Oă cau rngòt bơta klam jơngo. Klam jơngo gơ sùm pun ndơp ală bơta sơrbơng gơrwang, mơ bol he pal cang ngan bơta àng lam gùng. Digul dunnia klam jơngo bìng tôì-glài gơrwang, bơta àng bơh đăng jòng Yàng Dong Klàs Jesu dê la ồs đèng ò tŭ lơi kăl, dọ̆ng bol he pơnđang sol gùng lòt, tơnroh jơh ală bơta rngòt rngơt mơ lăm gùng bol he tus hơ tiah ring lơngai.
Ngai do, ngai 13/08/2024, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dọ̆ng kơl Dayna Lovelady bơh tơnggume TƠNROH BƠTA RNGÒT KLAM JƠNGO.
“Añ la bơta àng dunnia dê; cau lơi jat añ gen ò gơs tŭ lơi lòt tom bơta klam jơngo, mơ ya gơs bơta àng bơta kis dê.” (Jang 8:12)
Bol he git lah kơnòm dềt òs rngòt klam jơngo. Gơs tŭ, mìng dô gơn-ru ôi ao hŭi hơđơm tiah kung rgơi gơlik gơs la dô nơm phan poan jơng jañ bơsak rngòt rngơt ngan tơm dơngoh kơlôi ală kòn dê. Me bèp sùm la tiah sơnđìng lơngai ală kòn dềt in, ală kòn dềt sùm joi tus bol he di gul trồ mang, lòt rê̆ gan ală ơdŭ jơngo, mơ đơs òm mơ bol he lah: “Kòn rngòt ngan”.
Nang rgơi dọ̆ng kòn dòp geh lơngai rlau, añ òs ngui ồs đèng bĭc. Bơta àng lơbơn bơh đèng bĭc ò di mìng dŏng wàs jơh klam jơngo mơ kung dŏng kòn rgơi pleh klàs bơh ală bơta gơtơntus ò pal gơlik gơs, kung bè tom tŭ lòt tuh-dih tom trồ mang mơ ò gơtup jơng di ală phan, hala ală bài kơnìng mpông tom klam jơngo gơlơh kung bè dồ nơm phan jañ bơsak ngan lơi hơ̆.
Tom tŭ bol he dờng, klam jơngo ò gam la bơta tơn-iu tai kung be tŭ gam kơnom, mơ ya gơ kư pun prap ală bơta sơrbơng ò git lai dilah bol he ò git kơrhia. Gơs dơ̆, cal rbut neh lơh hiu añ jê roh ‘điện’, mơ añ pal ngui ồs đèng ‘pil’ sol pơnđang nang pleh klàs bơh gơtup hala gơpừ.
Tom tŭ tôi glài sih lam bơta klam jơngo tom dunnia, bol he pal dòn kơnom di bơta àng Yàng Jesu dê tò rgơi sền gŏ loh gùng lòt. Yàng bơto mpôl lang bol bơh gơnap gơnoar tom bơta àng Kơnràñ dê: “Añ la bơta àng dunnia dê; cau lơi jat añ gen ò gơs tŭ lơi lòt tom bơta klam jơngo, mơ ya gơs bơta àng bơta kis dê.” (Jang 8:12).
Yàng Jesu kung bè ồs ‘đeng’ tề lam gùng, la bơta àng pơnđang sol kờp cơnđoà lòt bol he dê digul dunnia klam jơngo do. Kơnràñ la tơm ryàs bơta àng jơh plai ù in, mơ tom tŭ bol he lòt jat Kơnràñ, bol he kung rơp geh tề lăm bơh bơta àng hơ̆-Jơnau Yàng la mpàn sơnio gùng, dŏng bol he dòp git đah mơ sac rwah di ngan gùng pal lòt. Kung bè jơnau Đơs Crih 119:105 cih lah: “Jơnau Yàng la ồs đèng jơng añ ĭn, la bơta àng gùng dà ăñ jê.”
Dilah siău bơta àng Jơnau Yàng dê, bol he ngan rơp gơtup pừ tom bơta klam jơngo dunnia do. Mơ ya gơs bơta tề lăm Kơnràñ dê, kờp cơnđoà bol he di dòp geh sol pơnđàng mơ kơ̆- cê.
Dan jà bol he dô nùs bal tòm bơta hòi dan:
Khoai Yàng, dan bơta àng Kơnràñ dê gơlik gơs sơm-pòl ồs sol pơnđàng gùng kòn in digul dunnia klam jơngo. Tom tŭ klam jơngo gơrwang mơ bơta rngòt rngơt tùs, dan bơta àng Kơnràñ dê la tiah sơnđìng, la bơta pơndom pơndiang, la khel-đo sền gar kòn. Dan ai kòn in sùm geh rìng lơngai tom bơta àng bơh đang jòng Kơnràñ dê, mơ gơchồl kòn kơ̆ nùs lòt jat Kơnràñ jơh rài kis do. Kòn jơh nùs hòi dan tom sơnđan Yàng Jesu Krist, Amen.
Ơ jơh ală ông mò, oh mi koñ gơboh, tom tŭ oh mi pơnjat cơnđoà tom gùng lòt hơđap, lòi tĕ bơta àng Yàng Dong Klàs Jesu dê gơlik gơs ồs đèng tề lăm, la tom ryàs bơta pơndom pơndiang tom tŭ oh mi pal cang bơta sền gar digul ală bơta sơrbơng roh rài kis dê. Tom bơta àng bơta nđàc Bèp dê, dan oh mi in mơ añ joi ban bơta pràn kơldang nang pơnjat gùng lòt jat Yàng.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply