Txhua hnub peb yeej tos kom tau Vajtswv coj peb kev. Tus ntseeg Vajtswv lub neej yog ib ncua kev mus nrog kev ntseeg. Thiab nyob rau hauv txoj kev ntseeg ntawd, peb pom tias Vajtswv yog tus thawj coj, Vajtswv paub zoo txoj kev tws yog txoj kev haum rau peb mus, pab koj peb kev ntseeg loj hlob dua.
Hnub no, yog hnub 29/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Benjamin Brittain dhau ntawm Zaj kawm TXOJ KEV MUS RAU NKA-XAS.
“Tus Tswv ib tug timtswv los hais rau Filis hais tias, “Koj cia li sawv kev mus rau sab qabteb, koj taug txojkev uas tuaj tom lub nroog Yeluxalees tuaj mus rau nram lub nroog Nkaxas” (Tes Haujlwm 8:26).
Thaum kuv 10 xyoo, kuv tsev neeg txav chaw ntawm qaum teb Carolina mus rau Virginia vim kuv txiv txoj haujlwm. Kuv tsis nyiam txoj kev uas txav chaw zaum no, vim yav dhau los kuv tau nyob ze pog thiab yawg nkawd thiab tej neeg txheeb ze hauv kuv tsev neeg, kuv kuj muaj ntau tus phooj ywg zoo, thiab qaum teb Carolina yog kuv lub ntuj thaum ntawd. Tiamsis tau ntau xyoo nyob rau Virginia dhau los ua kuv lub tsev ntawm no. Ntawm no kuv nrhiav tau ib lub Pawg Ntseeg, muaj ib lub zej zog zoo, muaj ib tug pojniam zoo! Tiamsis, zoo li txoj kev txhawj thiab tsis txaus siab thaum yau, kuv yeej tseem hnov ntshai txog tej lub caijnyoog tshiab uas Vajtswv muab tso tom kuv hauv ntej.
Peb saib Filipis nyob hauv zaj xwm txheej no. Ua ntej uas tau Vajtswv txib mus rau pem Nkaxas, yawg muaj sijhawm ua Vajtswv haujlwm tawg paj txi txiv nyob hauv Samalis (Tes Haujlwm 8:4-13). Muaj ntau qhov txujci tshwmsim tuaj, ntiab dab tawm, kho zoo mob nkeeg, thiab “hauv lub nroog muaj kev zoo siab” (Tes Haujlwm 8:6-8).
Tiamsis thaum uas tseem ua haujlwm, muaj ib tug timtswv los hais rau Filis kom Filis tawm mus. Tsis yog mus xwb tiamsis tseem mus rau ntawm ib txoj kev uas tsis muaj neeg!
Nyob hauv tib neeg lub hlwb ces ntawm no yog ib yam uas nyuaj. Vim li cas Filis ho tso ib teg haujlwm tab tom ua tau zoo tseg mus rau ntawm ib qhov chaw tsis muaj neeg? Tiamsis Filis ua raws li Vajtswv lub suab hu tamsim ntawd. Tes Haujlwm 8:27 sau luv luv li no: “Yawg sawv tsees thiab mus” tom qab peb mam nkag siab tias vim li cas Vajtswv txib yawg mus rau nram Nkaxas.
Thaum Filis mus, Vajtswv tso ib tug nom Ethi-aupias kuj tab tom taug txoj kev ntawd thiab, thiab tus nom no tab tom nyeem phau cev lus Yaxayas. Filis thiaj mus ze tus nom ntawd, txhais ntu Vajluskub hais txog Txojmoo Zoo. Tus nom no cia li ntseeg Tswv Yexus tamsim ntawd thiab thov kom tau ua kevcai raus dej. Yog li Filis thiaj muab tus nom no ua kevcai raus dej nyob ze ntawd. (Tes Haujlwm 8:27-40).
Yog Filis nyob hauv Xamalis, yawg yuav ua tsis tiav tej uas Vajtswv txib. Tiamsis yawg mloog lus, ib tug nom tau ntseeg Tswv Yexus rov qab mus rau nws lub zej zog yog qhov chaw uas Txojmoo Zoo tsis tau qhia dua li.
“Txoj kev mus rau Nkaxas” ntawm koj lub neej yog dabtsi? Puas muaj yam dabtsi Vajtswv nqua hu kom koj ua txawm yog koj tsis nkag siab? Puas muaj qhov chaw twg uas Vajtswv hu kom koj mus nrog kev ntseeg? Los ntawm Filis zaj xwm txheej, peb paub meej meej tias thaum peb ua raws li Vajtswv lub suab hu, Vajtswv yuav coj peb ib kaujruam zuj zus thiab tso tus neeg kom phim rau ntawm txoj kev uas peb yuav mus.
Peb kev ua haujlwm yuav ua rau Vajtswv tau koob meej yog thaum peb muaj kev ntseeg mloog Vajtswv lus txhua hnub.
Thov kom peb tau txhawb zog ua lub neej li Filis thiab mus ntawm txhua txoj kev uas Vajtswv txib peb mus.
Thov caw nrog kuv peb thov Vajtswv ua ke:
Tus Tswv, kuv ua Koj tsaug vim Vaj Ntsujplig tau los nyob hauv kuv thiab coj kuv kev. Kuv ua koj tsaug vim koj ua siab ntev cob kuv thiab nthuav tawm koj lub siab nyiam rau kuv. Kuv thov Vajtswv zam txim rau txhua zaug uas kuv ua xyem xyav thiab tsis muaj kev ntseeg mloog koj lus ua raws li tej uas koj tshoov siab. Thov Vajtswv pab kom kuv mloog lus thiab ntseeg siab rau Vajtswv deb tshaj kuv tus nrim. Thov Vajtswv pub kom kuv muaj lub qhov ntsej txawj mloog, muaj lub siab ntseeg, txhais tes txhais taw npaj txhij los mloog lus li Filis, kom dhau ntawm kuv lub neej, coob tug lub neej yuav hloov pauv. Kuv thov hauv Tswv Yexus Khetos lub npe. Amees.
Ib tsoom ntseeg sawv daws, puas muaj yam dabtsi zoo li “txojkev mus rau Nkaxas” uas Vajtswv xav kom koj ua? Yog tias koj tab tom tau ntuas kom ua haujlwm, ces txhob tso tseg. Yog tias koj tsis tau tab pov, cia li tseg ib mentsis sijhawm los thov Vajtswv thiab tos Vajtswv lub suab txib koj Txawm yog peb tab tom nyob qhov twg hauv txoj kev nrog tus Tswv mus los, peb puav leej tau hu los ua tej menyuam uas “ntseeg thiab mloog lus”. Koj yuav xav tsis thoob thiab zoo siab thaum uas ntsia pom lub neej nrog tus Tswv mus zoo li cas!
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.