Tŭ ntao diđap ală bơta kalkê, oh mi gơs gơlơh dơrcul nùs mơ kòñ ruc wơl hala ò? Kah tĕ lah lŭ mang tơlir ñhơt ming pơnđang lu li tom tŭ geh tồl ní nơn, mơ bơta bơtao tơngguh lin rlau lơi kung pal cang tiar mon bơh ală bơta gơlong bol glar. Tŭ kơnòm pràn Yàng nàng lòt găn ală tơrñăng kơryăn tòm rai kis, bol he rơp dơp geh ală bơta bơtao tơngguh dơng.
Ngai do, ngai 24/08/2024, Bơta Hòi Dan Kòp Ngai dan jà ală ông mò oh mi bơtê bal Jơnau Yàng kơnòm dê bơta dong kơl mò Elder Vernell Windsor dê bơh tơnggumê TÊH DƠNG GĂN DÊ BƠTA GƠLONG BOL GLAR.
“Jơnau Yàng Tom Trồ dê sơlo ngai sơlo gơ lòt ơnàng, khà cau bơtê tòm Jerusalem sơlo gơbơtơl oă ngan.” (Broă 6:7)
Ồng mò oh mi neh gơs mat bơtê bơh broă cau ur pal cang đơs mơ lơh tòm hiu nhă dah rờ? Añ gen mor “ ò rgơi lơh”! Añ rgơi cih, lơh toán chai rgơi, mơ ya koh mơ jing ồi ao ơ? Ò di broă tòm añ dê! Añ neh pơnđơl pràn bơta bơtê lơh bañ kem mơ bañ buh … mơ ya jing ồi ao? Ngăn la sơlèt rlau mơ jak chai añ dê! Añ neh tiă rlau nhal ring lơngai añ dê rau.
Kung behơ̆ sơl, ồng mò oh mi gơs dơp git tơn lah Hiu Jum Goh dơ̆ sơnrờp kung pal lòt găn ală bơta gơlong bol glar tòm gùng bơtao tơngguh hala ò? Añ git; jơh tơl nă bol he neh kơno jơnau đơs blac pơrlôm iơh rmơh hơ̆ ntas tờm bồ dơngoh: “Añ la cau ming dùl kong bơta do!” Mơya ồng mò oh mi git ò: cau sò tòm gam pơrlôm oh mi!
Sră Broă tap 6 yal wơl bol he in git ală bơta kălkê tòm gùng bơtao tơngguh Hiu Jum Goh, mơ ai dô nơm gùng dà niam mơ jơl tus ngai do gam oă Hiu Jum Goh ngui. Bol he kơlôi bal sèng do:
“Tòm tŭ hơ̆, khà cau bơtê sơlo gơbơtơl oă tai, ală cau Juda đơs jơnau Grek yoam cau Juda đơs jơnau Aram, bơh ală cau ùr bơnrau bol khai dê neh kòl cau sang lòi tòm bơta pà phan kòp ngai. Jơt bàr nă cau gơnoar bơto dờng hòi jơh ală cau bơtê pơjum bal mơ đơs lah: “Sang broă bơto jơnau Yàng Tom Trồ dê nàng rcang bơh phan sa, ngan la ò di pal. Behơ̆, dan oh mi sac tĕ tòm bơnòr he poh nă cau geh pơnro niam, bềng lìu Yàng Hwềng Goh mơ bơta jak chài, nàng bol hi rơp jào broă do bol khai in.”
Ồng mò oh mi gơs tŭ lơi sền gŏ lah kòn mơnùs gam sùm sùm behơ̆, bulah bol he kis tòm pah rài lơi hala tòm tiah lơi? Bơh sơnrờp tus lồi, Sră Goh đơs bơh ală cau ngăn mơ ală bơta ngăn sơl. Hiu Jum Goh bơtao tơngguh mhăr rlau mơ bơta kơlôi sơnưng jơh ală cau dê. Bơta do crih crai ngăn, mơya gơ kung lăm tus oă công nha tơnơ̆. Ală cau bơtê kơlôi dô nơm gùng dà nàng lơh sir bơta gơlik gơs, mơ ceng wơl công nha dơng. Bol he sền tĕ bơta lơi neh gơlik gơs tòm tŭ bol khai lơh broă bal jat bơta rơndap:
“Jơnau Yàng Tom Trồ dê sơlo ngai sơlo gơ lòt ơnàng, khà cau bơtê tòm Jerusalem sơlo gơbơtơl oă ngan; kung gơs oă cau gơnoar ơn phan duh khoai dòn dòp Yàng sơl.” (Broă 6:7)
Tŭ do, ală cau ơruh vàng geh sền gar kơp ngai, mơ broă bơtọ Jơnau Niam pơnjat dong Hiu Jum Goh sơlơ ngai sơlơ bơtao tơngguh. Ai ală cau gơnoăr bơtọ gen rgơi wil tơl wet tus hơ broă hòi dan mơ bơtọ yal Jơnau Yàng. Bơta rơndap neh geh công nha. Bơta gơklŏ gơri hơ Yàng!
Ơdŭ bơtê broă lơh cau ur in añ dê ò rgơi geh pơndrơm mơ ală bơta gơlong bol glar Hiu Jum Goh dơ̆ sơnrơp dê, mơya gơ kung kălkê ngăn. Añ pal tô nàng lơh, koh vai, gen jing ală pơnah bal mơ ơn khoá. Broă ơn che brài tòm máy jing ồi ao gơlơh be dà ping bơh khòc! Añ pal hòi dong kơl mơ bèp neh tuh dong añ. Ồng neh dong añ jing sir ồi ao jat jơnau sôr, mơ añ ai lơh hưh nùs ngăn bơh gơ. Bèp añ king dong mề añ tòm ală bơta rơndap jing ồi ao mò dê. Lơngap lơngai ngăn ò git lơh!
Behơ̆ tàng, kơp tŭ ồng mò tìp gơlong bol glar, dòn tĕ lah Yàng rơp dong ồng mò oh mi lọt găn. Kơnràñ sùm ơm bal mơ ồng mò oh mi, ai bơntơl jơh ală bơta pal càng ồng mò oh mi in mơ dong ồng mò oh mi bơtao tơngguh pràn kơl dăng kơp ngai.
Dan ja bòl he dô nus bal tòm bơta hòi dan:
Ưnngai Yàng bơh Kơnràñ sùm ơm bal mơ kòn, krơi is la tòm ală tŭ kòn tìp ală bơta gơlong bol glar. Dan dong kòn sùm prăp kơ̆ bơta, git lah Kơnràñ sùm ai bơntơl ală bơta pal cang kòn in mơ tề lam lòt găn ală bơta kălkê. Dan dong kòn geh gŏ gơtha mơ bơta kas mang ală bơta kălkê do, nang bơh hơ̆ kòn gơlik gơs pràn kơldăng rlau, têh dơng rlau tòm bơta dòn. Kòn dòn lah kơnờm bơta tề lăm Kơnràñ dê, kòn rơp lòt găn ală bơta kơryan mơ bơtao tơngguh pràn kơldang kơp ngai. Kòn ai sơnđăn Yàng Jesus Krist hòi dan mơ Yàng Bèp, Amen.
Ơ ală ồng mò oh mi kòñ gơboh, bañ hŭi lah Yàng sùm ai bơntơl ală bơta ồng mò oh mi pal càng, mơ Kơnràñ ơs ai bơntơl pràn nàng dong ồng mò oh mi bơtao tơngguh pràn kơldăng kơp ngai. Bulah rài kis gơs oă bơta gơlong bol glar, kah tĕ lah ồng mò oh mi ò tŭ lơi ơm is. Bơta gơs mat Kơnràñ dê la tơm ryas chôl bơtrôt mơ bơta pràn kơldang dơng ơnang dong ồng mò oh mi lòt gan bơta kălkê. Ơn tĕ bơta dòn tơm Kơnràñ mơ ồng mò oh mi rơp gŏ rài kis he dê geh tơmgơl dô bă krơi is crih crài ngăn.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.