Dilah sa jan bol he dê pal cang ngùi sa hụch nàng geh ntào dờng, gen rài kis đah hwềng soan bol he dê kung behơ̆ sơl. Jơnau Yàng la nhòng bơcat ròng siam hwềng soan jơgloh tơrhìr, la Piang Lă Bơta Kis cèng tus bol he in bơta hừh hơh, bềng tơl mơ ò bơta lơi rgơi tòm gơl ò. Mơya tòm rài kis sơrbac sơrbang do, gơs tŭ bol he gơlơh ò ngac mat dê đap Jơnau Yàng mơ gơ hŭi lah bol he pal càng Piang Lă Bơta Kis ring pa kòp ngai. Bol he pal càng lơh ñchi lơi nàng nùs nhơm he dê bềng liu bơta jơgloh tơrhìr bơh Jơnau Yàng taih?
Ngai do, ngai 11/08/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Jordan Buntgen bơh tơnggume: PIANG LĂ BƠTA KIS DÊ.
‘Yàng Jesu đơs lah: “Di ngan, Añ đơs ngan mơ bol mê, ò di Môise neh ai bol mê in piang lă bơh đang trồ ò, mơya Bèp Añ ai bol mê in piang lă ngan bơh đang trồ. Bơh piang lă Yàng Tom Trồ dê la piang lă bơh đang trồ mù mơ ai bơta kis dunnia in. Behơ̆ bol hơ̆ đơs lah: “Ơ ồng, dan ai piang lă hơ̆ bol hi in sùm sùm.” Yàng Jesu đơs lah: “Añ la piang lă bơta kis dê, cau lơi lòt tus hơ Añ gen ò gơs tŭ lơi jơgloh, mơ cau lơi dòn Añ gen ò gơs tŭ lơi tơhìr. ‘ (Jang 6: 32-35)
Lòt gan ală nam kơnhai, añ neh lòt tis nrah kòp bă tiah nàng lòt jòi bơta hừh nùs bơh phan mơna. Gơs ală tŭ jơ liah ngan gơlơh añ in be la geh hòm gòi, mơya òhềt gơs tŭ lơi gơs hừh hơh nền ngan. Añ ò git hwềng soan añ jơgloh tơrhìr git nđò sơl, tus dê tŭ añ geh tìp Yàng Dong Klàs Jesu. Tŭ sền Jơnau Yàng, añ gŏ pràn hwềng bềng lìu, dô bơta pràn kơldang mơ lài òr añ òhềt git tus. Hwềng soan añ geh ròng siam bơh Jơnau Yàng – Piang Lă Bơta Kis mơ bơta kis hơ̆ bềng tơl tus dê jơh ală pơnah tòm rài kis añ jê.
Mơya rài kis kòp ngai gơlơh sơrbac sơrbang ngan gen gơlơh lu li lơmpiat ồs bơh sơn ròp tòm añ, mơ añ sờn tòm gơdùh tòm rài kis rngòt moat jrùng. Bơta sền Sră Goh kòp ring ang drim gơlơh be la dô bơta pal càng lơh wơl , mơ ò dê la bơta jơgloh tơrhir geh kis tòm bơta tơlik mat Yàng dê mơ gơcram tòm Jơnau Yàng. Añ hừh nùs mơ “piang lă” yau bơh ngai òr, mơya ò jòi jat Yàng kòp ngai nàng geh dòp rò bơta bơkah ring pa, bơta hòn chò mơ Jơnau Yàng cèng tus añ in.
Tòm tŭ jơ gơ rùc gơ hùc do, Yàng neh cèng tus dê gah añ ală cau gơboh gơbài dê Jơnau Yàng mơ lơh ò bat nàng tòm pà bơh ală bơta git wă jrô ndơp bol khai dê mơ añ. Bơta jak chài, àng loh mơ jơh nùs bol khai dê neh gơlik gơs bơta chồl bơtrut añ in, chồl bơtrut tòm añ dô bơta jơgloh tơrhìr dròm behơ̆. Hơ̆ la gùng dà mơ Bèp bol he ngùi ală cau duh rngòt mơ yò đo kòp nă. Añ gŏ lah nùs nhơm añ neh geh tòm gơl, bơh ò ơn nùs ơn tôr mơya jơ do gơboh gơ bài ngan mơ Jơnau Yàng. Ò dê mìng sền Sră Goh, mơya añ jơgloh tơhìr lah gơ ơm cih jrô tòm hwềng nùs añ jê, gơlik gơs bơta ròng siam nền ngan hwềng soan añ. Behơ̆ gen añ rac dan Yàng dong añ ò tŭ loi hừh nùs mơ “piang lă” yau ngai òr dê ò, mơya pal sùm jơgloh tơrhìr geh sa liap Piang Lă Bơta Kis pa kòp ngai, kung be kơp kòñ git wă Yàng sơlo jrô ndơp rlau tai kòp ngai.
‘Añ đơs tai mơ bol mê, dan tĕ, rơp ai; jòi tĕ, rơp bàn; teh tĕ, rơp geh pò bol mê in. Bơh dilah cau lơi dan gen geh, cau lơi jòi gen bàn, mơ cau lơi teh gen geh pò khai in. ‘ (Luka 11:9-10)
Bơta gơboh gơbài añ jê gơ wèt mơ Jơnau Yàng sơlo ngai oă rlau kòp ngai, mơ añ kung sơn tòm wă wờng bơta nền ngan bơta jơgloh tơrhìr Yàng! Kòp ngai, añ kơp gơn Bèp Hơđang Trồ ai pà añ in bơta jak chài, bơta wă wờng mơ hừh nùs, tŭ añ tus mơ Yàng gan dê Jơnau Yàng. Bơta sền Sră Goh jơ do ò dê la dô bơta pal càng lơh tai ò mơ lah phan sào bơkah, bă tiah añ geh tìp Yàng mơ geh ròng siam mơ Piang Lă Bơta Kis.
‘Yàng Jesu đơs lah: “Di ngan, Añ đơs ngan mơ bol mê, ò di Môise neh ai bol mê in piang lă bơh đang trồ ò, mơya Bèp Añ ai bol mê in piang lă ngan bơh đang trồ. Bơh piang lă Yàng Tom Trồ dê la piang lă bơh đang trồ mù mơ ai bơta kis dunnia in. Behơ̆ bol hơ̆ đơs lah: “Ơ ồng, dan ai piang lă hơ̆ bol hi in sùm sùm.” Yàng Jesu đơs lah: “Añ la piang lă bơta kis dê, cau lơi lòt tus hơ Añ gen ò gơs tŭ lơi jơgloh, mơ cau lơi dòn Añ gen ò gơs tŭ lơi tơhìr. ‘ (Jang 6: 32-35)
Dan jà bol he dô nùs bal tòm bơta hòi dan:
Ưn ngài Yàng neh ai pà kòn in Sră Goh, la Piang Lă Bơta Kis ròng siam hwềng soan kòn. Dan Yàng lơh pa sùm tòm kòn bơta gơboh gơbài gơ wèt mơ Jơnau Yàng. Dan tam tòm nùs kòn bơta jơgloh tơrhìr Yàng, kòñ gơboh bơta jòi bàn Yàng, nàng kòn sơlo ngai git bơh Yàng dô bă jrô ndơp rlau, mơ kòñ gơboh Yàng rlau tai mơ kis niam jat nùs kòñ Yàng kòp ngai tòm rài kis kòn dê. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, ồng mò oh mi gơlơh jơgloh tơrhìr dê Jơnau Yàng sơl? Hala ồng mò oh mi mìng lơh jat be broă pal càng lơh kòp ngai taih? Lòi tĕ tŭ jơ nàng pò nùs mơ Yàng, hòi dăn ală bơta pal càng ồng mò oh mi dê, jào phi Yàng in ală bă tiah ò bềng tơl, lơbơn lơño hala bơta ò ơn nùs ơn tôr tòm đah hwềng he dê. Jơnau Yàng lah Piang Lă Bơta Kis rơp lơh hừh nùs ală bơta jơgloh tơrhìr tòm tiah jrô ndơp rlau jơh bol he dê ròng siam rài kis ồng mò oh mi gan dê bơta kòñ gơboh mơ jơnau song. Jơ do, ồng mò oh mi rcang sir nàng dòp rò Jơnau Yàng – Piang Lă Bơta Kis ring pa kòp ngai sơl?
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.