Gơs tŭ lơi oh mi hòi dan dan Yàng tup bư (chôl) mơ tơm pơrgơl nùs nhơm dô nă cau dê, mơ ya ơm gơn sùm mơ ò gŏ Yàng ho wơl? Gơs tŭ, bol he roh gơn kơnom mơ lùp is lah ñchi bơh tai Yàng ò lơh broă mo. Nên cê la Yàng ai kờp nă bol he in bơta khat gơboh, nàng sac rwah koñ gơboh Kơnràñ mơ duh broă Kơnràñ. Mơ ya tom tŭ pal cang, Kơnràñ rgơi tup bư nùs nhơm kờp nă cau lơi di lơm nang duh broă bơh tơnggu kwơ màng Kơnràñ dê.
Ngai do, ngai 21/08/2024, Bơta Hòi Dan Kờp Ngai dan jà jơh ală cau iat kơlôi sơnơng bal Jơnau Yàng kơnom di bơta dong kơl Beth Pathch bơh tơnggume CHÔL NÙS NHƠM.
“Ơ hơh! Jrô ndơp ngan ală bơta pas-gơs, bơta jak chài mơ bơta git-jak Yàng Tom Trồ dê! Ală bơta cahrña Kơnrañ dê ò gơs cau lơi was kơr, gùng dà Kơnràñ dê ò gơs cau lơi rgơi joi git!” (Rôma 11:33-34)
Tom Sră Goh, bol he oă dơ̆ sền gŏ Yàng Tom Trồ lơh broă tom nùs nhơm dô nă cau dê. Kung bè Pha-ra-ôn, Kơnràñ kung rgơi lơh bol khai in kơldang nùs. Bơta do rang tơlik gơnap gơnoar hơđang rlau jơh Yàng Tom Trồ Gơnap Gơnoar dê.
Tom dap sơnròp sră Esra, bol he geh yal tơnggit bơh bơtau Siru lơgar Persơ dê. Bơh ală jơnau neh geh cih tơm dap do, bol he gŏ dô bơtau lơh jat bơta rơndap Yàng Tom Trồ dê mơ ya ò dòp is he la “cau Yàng dê”.
Bơta yal yau geh cih tom Esra 1:1-3 bè do:
“Tom năm sơnròp rài at-bồ Siru bơtau Persơ dê, Yàng Jêhôwa koñ lơh gơlik di ngăn be jơnau Kơnràñ neh kơnom di Jeremi mơ đơs gen Kơnràñ chôl nùs Siru bơtau Persơ tơnggit gơs jơnau cih lah: Dọ la jơnau đơs bơtau Siru lơgăr Persơ dê: ‘Yàng Jêhôwa la Yàng Tom Trồ ơm hơđăng trồ neh ai ăñ in jơh ală lơgăr tom plai ù, mơ Kơnràñ neh pồ bơtào ăñ nang bơt dô nơm hiu duh khoai Kơnràñ in tom Jerusalem lơgăr Juđa. Dăn Yàng Tom Trồ ơm băl mơ cau lơi tom lang bọ̆l Kơnràñ dê tom gul bọ̆l mê mơ loi khai rê wơl hơ Jerusalem tom Juđa nang bơt bơtào hiu duh khoai Jehôwa Yàng Tom Trồ Israel dê la Yàng Tom Trồ ơm tom Jerusalem.”
Sră Goh pơnjat yal yau tom seng 5:
“Gen ală cau tom at-bồ hiu nhă tom Juđa mơ tom Benjamin, ală cau gơnoar ơn phăn duh khoai mơ ală cau Lebi, jơh tơl nă geh Yàng Tom Trồ chôl tom nùs gen rcăng sĭr nang lọ̀t tus mơ bơt bơtào hiu Yàng Jêhôwa dê tom Jerusalem.”
Tom pah rài do gơs oă bơta pal kơlôi: bơtau Siru lơh jat nùs koñ Yàng Tom Trồ dê, sơntom bơt bơtào hiu duh khoai Yàng Tom Trồ dê, mơ gơlik di ngan jơnau đơs hwơr bơh broă ală cau Juđa gơkol lòt lơh dĭ tom Babylôn rê wơl hơ Jerusalem. Bulah behơ̆, bơta lơh ăñ in kơlôi sơnơng oă rlau jơh la ƀroă Yàng chôl nùs bơtau Siru, ală cau gơnoar ơn phăn duh khoai mơ cau Lebi.
Nên-cê, ăñ neh oă dơ̆ hòi dan dan Yàng lơh broă tom nùs oă cau dê, mơ să tòm ăñ sơl. Ăñ koñ ngan sền gŏ nùs nhơm ală cau koñ gơboh geh tơm pơrgơl bơh Bơtau Krist, mơ oă dơ̆ ăñ moat-jrùng tai bơh ò gŏ Yàng dòp jơnau hòi dan ăñ jê. Yàng koñ bọ̆l khai gơs bơta gơtom klac di pal mơ Kơnràñ, behơ̆ ñchi bơh tai Kơnràñ ò bư di nùs nhơm bọ̆l khai dê? Mơ lòt găn oă bơta, ăñ dòp git lah Yàng ai gơnoar kòn mơnùs gơs bơta sac rwah khat gơboh.
Jơi kòn mơnus geh crơng gơs nang koñ gơboh Yàng, mơ ya Kơnràñ ò bơklơn bọ̆l he pal koñ gơboh Kơnràñ. Kơnràñ rgơi lơh bơta hơ̆, mơ ya Kơnràñ neh ò lơh! Gơwèt mơ bơtau Siru, Yàng neh chôl nùs ông dê nàng lơh jat nùs koñ Kơnrañ dê. Kơnràñ neh lơh tom nùs nhơm ală cau gơnoar lăm ƀồ ơn phăn duh khoai mơ ală cau at-bồ nang bọ̆l khai lơh jat nùs koñ Kơnràñ dê. Sră Goh ò đơs nên lah bơtau Siru hala ală cau gơnoar lăm bồ ơn phăn duh khoai mơ ală cau at-bồ la ală cau niăm nùs Yàng (kung be Davit), mơ ya hiu duh khoai neh geh bơt bơtào, lang bọ̆l Yàng neh rê wơl hơ Jerusalem, mơ jơnau đơs hwơr Yàng dê đơs gan Jeremi neh gơlik di ngan. Nùs koñ Yàng dê neh geh lơh jat. Bơta rơndap wil tơl Kơnràñ dê neh geh lơh wil tơl.
Gơs tŭ, ăñ kư wêh-wơl tom bơta kơlôi sơnơng lah Yàng ò tŭ lơi koñ kup bơklơn “bơta kơlôi sơnơng khat gơboh” bọ̆l he dê, tian gơs hŭi lah Kơnràñ rgơi lơh bơta hơ̆ dilah Kơnràñ koñ. Ăñ dòp git lah tom tŭ Yàng koñ bư, hơ̆ la tai bơh ală tơnggu mang ryŭ Kơnràñ dê. Mơ ăñ kung sền gŏ lah tom tŭ Yàng lơh lơngơh lơnggơr nùs nhơm dô nă cau dê, gen tơnggu ò di nang bọ̆l khai koñ gơboh Yàng, mơ ya nang lơh jat nùs koñ Kơnràñ dê. Bơta do gam kư la dô bơta pun ndơp, mơ bọ̆l he ò tŭ lơi git wă jơh ală bơta jrô ndơp bơh Yàng. Gen tang, bọ̆l he mìng pal dòn kơnom, jao phi jơh ală bơta Kơnràñ in, mơ rcang sir pò mpông nùs nang Kơnràñ ngui rài kis bọ̆l he dê.
“Ơ hơh! Jrô ndơp ngan ală bơta pas-gơs, bơta jak chài mơ bơta git-jak Yàng Tom Trồ dê! Ală bơta cahrña Kơnrañ dê ò gơs cau lơi was kơr, gùng dà Kơnràñ dê ò gơs cau lơi rgơi joi git!” (Rôma 11:33-34)
Kòn dăn ơn bơta jòng ro Yàng la Bèp koñ gơboh mơ gơnap gơnoar bọ̆l kòn dê! Kơnràñ gơs gơnoar lơh broă tom nùs nhơm, mơ ngui kòn nang lơh wil tơl tơnggu niam rlau jơh Kơnràñ dê. Kòn dăn ơn jơh nùs nhơm kòn nang Yàng Hwềng Goh at-bồ, nang Kơnràñ ngui rài kis kòn kung bè dồ nơm phan ngui gơs kwơ, gơs pơnah bal tom bơta rơndap mang ryŭ Kơnràñ dê. Kòn jơh nùs hòi dan tom sơnđăn Yàng Jesu Krist, A-men.
Ơ jơh ală ông mò, oh mi koñ gơboh, Yàng Jesu ơm teh mpồng nùs kờp nă bọ̆l he dê. Kơnràñ ho lah dilah cau lơi kơno jơnau Kơnràñ dê mơ pò mpồng, Kơnràñ rơp mùt, lơh broă tom nùs bọ̆l he nang lơh jat nùs koñ mang ryŭ Kơnrañ dê. Pò tĕ mpồng nùs he dê Yàng in rgơi lơh broă dờng Kơnràñ dê gan bọ̆l he. Loi tĕ Kơnràñ tề lăm mơ tơm pơrgơl rài kis bọ̆l he dê jat nùs koñ niam Kơnràñ dê. Dan oh mi mơ ăñ dòn kơnom mơ jao phi jơh ală bơta tom tê Yàng, nang bọ̆l he gơlik gơs dô phan ngui ràng tơlik bơta koñ gơboh mơ bơta nđàc Kơnràñ dê tom dunnia do.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply