tiamsis lawv xaiv txoj kev qi muag ua tug tsab tsis pom.. Rau qhov yog tias muaj ib tug Vajtswv tab tom nqes tes rau tej uas tshwmsim nyob hauv ntiajteb no ces lub ntiajteb no tsuas muaj ob txoj kev xaiv xwb: Txais yuav thiab nrog Nws mus lossis ua tus tsis paub thiab ris teeb meem.
Yam kawg thiaj yog yam yog uas peb tsim nyog ua. Peb tsuas yog txais yuav Vajtswv tej haujlwm uas Vajtswv tab tom ua thiab koom tes rau hauv Vajtswv lub homphiaj, zoo li cov muaj kev ntseeg hauv Vajluskub Qub xws li – Aplaham, Mauxes, Daviv thiab ntau tus ntxiv. Nyob hauv Vajluskub Tshiab, cov thwjtim thiab cov ntseeg nyob rau Pawg Ntseeg xub thawj lawv kuj koom tes qhia txog tib yam no: Txawm yog yuav muaj kev txomnyem luaj twg los, lawv yeej zoo siab hlo nrog tus Tswv mus.
Niaj hnub nim no, qhov no kuj yog ib yam uas nyuaj rau peb yeej tsis txawv yav dhau los. Peb tau zoo rau tej yam uas peb tab tom muaj, thiab ib txwm swm txoj kev uas yus ib txwm ua, thiab txaus siab rau tej uas Vajtswv npaj ua ntej los lawm. Peb xav li no ces txaus lawm, thiab txog thaum uas Vajtswv ua haujlwm tiag tiag ces txoj kev xaiv ho nyob ntawm peb txhua tus.
Thaum tshawb nrhiav Vajluskub peb yuav pom muaj ib yam zoo: Vajtswv tsis rov qab ua ib qhov haujlwm qub. Muaj ib zaug Tswv Yexus samhwm kom dab tawm mus. Lwm zaug ntxiv, Tswv Yexus nug dab lub npe thiab ntiab dab tawm mus. Muaj ib zaug txawv yog Tswv Yexus cev tes kov tus neeg ntawd thiab kho nws zoo. Ib zaug ces Tswv Yexus siv qub ncaug xyaw moov av los kho. Lwm zaus ces Tswv Yexus tsa tes rau saum tus neeg tuag thiab siv lub suab mos muag hu sawv rov qab los. Ib zaug ntxiv Tswv Yexus siv lub suab hu muaj hwjchim rov ntxhia mus rau hauv qhov ntxa.
Niaj hnub no Vajtswv tseem tab tom rhuav tshem tej ciam uas peb cim civ tsim los rau Vajtswv. Peb txhua tus yuav tau sawv ntawm ib txoj kev txiav txim siab. Nyob twjywm ntawm qhov chaw ib txwm nyob, lossis yuav nrog tus Tswv mus, koom tes rau Vajtswv tej haujlwm tshiab.
Thov caw nrog kuv peb thov Vajtswv ua ke:
Tus Tswv, thov pab kom kuv txhob qi muag ua txuj tsis pom koj tej haujlwm. Thov Vajtswv qhib kuv lub hlwb, kom kuv txais yuav koj tej homphiaj tshiab uas koj coj los. Thov Vajtswv pab kom kuv muaj lub siab tawv nrog koj mus ua ke, koom tes rau koj tej haujlwm loj uas koj tab tom ua. Kuv thov hauv Tswv Yexus Khetos lub npe. Amees.
Cov kwv tij, ntev los no koj puas tab tom muaj tej kev xav, tej haujlwm qub qub uas tav Vajtswv lub hwjchim ua haujlwm zoo rau hauv koj lub neej? Peb tus Vajtswv yeej tsis raug tav los ntawm tib neeg ib txoj kev twg li. Nqua hu kom peb qhib siab los txais yuav ib kaujruam tshiab uas Vajtswv pub peb. Tawm hauv peb qhov chaw nyob tso siab thiab ua siab tawv nrog tus Tswv mus, kom thiaj tau koom tes nyob rau hauv Vajtswv lub homphiaj zoo kawg nkaus uas Vajtswv tseg rau koj thiab lub ntiajteb no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply