Digul ală bơta gơlòng bŏl glăr mơ kalke gut dăr tom rài kis, bŏl he buơn ngăn rọh bơta dòn mơ pin wil wơl bơta koñ gơboh Yang. Mơya, gơs dô jơnau sŏng ò tŭ lơi tomgơl: Yang la Bơtau koñ gơboh, mơ Kơnrẵn sum koñ gơboh bŏl git git nđợ. Behơ̆ gen, bŏl he càng lơh bơta lơi nàng sum dòn kơnòm mơ pò nùs dòp leng bơta koñ gơboh dờng ơnang Kơnrẵn di.
Ngai do, ngai 19/08/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Kathy Schultz dê bơh Tơnggume BƠTA KOÑ GƠBOH YANG KRƠI IS NGĂN GIT NĐỢ!
“Añ neh yal bol khai in git sơnđan Bèp, mơ rơp yal bol khai in git tai, tồ bơta kòñ gơboh Bèp neh kòñ gơboh di Añ, ơm tòm bol khai, mơ Añ kung ơm tòm bol khai sơl.” (Jang 17:26)
Ală jơnau lồi dut dô nă cau lài mơ tŭ săng rài là sre bri bŏl khai lòi wơl ală cau koñ gơboh ĭn. Jơnau hơ̆ hơ wơl ală bơta kơlôi sơnơng lồi dut bŏl khai di.
Bŏl he òs koñ git jơnau lồi dut ală cau tiang pơnro la ñchi? Tom dô bơta lùp mơ ho ne, kọn ur Cau Gơnoăr Bơtô Billy Graham, Mò Ann Graham Lotz, ai git ală jơnau lồi dut bạp he di lòi wơl kọn sau ur 11 năm he di, tŭ khai đơs là khai koñ gơboh ồng oă ngăn. Cau Gơnoăr Bơtô Billy Graham ho wơl: “Ồng kŭng koñ gơboh so sơl”. Ăñ sum koñ gơboh ală jơnau Bơtô ồng di. Ồng sum Bơtô yăl jơnau “Yang koñ gơboh he!” bơh bơta dòn krăñ-cê, lơh ală jơnau hơ̆ be gơ tơmut sŏng tom nùs ăñ.
Lài mơ tŭ kŏng chơt, Yang Jesu neh đơs mo ală cau bơtê lah Kơnrẵn ri mơ Bèp, mơ Kơnrẵn rơp ai Yang Hwing Gọh ơm tom nùs bŏl khai, mơ tề lăm bŏl khai tom ală jơnau sŏng (Jang 14: 12-17). Do la ală jơnau dờng màng păl kah prap.
Jơnau sŏng Yang Jesu đơs tom Jang 17:23 sum ơm tom nùs ăñ:
“Bèp neh sồr Añ lòt tus, mơ Bèp neh kòñ gơboh di bol khai kung be Bèp kòñ gơboh di Añ sơl.”
Bơta do păl kơlôi sơnơng ngăn mơ kah prap – Bèp hơđăng trồ neh koñ gơboh he oă be koñ gơboh Kọn Dul Kơnrẵn di, la Yang Jesu Krist. Ơ ọh mi, hơ̆ la bơta koñ gơboh dờng mơ krơi is crih crài gen ăñ dòn lah Kơnrẵn koñ bŏl he kah prap tom nùs!
Digơlan gơs dô it nă tom bŏl he ò hềt geh lòt găn bơta koñ gơboh bŏl he òs kơp koñ, be bơta koñ gơboh bơh me bèp, ur klau, kọn ur kọn klau, hala bơyô. Bơta do rơp brồ gơs oă bơta pin wil wơl mơ oă bơta gơlòng bŏl glăr, lơh bŏl he ĭn kal ke nùs dòp git mơ wă rò doñ bơta koñ gơboh Yang di. Mơya jơnau sŏng la Yang Tom Trồ găm kis sum sum koñ gơboh he mơ ăñ ! Tai bơh să tom Yang la bơta koñ gơboh, ăñ kơp kỡn he git lah Kơnrẵn koñ gơboh he oă ngăn! Bơta koñ gơboh Kơnrẵn di gơwèt mơ bŏl he la bơta koñ gơboh sàng-gọh, sŏng-rĭng mơ găm sum sum. Rôma 8: 38-39 đơs nền lah ò gơs bơta lơi rơp cah is bŏl he bơh bơta koñ gơboh Yang. Do la jơnau Niam gơwèt dunnia ĭn.
Họi dăn mơ Yang ai bơta nđàc nàng bŏl he dòp git bơta do! Ală jơnau bơtô sôr dô nă cau Gơnoăr Bơtô ne lơh ăñ in kah sum: “Yang koñ gơboh bŏl he oă rlau jơh ală sơmăñ hơđăng trồ mơ jơh ală bràs hơđăng dà lềng tơrgòm wơl”.
Digơlan gơs cau kơlôi lah “Ăñ ò gơs geh bơta koñ gơboh Yang.” Digơlan nùs koñ bŏl he di ò tŭ lơi kŭng la di lơm. Yang Tom Trồ la bơta koñ gơboh – jat be jơnau Yang neh đơs, mơ ală bơta Kơnrẵn neh ho gen Kơnrẵn rơp lơh. Ăñ găm bơtê đơs is tom nùs lah bơta koñ gơboh Yang di la bơta koñ gơboh wil tơl, mơ ăñ rơp dòn kơnòm di jơnau sŏng hơ̆. Kơp kỡn kòp nă bŏl he rơp dòp leng phăn bàn kas màng mơ krơi is crih crài Yang neh ai pà.
Tom Jang 6: 38, Yang Jesu đơs lah:
“Tài bơh Añ bơh đang trồ mù, ò di nàng lơh jat nùs kòñ Añ, mơya lơh jat nùs kòñ Bơtau neh sồr Añ lòt tus.”
Ăñ dòp git lah, Yang Jesu neh săng lơgar hơđăng trồ, săng sơbàn gơklŏ tài bơh bŏl he – do la cơng tang lọh lang bơta koñ gơboh di Kơnrẵn ĭn. Bơta koñ gơboh wil tơl neh ràng tơlik.
Nàng dòp leng bơta koñ gơboh Yang di is he ĭn, Kơnrẵn họi sác ăñ ơn jơnau ưnngai Kơnrẵn. Gen behơ̆, ăñ đơs mơ Kơnrẵn : “Khoai Bèp Koñ Gơboh, ưnngai Kơnrẵn neh koñ gơboh kọn”Ăñ sơlơ ưnngai Yang, jơnau sŏng bơh koñ gơboh Kơnrẵn sơlơ gơlik gơs ngăn. Ăñ tơngkah he lòng tĕ lơh behơ̆. Yang sum sum koñ gơboh he, ngai do jơl tus sum sum.
Tom Jang 17: 26, Yang Jesu đơs bơh ală cau bơtê lài mơ tŭ Kơnrẵn kŏng pơng đin:
“Añ neh yal bol khai in git sơnđan Bèp, mơ rơp yal bol khai in git tai, tồ bơta kòñ gơboh Bèp neh kòñ gơboh di Añ, ơm tòm bol khai, mơ Añ kung ơm tòm bol khai sơl.”
Kơp kỡn bơta koñ gơboh Kơnrẵn sum sum bềnh lìu hơđăng kòp rài kis bŏl he.
Dan jà bol he dô nùs bal tòm bơta hòi dan:
Ưnngai Yang tài bơh Kơnrẵn sum òs koñ gơboh kọn mơ tề lăm kọn tom ală jơnau sŏng bơh Jơnau Kơnrẵn. Dăn pò nùs kọn nàng kọn rơp gŏ lọh bơta koñ gơboh Kơnrẵn di, lài ngăn la ală tŭ bŏl kọn găn pin wil wơl bơta koñ gơboh hơ̆. Dăn tuh bềnh đah hwing bŏl kọn bơh bơta koñ gơboh Kơnrẵn di, nàng bŏl kọn rơp koñ gơboh Kơnrẵn mơ koñ gơboh ală cau ndai jơh nùs. Kọn họi dăn, Ai sơnđăn Yang Jesu Krist, Amen.
Ơ ală ồng mò ọh mi koñ gơboh, bulah bŏl he rơp gơlơh pin wil wơl, kah tĕ lah Yang sum koñ gơboh bŏl he. Dòn kơnòm tĕ mơ pò nùs nàng dòp leng bơta koñ gơboh krơi is dờng Kơnrẵn di. Bơta koñ gơboh Yang ai pà bŏl he la sum sum mơ ò tŭ lơi tom gơl. Lòi tĕ bơta koñ gơboh hơ̆ tề lăm mơ lơh pa wơl rài kis bŏl he kòp ngai.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.