Digơlan ồng mò oh mi neh iat kơno jơnau đơs chồl bơtrut be do: “Yàng ò lơh bol he in bơta niam mơya Yàng lơh he in bơta niam rlau jơh.” Behơ̆ gen ñchi bơtài ală cau duh rngòt Yàng geh tìp ală bơta bol glar dờng tòm rài kis tiah? Ñchi bơtài bơta moat jrùng mơ roh gơcoh rgơi la “bơta niam rlau jơh” tiah? Tài bơh hơ̆ ò dê la bơta niam rlau jơh jat bơta kơ lôi sơ nơng kòn mơnus dê mơ la bơta niam rlau jơh jat nùs kòñ Yàng dê ai pà rài kis bol he in. Nàng lòt gan ală gùng dà bol glar rlau jơh, Kơnràñ rgơi ai pà bol he in nhòng bơcat lơngap lơngai oă rlau.
Ngai do, ngai 28/08/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl ồng Ruel DeCastro bơh tơnggume: BƠTA LƠNGAP LƠNGAI TÒM TIAH BÒL GLAR.
“Tòm tê Kơnràñ dê la bơta kis kòp phan kis dê, Mơ nhơm tă jơh jơi kòn mơnus dê”. (Jop 12:10)
Digơlan bơta lơh jat ală bơta boh lam Yàng dê rgơi dong kòl ală jơnau rac dan he dê geh dòp ho sơl?
Dilah mìng be hơ̆ lơm gòi, gen ñchi bơtài bol he pal càng bơt bơtào bơta tòm klac dềt mềr mơ Yàng tiah?
Mơya dilah be hơ̆, gen ñchi bơtài sèng yal wơl ồng Jop dê gơs tòm Sră Goh tiah?
Jop la dô nă cau song ring, gơs bơta tòm klac dềt mêr mơ Yàng Tòm Trồ kơnờm dê nùs nhơm dòn song mơ duh rngòt Yàng.
Satan tòm pơn dăng lah Jop duh rngòt dê Yàng la tài bơh Yàng ai pà ồng in oă ngan phan mơna, mơya Yàng ò dô nùs bal mơ gơ. Yàng dòn lah Jop ngan tian gơs ai gơnoar Satan ơniai mơ lơh ồng bol glar moat jrùng mơya ò ai gơnoar gơ ƀư tus bơta kis ồng dê.
Jop neh roh jơh – ală kòn, phan mơna mơ jơh sre bri – dô bă rngòt rngơt ngan. Ồng kung pal kong jê sồt bơh poac să tai. Bơta jê sồt ò git nđò kư̆ gơ rè mơ sa loan rài kis ồng dê.
Jrô ndơp tòm nùs nhơm, kòn mơ nus bol he òs mòng kơlôi lah: dilah cau dòn Yàng geh tìp bol glar, gen tàng nền ngan la tài bơh bol khai tìs glài mơ ò gơ jran sang glài.
Dùl nă tòm ală cau gơp bơyô ồng Jop dê geh sơnđan la Jôphar kung gơs bơta kơ lôi be hơ. Ồng đơs lah Jòp neh tìs glài tòm pơn dăng mơ Yàng Tòm Trồ. Tòm Jop 11: 5-6, Jôphar đơs ală jơnau cahrña Jop:
‘Mơya ơ hơh! Añ kơp kòñ Yàng Tom Trồ rơp đơs, Mơ pò bơr Kơnràñ dê đơs mơ ồng. ‘Mơ kơp kòñ Kơnràñ yal ồng in ală bơta ndơp ndơr bơta jak chài dê! Bơh bơta jak chài la oă đah. Gen git tĕ lah Yàng Tom Trồ lơh dô êt rlau mơ tồi glài ồng dê. ‘ (Jop 11:5-6)
Jôphar neh tis rau!
Nùs nhơm ồng Jôphar dê gơlơh òs mòng sơl?
Añ kòñ ngan bơta ho bal Jop dê mơ Yàng – ràng tơlik bơta tòm klac dềt mềr geh bơt bơtào oă sơ nam neh sơr lèt rlau. Dròm be bơta tòm bơh bơr tòm bơta tòm klac dềt mềr, bơta tòm bơh bơr ồng Jop mơ Yàng Tòm Trồ dê.
Ồng Jop gơs kong bol glar sơl? Gơs
Ồng moat jrùng tŭ gŏ cau gơp sa he dê sang rài sơl? Hơ̆ la bơta moat jrung kalke ngan nàng rgơi kơ lôi sơ nơng.
Mơya kơ nờm dê bơta tòm pồt tòm klac dềt mêr mơ Yàng Tòm Trồ gơnap gơ noar, Jop kư̆ sơmbat kơ̆ jơnau song, ràng tơlik gan dê jơnau đơs nền ồng Jop dê tòm Jop 12:10: “Tòm tê Kơnràñ dê la bơta kis kòp phan kis dê, Mơ nhơm tă jơh jơi kòn mơnus dê”.
Tơnơ̆ mơ kòng bơta ò bơtoah bơtwoài mơ ràng tơlik nùs nhơm sa tòm dê mơ Yàng. cau di Yàng dê neh đal git jơnau song – mơ Yàng Tòm Trồ jong rơ ồng.
Tòm kơnhai pe nam 2021 añ roh dô nă cau tòm yau – kung la dô nă bơyô. Ồng sang rài tài bơh kòp jê dờng. Ồng neh tề lam añ bal mơ ală jơnau tòm pà dờng màng kung be ală bơta lơh lòt nền ngan să tòm dê. Ồng cèng tus bơta chò hòp, bơta chồl bơtrut mơ dô bă bal tòm kòp bă tiah ồng tus. Ồng ờm ờm rcang broă lơh bơh đah ngkòi, la krơh ring niam bơh bơta lơh lòt niam tòm broă lơh. Mơya, nisơna ồng sang rài.
Tòm ngai wèr Ưn ngài nam hơ̆, cau bèp 82 sơ nam sum la krơh niam bơh nùs nhơm dờng ơnàng, pin pơn dềt să mơ kòñ gơboh ò càng ñchi lơi. Ồng kung la cau lơh broă tơryiang tơr yồng mơ jơh nùs duh broă tòm rài kis. Tòm kơnhai 7 nam 2021, ồng ji nus, pal bic tòm cơ nơng sùm. Mơ gen tòm dô ring àng drim ne, ồng ò tŭ lơi guh bic tai.
Tòm kơnhai 1 nam 2022, ală xét nghiệm ràng tơlik bèp añ gơs pe động mạnh bị tắc – rngòt rlau jơh la dul nơm động mạch bị tắt 90% tơn. Tòm cuộc phẫu thuật tim hở tòm kơnhai pe nam hơ̆, cau gơ noar sơ nơm bàn tai dô nơm động mạch dơ̆ poan bị tắt. Mơya ưn ngai Yàng, bơta phẫu thuật bắc cầu poan nơm động mạch neh gơlik gơs công nha niam.
Bulah ò rgơi pơndròm mơ bơta gơlik gơs ồng Jop in, mơya mơ nàng rài kis añ jê kung bơt bơtào kơ nờm dê bơta tòm klac jrô ndơp mơ Yàng. Dròm be ồng Jop, añ sùm pơn jat bơta hòi dan, tòm bơh bơr mơ Yàng lòt gan ală nam kơnhai, mơ sơlo ngai dềt mêr mơ Yàng rlau tai tŭ lòt gan tòm sơndiang klam jơ ngo cik. Kung be ồng Jop geh dòp wơl oă rlau mơ ală bơta ồng neh roh, Yàng kung ai pà añ in bơta git làm lơngap lơngai kung be hơ sơl.
Plai nùs añ jê jơ do gơlik pràn kơldang ò git nđò, mơ bơta pràn kơl dang tim mạch añ jê pràn rlau jơh tòm rài kis añ. Bơ ngai hơ, an ntoat gơs 10.000 cơn đòa tòm 273 ngai tơnơ̆.
Mơ bơta dờng màng rlau jơh la bơta tòm klac añ jê mơ Yàng gơlik gơs jrô ndơ rlau tơnơ̆ mơ ală bơta gơ lòng, dròm be sèng yal wơl ồng Jop dê.
Dan jà bol he dô nùs bal tòm bơta hòi dan:
Khoai Bèp kòñ gơboh, dan tề lam kòn lòt gan ală sơndiang klam jơ ngo cik, ală bơta gơ lòng mơ bơta moat jrùng rài kis do mơ sơmbat kơ̆ nùs nhơm dềt mêr mơ Yàng. Dong kòl kòn geh bơtê ală sèng bơtê dờng màng gan ală bơta bol glar tòm rài kis, bơto kòn git ơn nùs ơn tôr gơ wèt dê Yàng mơ jơh nùs dòn kơ nờm dê Yàng. Kòn dan jào Yàng in ală bơta jong rơ mơ nùs nhờm kòn gơboh. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, bơta gơtòmklac dềt mềr bol he dê mơ Bèp Hơđang Trồ la mơ nàng kràñ cê nàng bol he lòt gan bơta bòl glar. Tŭ bol he ơn bơta dòn dê Yàng, git nền cê lah Yàng sùm lơh bơta niam rlau jơh rài kis he in, bol he rơp jòi bàn bơta pràn kơl dang ò git nđò nàng lòt găn bă tiah bòl glar. Kư̆ kơ̆ wền bơt bơtào mơ ròng siam bơta gơtòmklac đah hwềng mơ Yàng, nàng kòp ngai lòt gan, bol he sơlo kơ̆ cê mơ kơ̆ wền, rcang sir tìp mat mơ ală bơta bol glar tòm gùng lòt.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.