Lub ntiajteb niaj hnub nim no yim hnub yim nyob deb Vajtswv. Tib neeg muaj ntau yam uas lawv caum: koob npe, yam muaj nqis, nyiaj txiag, koob meej thiab ntau zaug yog lawv txoj kev hlub… yog li, Vajtswv tab tom nyob qhov twg hauv peb lub neej? Peb puas tseem pehawm Vajtswv nyob rau ntawm qhov chaw siab tshaj plaws hauv peb lub siab, lossis twb ua twjywm muab tso tseg cia txoj kev tsis khoom hauv ntiajteb no txeeb qhov chaw uas ib txwm yog Vajtswv li mus?
Hnub no, yog hnub 20/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maribel Ixcajoc Arevalo dhau ntawm Zaj kawm VAJTSWV TIB LEEG THIAJ YOG TUS TSEEB.
“Txojsia ntev dhawv mus ibtxhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los” (Yauhas 17:3).
Nyob rau lub ntuj muaj puv npo tej xov xwm, yooj yim ua rau peb yuam kev thiab khiav deb Vajtswv txoj kev hlub. Nyob hauv txoj kev ua neej khiav ceev thiab maj nroos li no, muaj ntau qhov chaw vam meej tshiab tuaj, txoj kev hlub tseg rau tej khoom ntiajteb, txoj kev xav ua lub neej zoo, xav muaj nyiaj ntau, muaj koob npe, muaj hwjchim thiab ntau yam tau maj mam hloov pauv Tswv Yexus qhov chaw hauv ntau tus lub neej. Ntau zaug peb tej neeg txheeb ze lossis tej phooj ywg kuj dhau los ua ib qhov ua rau peb xav ntau, ua rau peb yim hnub yim khiav deb Vajtswv – yog tib tug tus Vajtswv xwb thiaj yog tus tseeb.
Nyob rau hauv keeb kwm haiv neeg Yixalayees, muaj ntau zaug lawv tsis mloog Vajtswv lus thiab pe lwm tus vajtswv. Hais tiag mas, txawm yog leej twg lossis ib yam dabtsi twg yooj yim txeeb Vajtswv qhov chaw hauv peb lub siab. Sim xav saib yog tias qhov teeb meem no pheej nthuav deb mus ntawm lub nroog no txog rau lub nroog tod, tebchaws no txog lwm lub tebchaws, ces lub ntiajteb no yuav dhau los ua ib lub ntiajteb tsis muaj Vajtswv.
Phau II Xwm Txheej sau txog zaj xwm txheej uas hais txog cov neeg Yudais tus vajntxwv Yauxiyas. Nws xyaum raws li nws yawg koob Daviv tus qauv, rhuav tshem tej chaw teev dab, thiab muab Vajtswv tso ua ntej. Thaum uas nws rov qab kho lub tuam tsev, thawj zaug vajntxwv nrhiav tau Vajtswv phau ntawv kevcai thiab sau tej lus cia rau hauv. Yawg hais los ntawm txoj kev mob siab: “Nej cia li pab kuv thiab cov neeg uas tseem nyob hauv tebchaws Yixalayees thiab tebchaws Yudas nug tus Tswv txog tej lus hauv phau ntawv saib qhia li cas? Tos tus Tswv chim heev rau peb los twb yog peb cov yawgkoob tsis mloog tus Tswv tej lus thiab tsis ua raws li tej lus uas sau rau hauv phau ntawv no kom yuav tsum tau ua.” (2 Xwmtxheej 34:21).
Yauxiyas pom tias txawm yog yawg twb ntseeg Vajtswv tag yawg tiam neej los, yeej tseem tshuav tiam txuas ntxiv yuav tau pab. Yawg maj nroos, ib yam li peb pom nyob hauv Vajtswv txojlus tau hais rau yawg dhau ntawm nqe 27: “koj lees koj tej kev txhaum thiab txo hwjchim tabmeeg kuv, koj quaj tu siab nrho thiab dua rhe koj lub tsho, thaum koj paub hais tias kuv yuav rau txim rau lub nroog Yeluxalees thiab cov neeg huv tibsi. Kuv twb hnov koj tej lus thov lawm.”
Yawg tus cwjpwm txo hwjchim rau Vajtswv tej lus tau ua ib tug qauv zoo rau cov neeg Yixalayees, coj sawv daws tig rov qab los sib cog lus ua ke nrog Vajtswv dua thiab tau cawm dim ntawm txoj kev puas tsuaj.
Peb cim civ nug tias: “Tsis paub yus puas tab tom cia ib yam dabtsi twg txeeb Vajtswv qhov chaw mus lawm?” Mathais 6:21 sau: “Rau qhov nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd” Txawm yog yuav yog dabtsi los cia siab tias peb yuav maj nroos hloov thiab coj li Yauxiyas, thov Vajtswv hloov pauv thiab pub rau peb muaj dua ib txoj kev tshiab. Ib yam li Yauxiyas, Vajtswv siv koj thiab kuv los khaws tseg tej qub txeeg qub teg, ua qauv rau tiam txuas ntxiv tau xyaum kawm thiab tshaj tawm Vajtswv txojlus.
Nyob rau CBN Guatemala, peb ntsia pom ib qhov kev mob siab: cov thawj coj, cov qhia ntawv, thiab ntau zaug cov ua niam ua txiv – tsis muaj leej twg quav ntsej lawv tej menyuam. Yog tsis qhia Vajtswv tej lus rau, cov menyuam tej zaug lawv yuav loj hlob nrog txoj kev luab nuj luab nqi, quav yeeb, xyaum pe mlom thiab ua lub neej txij nkawm puas tsuaj. Ntawm no yog qhov uas peb yuav tau coj txoj kev cawmdim thiab kev cia siab mus pub rau lawv dhau ntawm phau ntawv Quyển Sách Thần Kỳ hauv CBN mus kom txog rau txhua lub zos. Peb xav kom tom ntej no, Guatemala yuav yog ib haiv neeg pehawm ib tug Vajtswv tseeb, tsis yog ib lub tebchaws pemlom.
Vajtswv tej lus cog tseg zoo kawg nkaus pub rau peb yog: “yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua” (2 Xwm txheej 7:14). Peb txhua tus nyias yuav tau tuav nyias tej lus cog tseg no kom ruaj, tso kev txhaum tseg thiab nrhiav Vajtswv, koom tes ua ke los ntawm lub siab thiab ntsujplig, coj Txojmoo Zoo mus qhia rau txhua qhov, txhua lub nroog, txhua lub tebchaws.
Cia li thov Vajtswv coj koj kev kom dhau los ua ib tug neeg coj txoj kev hloov pauv rau ntawm qhov chaw uas yus nyob. Peb pib koom tes hauv Pawg Ntseeg thiab kawm ua raws li Vajtswv tej lus hauv zej zog.
Thov caw nrog kuv peb thov Vajtswv ua ke:
Tus Tswv, kuv ua koj tsaug rau koj txoj kev hlub pub dawb uas niaj hnub ntws los rau kuv lub neej. Nyob rau tej kev ntxeev ntxias thiab kev simsiab hauv lub neej tamsim no, thov Vajtswv koj pab kom kuv nco ntsoov koj thiab tuav txoj kev ntseeg kom ruaj. Thov Vajtswv koj pub lub zog rau kuv kom kuv tiv dhau tej kev sim siab hauv sab nqaij tawv, koob npe thiab hwjchim, kom kuv muab koj tso ua ntej, nyob hauv kuv txhua txoj kev txiav txim siab thiab ua haujlwm. Thov coj kuv txhua txoj hau kev uas kuv mus, kom kuv ua lub neej raws li Vajtswv koj lub siab nyiam thiab dhau los ua qhov kaj rau tej neeg ib ncig. Kuv thov hauv Tswv Yexus Khetos lub npe. Amees.
Cov kwv tij txhua tus, nyob rau hauv lub ntiajteb uas khiav raws khoom ntiajteb huam vam li no, txoj kev nrhiav Vajtswv thiab kom muaj kev sib raug zoo ua ke nrog Vajtswv dhau los tseem ceeb heev. Tseg sijhawm los mloog thiab txais yuav Vajtswv kev tshwm ntsej muag hauv peb lub neej txhua hnub, cia Vajtswv coj peb tiv dhau tej kev sim siab thiab ntxeev ntxias. Thaum ntawd, peb thiaj yuav ua tau lub neej zoo, tshaj tawm Vajtswv txoj kev hlub mus rau txhua tus puav leej paub txog, thiab cia txoj kev ntseeg muaj nqis ntawd pub rau ntau tiam tom qab.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply