Kờp ngai bol he kơp gơn Yàng tề lăm he. Rài kis cau dòn jat Yàng dê sùm la dồ nơm gùng lòt bơta dòn pràn kơldăng. Mơ tơm gùng hơ̆, bol he dòp git Yàng la Bơtau At Bồ, Kơnràñ git gùng lòt, sơnah pleh, đah lơi di pal lòt nang yò tơngguh bơta dòn bol he dê tus tiah jong rlau tai.
Ngai do, ngai 29/08/2024, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng dê kơnom di bơta dong kơl Benjamin Brittain gan tơnggume GÙNG TUS GASA.
“Mơ tai, gơs dô nă cau gơnrơh Yàng dê đơs mơ Philip lah: “Ntào tĕ lòt tus hơ đah đơm, hơ gùng bơh Jerusalem mù hơ Gasa.” Tiah hơ̆ ngềt-ngơt ngan.” (Broă 8:26)
Tŭ añ 10 sơnăm, hiu nhă añ lòt bơh Băc Carolina tus hơ Virginia tai bơh broă lơh bèp añ jê. Añ ò koñ dơ̆ tơmgơl hiu tŭ do, tai bơh lai mơ tŭ hơ̆ bol he kis rềp mơ me-yo bàp-yo mơ ală cau dà-rơp gơp bòn tom hiu nhă añ, añ kung gơs oă cau bơyô niam, mơ Băc Carolina la dô lơgar añ jê tŭ hơ̆. Mơ ya lòt gan oă sơnăm, Virginia rhoi rhoi gơlik gơs hiu añ jê. Ting do, añ joi geh dô Hiu Jum Goh, dô mpồl ală cau niam, mơ dô nă bau ur niam ngan! Bulah behơ̆, kung bè dô bơta kơlôi rcang mơ ò sup ò iang añ jê tŭ tơmgơl hiu ơm tŭ gam kơnom, añ òs sùm kơlôi rngòt mơ gơlơh hat nùs bơh ală bơta pa mơ Yàng ơn di đap añ.
Bol he sền tĕ Philip tom bơta yal yau do. Lai mơ tŭ dòp geh bơta tề lăm Yàng dê lòt tus hơ Gasa, ông neh gơs tŭ tơngai duh broă Yàng gơlik công nha tom Samari (Broă 8:4-13). Oă tềl krơi crih crài gơlik gơs, oă hwềng cà iơh gơkol bơtrơh, oă cau geh sơmbơi, mơ “tom bòn dờng hơ̆ gơs bơta hòn-chò ò git lơh” (Broă 8:6-8).
Mơ ya tom tŭ duh broă, dô nă cau gơnrơh tơlik mat mơ sồr Philip pal lik lòt. Ò di ming lik lòt lơm, mơ ya ông pal lòt tus hơ dô nơm gùng ngềt-ngơt!
Tom dơngoh kơlôi kòn mơnus dê gen do la dô bơta kal kê wơng. Ñchi bơh tai Philip pal du-lik bơh dô gơnoar broă gơlik công nha nang lòt tus hơ dô nơm tiah ngềt-ngơt? Mơ ya Philip ñă lòt mo mơ jơnau hòi jà Yàng dê. Broă 8:27 mìng cih liah: “Khai ñă mơ lòt”. Gen bol he wă wơng ñchi bơh tai Yàng sồr ông lòt gùng tus hơ Gasa.
Tom tŭ Philip lòt, Yàng neh ơn dô nă cau kwang kơndơi Êtiôpi kung lòt tom gùng hơ̆ sơl, mơ cau kwang hơ̆ sền sră cau gơnoar hwơr Êsai. Philip neh khin cha lòt tus rềp cau kwang hơ̆, yal tơlik khai in seng Sră Goh hơ̆ mơ bơto yal bơh Jơnau Niam. Cau kwang kơn-dơi hơ̆ dòn Yàng Jesu mơ dan gơs bap-tem mo. Gen tang, Philip lơh bap-tem khai in hơ dô nơm dà rềp di ting hơ̆ (Broă 8:27-40).
Dilah Philip ơm wơl tơm Samari, ông rơp lơh roh bơta tìp mat bơh Yàng rơndap. Mơ ya bơh ông dòn bơr, dô nă cau kwang neh ơn bơta dòn tom Yàng Jesu mơ rê wơl hơ bòn tơm la tiah mơ Jơnau Niam ò hềt geh bơto yal.
“Gùng lòt tus hơ Gasa” rài kis oh mi dê la bơta lơi? Gơs bơta lơi Yàng gam hòi jà oh mi lơh bulah oh mi ò wă wơng? Gơs tiah lơi Yàng hòi jà oh mi cơnđoà mut tom bơta dòn? Bơh bơta yal yau Philip dê, bol he rgơi git nền lah tơm tŭ bol he don bơr lơh jat bơta hòi jà Yàng dê, Kơnràñ rơp tề lăm ală cơnđoà mơ ơn ală cau di pal tom gùng lòt bol he dê.
Bơta duh broă ceng wơl bơta gơklŏ oă rlau jơh Yàng in la bơta dòn bă lĭa don bơr Yàng kờp ngai.
Kơp koñ bol he geh gơchôl nang kis kung bè Philip mơ lòt tus hơ gùng lơi Yàng hòi bol he lòt.
Khoai Yàng koñ gơboh,
Kòn ưnngai Yàng tai bơh Yàng Hwềng Goh mù ơm tom kòn mơ sùm koñ tề lăm kòn. Kòn ưnngai Yàng tai bơh Kơnrañ kơ̆-dơn ngan nang bơto sồr mơ rang tơlik nùs koñ Kơnràñ dê kòn in. Kòn dan Yàng toh tồi-glài tai bơh ală dơ̆ kòn pin wĭl-wơl mơ sĭau bơta dòn nang don bơr lòt jat bơta Yàng chôl. Dan dọ̆ng kơl kòn dòn bơr mơ don kơnom Yàng sơrlèt rlau mơ bơta wă wơng bă lĭa kòn dê. Kòn dan Yàng ai kòn in gơs tồr git kơno, nùs nhơm lơbơn niam don kơnom, mpang tê mơ mpang jơng rcang sir don bơr kung be Philip, nang gan rài kis kòn, oă cau rgơi git bơh Yàng.
Kòn jơh nùs hòi dan tom sơnđan Yàng Jesu Krist, A-men.
Ơ jơh ală ông mò oh mi koñ gơboh,
Gơs “gùng lòt Gasa” hala bơta lơi Yàng koñ oh mi lơh sơl? Dilah oh mi geh tơngkah nang lơh mhar, gen bañ ơm gơn. Dilah oh mi ò hềt git nền, ơn tĕ dồ ềt tŭ jơ tơm bơta hòi dan mơ ơm gơn bơta yal loh bơh Yàng. Bulah bol he ơm tiah lơi tơm gùng lòt jat Yàng, bol he kung geh hòi nang gơlik gơs ală kòn “don kơnom mơ dòn bơr”. Mơ oh mi rơp ai lơh krơi bal mơ chò-hòp tơm tŭ sền gŏ công nha rài kis jat Yang mbe lơi!
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply