Nyob ntawm tej kev sim siab thiab kev txomnyem vij puas ncig hauv lub neej, peb yooj yim tsis ntseeg siab thiab ua xyem xyav rau Vajtswv txoj kev hlub. Tiamsis, muaj ib qhov tseeb uas tsis muaj hnub hloov pauv ntawd yog: Vajtswv yog kev hlub, thiab Vajtswv hlub peb tsis yuav dabtsi. Yog li peb yuav tau ua li cas kom thiaj ntseeg thiab qhib siab los txais yuav Vajtswv txoj kev hlub uas tsis muaj nrim?
Hnub no, yog hnub 19/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Schultz dhau ntawm Zaj kawm VAJTSWV TXOJ KEV HLUB ZOO KAWG NKAUS LI.
“Kuv qhia koj lub npe rau lawv paub lawm, thiab kuv tseem yuav niaj hnub qhia lawv kom lawv muaj txojkev hlub uas koj hlub kuv nyob hauv lawv, thiab kuv yuav nyob hauv lawv” (Yauhas 17:26).
Cov lus kawg nkaus ntawm ib tug neeg ua ntej uas lawv tuag yog tseg rau tej menyuam lawv tej qub txeeg qub teg. Cov lus ntawd yuav nthuav tawm lawv lub siab thaum kawg.
Peb pheej xav paub cov neeg muaj koob nto npe cov lus thaum kawg yog dabtsi. Nyob rau ib txoj kev sib tham ntawd, xibhwb Billy Graham tus ntxhais, niam xibhwb Ann Graham Lotz, qhia paub tias nws tus yawg cov lus kawg tseg rau tus menyuam ntxhais xeeb 11 xyoos, thaum uas tus ntxhais xeeb hais tias nws hlub yawg heev. Xibhwb teb tias: “Yawg kuj hlub nws thiab”. Kuv nyiam yawg tej zaj lus qhuab qhia. Yawg niaj hnub qhia Vajtswv txojlus txog tias “Vajtswv hlub koj” nrog rau tej lus ntawd cuag li nkag ncaj nraim mus rau hauv kuv lub siab.
Ua ntej uas yuav tag sim neej, Tswv Yexus hais rau cov thwjtim tias Nws yuav rov qab mus cuag leej txiv, thiab yuav pub Vaj Ntsujplig los nrog lawv nyob coj lawv mus rau hauv qhov tseeb (Yauhas 14:12-17).
Ntawm no yog tej lus tseem ceeb yuav tau nco ntsoov.
Qhov tseeb uas Tswv Yexus hais nyob hauv Yauhas 17:23 chwv txog kuv lub siab:
“Txiv txib kuv los, thiab txiv hlub lawv ib yam li txiv tau hlub kuv.”
Qhov no cheem tsum yuav tau xav thiab nco ntsoov Leej Txiv saum ntuj hlub koj ntau ib yam li Vajtswv hlub Nws tib leeg tub, uas yog Tswv Yexus. Cov phooj ywg, ntawm no yog txoj kev hlub loj thiab zoo kawg nkaus uas kuv ntseeg tias Vajtswv xav kom kuv nco ntsoov hauv siab!
Tej zaug peb cov no muaj ib txhia yeej tseem tsis tau saj txoj kev hlub uas peb ntshaw, xws li niam txiv txoj kev hlub, txij nkawm kev sib hlub, menyuam kev hlub thiab phooj ywg kev hlub. Qhov no tej zaug yuav ua rau peb ua xyem xyav, ua rau peb tsis kam lees thiab txais yuav Vajtswv txoj kev hlub. Tiamsis tseeb tias Vajtswv tus muaj sia nyob niaj hnub hlub koj thiab kuv! Vim Vajtswv yog kev hlub, kuv cia siab tias koj yuav paub tias Vajtswv hlub koj ntau heev! Vajtswv txoj kev hlub tseg rau koj yog kev hlub dawbhuv, ncaj ncees, nyob mus ib txhis. Loos 8:38-39 hais meej meej tias yeej tsis muaj dabtsi yuav cais tau peb tawm ntawm Vajtswv txoj kev hlub. Ntawm no yog txoj xov zoo tseg rau tib neeg ntiajteb!
Thov Vajtswv pub Nws txoj kev hlub rau peb kom peb pom txog qhov no. Muaj ib tug xibhwb zaj lus qhuab qhia tau ua rau kuv nco ntsoov mus li tias: Vajtswv hlub koj ntau dua tej hnub qub saum nruab ntug thiab ntau tshaj tej suab zeb hauv hiav txwv sau los ua ke.”
Tej zaug yuav muaj tus xav tias: “Kuv saj tsis tau Vajtswv txoj kev hlub.” Tej zaug peb txoj kev xav tsis yog thaum twg twb yuav yog. Vajtswv yog kev hlub – raws li Vajtswv tej lus tau hais, thiab tej uas Vajtswv tau cog lus lawm ces Vajtswv yeej yuav ua. Kuv tab tom kawm hais rau kuv lub siab tias Vajtswv txoj kev hlub yog kev hlub zoo kawg nkaus, thiab kuv yuav tau ntseeg qhov tseeb ntawd. Thov kom peb txhua tus yuav pom qhov khoom muaj nqis uas Vajtswv pub no.
Nyob hauv Yauhas 6:38, Tswv Yexus hais tias:
“rau qhov kuv los saurn ntuj los tsis yog los ua raws li kuv lub siab, tiarnsis kuv los ua raws li tus uas txib kuv los lub siab nyiam”
Kuv pom tias Tswv Yexus tau tso ntuj ceebtsheej tseg, tso nws lub zwm txwv tseg vim peb – ntawm no yog ib qhov pov thawj meej rau Tswv Yexus txoj kev hlub. Txoj kev hlub tau nthuav tawm.
Kom txais tau Vajtswv txoj kev hlub rau tus kheej, Vajtswv nqua hu kom peb yuav tau ua Vajtswv tsaug. Yog li, kuv thiaj hais rau Vajtswv tias: “Leej Txiv saum ntuj, ua koj tsaug vim koj tau hlub kuv”. Kuv yim ua Vajtswv tsaug, qhov tseeb txog Vajtswv txoj kev hlub yim dhau los muaj tseeb. Kuv txhawb koj yuav tau xyaum ua li ntawd. Vajtswv hlub koj, hnub no mus txog ib txhis.
Nyob hauv Yauhas 17:26, Tswv Yexus hais rau cov thwjtim ua ntej nws yuav raug muab ntsia saum Ntoo Khaub Lig.
“Kuv qhia koj lub npe rau lawv paub lawm, thiab kuv tseem yuav niaj hnub qhia lawv kom lawv muaj txojkev hlub uas koj hlub kuv nyob hauv lawv, thiab kuv yuav nyob hauv lawv”
Thov kom Vajtswv txoj kev hlub ntws lug rau peb txhua tus lub nej.
Thov caw nrog kuv peb thov Vajtswv ua ke:
Ua Vajtswv tsaug vim koj hlub kuv thiab coj kuv mus rau hauv qhov tseeb ntawm koj tej lus. Thov qhib kuv lub siab kom kuv ntsia pom koj txoj kev hlub, tshwj xeeb yog tej lub sijhawm uas kuv tseem ua xyem xyav rau txoj kev hlub ntawd. Thov hliv kom puv nkaus rau peb tus ntsujplig los ntawm koj txoj kev hlub, kom peb muaj cuab kav hlub koj thiab hlub lwm tus tag siab. Kuv thov hauv Tswv Yexus Khetos lub npe. Amees.
Txawm yog muaj qee zaug peb yuav ua xyem xyav, los nco ntsoov tias Vajtswv hlub peb. ntseeg thiab qhib siab los txais yuav Vajtswv txoj kev hlub tsis paub tas. Vajtswv txoj kev hlub Vajtswv pub rau peb yog nyob mus ib txhis thiab tsis hloov pauv. Cia txoj kev hlub ntawd coj kev thiab ua kom peb rov qab muaj dua lub neej tshiab txhua hnub.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply