Vajtswv yeej xav ntsoov txog peb, tsis muaj ib zaum twg Vajtswv lub hlwb yuav txav deb ntawm peb. Vajtswv paub yam twg yog yam zoo tshaj plaws rau peb. Vajtswv txoj kev thiab Vajtswv lub tswv yim tib neeg yeej ntsuas tsis tau, tiamsis yam uas yuav txhawb peb zog ntawd yog Vajtswv txoj kev npaj thaum twg twb yog txoj kev npaj zoo.
Hnub no, yog hnub 17/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Esteban Castro dhau ntawm Zaj kawm LUB TSWV YIM KEV KAJ SIAB.
“Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej.” (Yelemis 29:11)
Muaj ib lub suab tawg nrov heev kwv yees kem li ob peb lub tsev, tej neeg ib ncig khiav qhov txhua chaw, ntshai, tsis paub tias nrov qhov twg tuaj. Yeej tsis muaj ib lo lus twg yuav los piav tau qhov xwm txheej no txog rau thaum uas cov tub rog tua taws tuaj txog lawv mam qhia paub tias qhov uas tawg li ntawd yog vim gas tawg hauv ib lub tsev ze ntawd.
Kuv pheej mus khiav dhau ntawm no. txog rau niaj hnub no, qhov chaw no yeej tseem muaj kev puas tshuaj loj, ib ncig ntawd lawv muab xov cia tsis pub neeg mus ze. Tiamsis ob xyoos dhau los, kuv siv zog kom ntiav tau qhov chaw no, tiamsis ua tsis tau. Lub sijhawm ntawd, muaj ntau yam ua rau txoj kev ntiav lub tsev no dhau los nyuaj ntiav. Thaum kawg, kuv thiaj tso tseg tsis ntiav, nrog txoj kev yws.
Tamsim no lub tsev no yog ib txoj kev ceeb toom tseg rau kuv tias: Yooj yim rau peb tsis pom txog Vajtswv lub homphiaj tseg rau peb lub neej – zoo li nyob hauv zaj xwm txheej no, Vajtswv tau pab rau kuv zam dhau qhov uas tsis ntiav lub tsev no kom thiaj tsis ua teeb meem rau kuv. Kuv xav ntiav lub tsev ntawd, tiamsis Vajtswv paub ua ntej thiab tsis teb kuv tej lus thov. Vajtswv ua txhua yam nyob hauv Vajtswv txoj kev zoo kawg nkaus: ntau tus ntseeg Vajtswv lawv tau muaj cov lus pov thawj ciaj sia ua tim khawv qhia txog txoj kev uas Vajtswv cawm lawv dim ntawm tej teeb meem, thiab tej uas kuv nyuam qhuav ntsib dhau ntawd, kuj pab rau kuv pom txog Vajtswv lub homphiaj npaj tseg rau kuv lub sij hawm ntawd. Ntau zaug peb yij fab yij fwj tsis tsom ntsoov rau lub homphiaj uas Vajtswv npaj tseg rau peb. Zoo heev Vajtswv txojlus yog tej lus ceeb toom thiab taw kev rau peb.
Nyob hauv 2 Xwmtxheej 25, peb nyeem pom cov Yudais tus vajntxwv Axas, yog tus uas tau txhij tau ib pab tub rog muaj zog heev thiab tseem ntiav cov neeg Yixalayees tsheej pua txhiab tus tub rog nrog rau peb txhiab kiv tooj. Tiamsis tom qab ntawd yawg ho txais tau ib yam uas tau sau nyob hauv nqe 7: “Tiamsis muaj ib tug cev Vajtswv lus tuaj hais rau vajntxwv hais tias, “Koj tsis txhob coj cov tubrog Yixalayees no nrog koj mus, rau qhov tus Tswv tsis nrog cov Yixalayees uas yog cov Efalayees”.
Thaum uas tau hnov xov txog kuj zoo ib yam li lwm tus, tus vajntxwv no xav zoj txog qhov nyiaj uas yawg tau them los ntiav pab tub rog yuav tab tom poob mus. Yawg thiaj nug Vajtswv tus neeg: “Tiamsis yuav ua li cas rau cov nyiaj uas twb them rau cov tubrog Yixalayees lawm? “Tus cev Vajtswv lus teb hais tias, “Tus Tswv yuav muab ntau tshaj tej ntawd rau koj!”
Yam uas peb kawm tau ntawm zaj xwm txheej no yog: Thaum peb ntseeg Vajtswv lub homphiaj, tej yam uas peb xav tias cuag li poob lawm ho dhau los muaj nqis. Qhov sib txawv ntawm no yog peb ntseeg Vajtswv zoo li cas xwb.
Cia li ntseeg Vajtswv thiab cia Vajtswv ua haujlwm saib Vajtswv txhais tes ua haujlwm zoo li cas, tas koj yuav pom tej uas peb muaj puav leej yog los ntawm Vajtswv txoj kev hlub xwb, yeej tsis yog los ntawm peb lub tswv yim ntawm tus kheej.
Tej no yog tej uas tau tshwmsim los raug rau vajntxwv Hauxeyas, tus uas yog Amaxiyas tus tub. Txawm yog twb mus ntaus yeej ntau ntsus tsov rog los, yawg ho yog tus swb nyob rau ntawm ntsus tsov rog tseem ceeb tshaj plaws: yog ntsus tsov rog nyob hauv yawg lub siab. Pauv qhov uas nthuav tawm lub siab nco Vajtswv tshav ntuj, tus uas ua rau yawg txais tau kev muaj yeej, Hauxeyas ho rov qab cim civ xav tias yawg yuav yog tus muaj yeej los ntawm yawg lub zog. Vajntxwv lub siab puv npo kev khav theeb txog qib uas yawg cim civ hlawv cov tshuaj tsw qab hauv tuam tsev, thaum kawg yawg yuav ris lub txim nyhav.
Thaum uas vajntxwv chim rau cov pov thawj hlob thiab tav tsis pub yawg hlawv xyab, ces yawg lub hauv pliaj cia li mob ruas (2 Xwm txheej 26:19).
Tiamsis thaum uas peb nyeem tshooj 27, hais txog vajntxwv Yauthas, uas yog Hauxeyas tus tub, peb ho pom yawg coj txawv yawg txiv. Vajluskub qhia paub tias yawg tsis mus rau qhov chaw dabwhuv uas yawg txiv tau ua, qhov no qhia paub tias yawg twb pom dhau yawg txiv qhov yuam kev, thiab Vajtswv thiaj muab nqi zog rau yawg. “Yauthas muaj hwjchim, rau qhov nws muab lub siab npuab tus Tswv uas yog nws tus Vajtswv” (2 Xwmtxheej 27:6). Vajntxwv Yauthas zaj xwm txheej ua rau peb nco tias: nyob ntawm Vajtswv, peb muaj cuab kav kho peb qhov yuam kev qub thiab xaiv ua yam yog, txawm yuav yog nyob rau lub caijnyoog twg.
Tig peb lub qhov muag mus rau ntawm Vajtswv lub homphiaj thiab tag siab ua raws li Vajtswv ua tus coj kev uas twb dhau los ua ib txojcai nyob rau hauv qhov chaw ua haujlwm CBN hauv Mexico. Peb muaj tsheej txhiab zaj xwm txheej yuav ua tim khawv qhia txog Vajtswv txoj kev ncaj ncees. Ib tug neeg uas mloog Tswv Yexus lus yuav muaj cov pov thawj zoo qhia txog Vajtswv. Koj zaj lus tim khawv yog dabtsi? Ntawm kuv tus kheej, ntawd yog qhov uas kuv tau tiv thaiv tsis raug qhov tawg ntawd kub.
Thov caw nrog kuv peb thov Vajtswv ua ke:
Tus Tswv, ntau zaug kuv tsis nkag siab Vajtswv lub homphiaj tseg rau kuv, tiamsis kuv paub tias Vajtswv ua haujlwm nyob hauv Vajtswv lub homphiaj zoo. Thov kom thaum tej kev txomnyem thiab kev sim siab ntawd dhau mus kuv yuav muaj kev ntseeg ntxiv thiab paub koj txoj kev ncaj ncees yog zoo thaum uas kuv mus raws li Vajtswv ua tus coj kev.
Kuv thov hauv Tswv Yexus Khetos lub npe. Amees.
Cov kwv tij txhua tus, txhob maj rawm nroo thiab nyuaj siab rau koj tej homphiaj tej kev npaj uas tsis raws li siab xav, vim paub tias Vajtswv muaj yam zoo tseg rau koj. Nyob rau hauv koj txoj kev txiav txim siab, yuav tau nrhiav Vajtswv kom txais tau Vajtswv ua tus coj kev uas yuav tsis ua rau koj hnov khuv xim, vim paub tias koj tau xaiv mus raws li txoj kev uas Vajtswv xav kom koj mus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.