Dà lơgar gơlơh be sơlo ngai sơlo ngài mơ Yàng rlau. Kòn mơnus rài do gơs oă bơta nàng jòi jat: bơta cồng nha, bơta gơs kwơ, jền priă, tiang pơnrơ mơ tian gơs la bơta chò hòp chò hòn…. Behơ̆ gen, digơlan Yàng ơm tòm bă tiah lơi tòm rài kis bol he tiah? Bol he găm yò tơngguh Yàng tòm tiah jơnhoa rlau jơh tòm nùs he, hala ờm ờm neh lòi ală bơta kơlôi rcang dunnia dê tòmpìt ai bă tiah òs gơrê mơ mìng dô nă Yàng he dê lơm ?
Ngai do, ngai 20/08/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Maribel Ixcajoc Arevalo bơh tơnggume: YÀNG TOM TRỒ SONG NGAN MƠ GƠS MÌNG DÔ NĂ LƠM.
‘Bơta kis gam sùm sùm la dòp git Bèp, la Yàng Tom Trồ song ngan mơ gơs mìng dô nă lơm, bal mơ Jesu Krist mơ Bèp neh sồr lòt tus. ‘ (Jang 17:3)
Tòm dunnia bềng tơl jơnau yal tơnggit, gen buôn ngăn nàng gơlơh bol he in lòt tìs gùng mơ lòt ngài bơh bơta kòñ gơboh Yàng dê. Digùl bơta kis sơrbac sơrbang mơ oă ngan broă rài do, gơwèt mơ oă ngan bơta sền gŏ “rài do” pa ngan, bơta kòñ gơboh gơwèt mơ ală phan mơna, bơta kis pasgơs, jền priă, tiang pơnrơ, gơnap gơnoăr mơ oă bơta ndai tai neh sơlo tòm gơl tiah ơm Yàng Dong Klàs Jesu dê tòm rài kis oă cau dê. Tian gơs, ală cau gơp sa kòñ gơboh hala cau gơp bơyô kung rgơi gơlik gơs la ñchi lơh he ò ơn nùs ơn tồr, gơlơh bol he sơlo ngai ơm ngài mơ Yàng – Yàng Tom Trồ song ngan mơ gơs mìng dô nă lơm.
Tòm jơh pah rài làng bol Israel dê, gơs oă dơ̆ ò dòn bơr Yàng Tòm Trồ mơ duh khoai Yàng ndai. Đơs ngan lah, dô nă cau lơi hala bơta lơi kung rgơi buôn ngan nàng tòmpìt ai bă tiah Yàng dê tòm nùs nhơm he dê. Bol he kơlôi sơ nơng tĕ, dilah bơta do gơ sa rè bơh ƀòn dô tus ƀòn ndai, bơh dà lơgar do tus dà lơgar ne, gen dunnia bol he dê gơ rơp gơlik gơs dô nơm plai ù ò gơs Yàng.
Sră II Yal Yau yal wơl sèng yal bơh Bơtau Jôsia làng bol Juda dê. Òng neh jat krơh ồng pàng he dê la Bơtau Dabit, phà tơrlah ală cơnơng duh khoai mơ hiu duh khoai rùp ràk mơ yò tơngguh Yàng Tòm Trồ hơđang jòng rlau jơh. Tòm tŭ bơt bơtào wơl hiu duh khoai, lah dơ̆ sơnròp ồng Jôsia jòi bàn Dap Sră Boh Lăm mơ geh iat kơno ală jơnau geh cih tòm hơ̆. Ồng đơs tòm bơta moat jrùng lah: ‘“Lòt tĕ hòi lùp Yàng Jehôwa añ in mơ làng bol gam wơl tòm Israel mơ Juda in bơh jơnau neh cih tòm dap sră neh jòi bàn do. Bơta gơjrañ dờng Yàng Jehôwa dê rơp dùh hơđang bol he tài bơh ală ồng pàng bol he dê ò prap gàr jơnau Yàng Jehôwa dê, bol khai ò lơh jat tòm toh be jơh ală jơnau neh cih tòm dap sră do.” ‘ (II Yal Yau 34:21)
Jôsia đal git lah bulah ồng neh lòt jat Yàng tòm jơh rài kis, mơya ală bơta pal càng ălă pah rài dê pal lơh nền. Mơ ồng sơrbac sơrbang dòp rò jơnau, be bol he neh gŏ gan dê Jơnau Yàng đơs mơ ồng tòm sèng 27 lah: ‘‘Tài bơh nùs mê neh rcang sir nàng lơh jat mơ mê neh tơnliah să tòm mê di đap Yàng Tom Trồ tòm tŭ mê neh kơno ală jơnau Kơnràñ neh đơs tòmdră mơ tiah do mơ làng bol gơ dê, mơ tài bơh mê neh tơnliah să tòm mê di đap Añ mơ neh crè ào jrùh mê dê mơ ñìm di đap mat Añ, Añ neh kơno jơnau mê dê, Yàng Jehôwa đơs behơ̆. ‘ (II Yal Yau 34:27)
Bơta tơnliah să Bơtau Jôsia dê hơđap Jơnau Yàng neh gơlik cồng nha tus làm lang bol Israel, cèng tus bơta jơh tơl nă cau geh tòm gơllơh nền lòt jat Yàng mơ dong tă klàs bơh bơta chơt tơnroh.
Bol he pal càng lùp is: “Digơlan gơs bơta lơi tòmpìt ai bă tiah Yàng dê hala ò?” Tòm Sră Mathiơ 6:21 cih lah: ‘Bơh phan màng mê dê ơm tiah lơi, gen nùs mê kung ơm tềng hơ̆ sơl. ‘. Bulah bơta hơ̆ la ñchi, kơp kòñ bol he mhar dòp ho be Bơtau Jôsia, rac dan Yàng tòm gơl nùs nhơm, mơ ai pà bol he in dô sơntòm pa. Dròm be Jôsia, Yàng rgơi ngùi ồng mò oh mi mơ añ nàng lòi wơl bơta pơrdòn lòi wơl găm sùm sùm, gơs kwơ ală rài tơnơ̆ gan dê bơta bơtê mơ bơtô yal Jơnau Yàng.
Tòm CBN Guatemala, bol he neh gŏ dô bơta jê nùs nền ngan: bơh cau lăm bồ, cau bơtê mơ tian gơs ală cau lơh me lơh bèp – ò cau lơi kah kơ lôi tus cau kơnòm dềt. Dilah ò bơtê bơh Jơnau Yàng, ală cau kơnòm dềt rgơi ntào dờng gơwèt mơ ală bơta iơh bơh leng càn, nghiện ngập, lòt jat rùp ràk mơ pơnjat bơta tòm cah is tòm hiu nha. Hơ̆ la bơta ñchi bơ tài bol he lơh nền cèng Jơnau tơnggit geh dong klàs mơ gơn kơ nờm Yàng dê gan dê phim hoạt hình Quyển Sách Thần Kỳ CBN dê, lòt tus kòp ƀòn. Bol he kơp kòñ lah tòm pah rài tơnơ̆, Guatemala rơp la dô làng bol mìng duh khoai Yàng Tòm Trồ song ngan mơ mìng gơs dô nă lơm, ò dê la dô dà lơgar duh rùp rak ò.
Jơnau ho pơ gon ring niam mơ Yàng ai pà bol he in lah: ‘Dilah làng bol Añ jê la làng bol geh hòi mơ sơnđan Añ rơp tơnliah să bol khai dê mơ hòi dan jòi jat muh mat Añ mơ pơrlac sang gùng dà iơh bơsak bol khai dê, gen Añ rơp iat bơh hơđang trồ mơ rơp toh glài bol khai in mơ rơp sơmbòi lơgar bol khai dê. ‘ (II Yal Yau 7:14). Kòp nă tòm bol he pal sơmbat kơ̆ jơnau ho pơgon do mơ joi jat Yàng, dô bă bal mơ hwềng nùs mơ jơnau song, cèng Jơnau Niam tus làm kơnnhàl, làm ƀòn, làm dà lơgar bol he dê.
Rac dan mơ Yàng tề lam bol he gùng dà nàng gơlik gơs dô nă cau cèng bơta tom gơl tòm bă tiah he kis. Bol he rgơi sơn tòm gan dê bơta mut lơh broă tòm ală pơnah broă lơh Hiu Jum Goh dê mơ bơtê pơrsrăm gùng dà lơh jat Jơnau Yàng tòm ƀòn he kis.
Dan jà bol he dô nùs bal tòm bơta hòi dan:
Khoai Yàng kòñ gơboh, kòn ưn ngài Yàng tài bơh bơta kòñ gơboh ò càng ñchi lơi Yàng dê sum tuh bềng liu hơ đăng rài kis kòn. Di gùl bơta ơniai mơ gơ lòng bol glar rài kis rài do dê, dan Yàng dong kòl kòn sum kah tus Yàng mơ sơm bat kơ̆ bơta don. Dan ai pà kòn in bơta pràn kơl dang nàng lòt gan ală bơta ơniai bơh phan mơna, tiang pơn ro mơ gơ nap gơ noar nàng yò tơngguh Yàng hơ đăng rlau jơh tòm ală bơta lơh nền mơ bơta lơh lòt kòn dê. Dan Yàng tề lam kòn tòm kòp cơnđòa nàng kòn sum kis jat nùs kòñ Yàng mơ gơlik gơs la bơta àng ală cau ơm gùt dar war wĕ in. Kòn ai sơnđan Yàng Jesu Krist, hòi dan mơ Yàng Bèp. Amen.
.Ơ ală ồng mò oh mi kòñ gơboh, tòm dô dà lơgar ntoat jat phan mơna àng gơ crà, bơta jòi bàn mơ pơnjat bơta gơ tòm klac dềt mềr mơ Yàng gơlơh dờng màng ò git nđò. Lòi tĕ tŭ jơ nàng iat kơno mơ đal git bơta tơlik mat Yàng dê tòm rài kis kòp ngai., nàng Yàng tề lam bol he lòt gan ală bơta ơnai mơ gơ lòng. Mìng tŭ hơ̆, bol he mơ rgơi kis dô rài kis wil tơl, yal tơlik bơta kòñ gơboh Yàng dê tus dê jơh tơl nă cau in git mơ lòi wơl bơta dòn dờng màng ală rài tơnơ̆ in.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply