Peb paub meej tias txoj kev thov Vajtswv yog yam uas yuav tsum tau ua nyob rau hauv tus ntseeg lub neej. Thov Vajtswv piv ib yam li txoj kev ua pa ntawm peb sab ntsujplig. Yog li, puas muaj zaum twg koj khuab xeeb tias vim li cas Vajtswv tsis teb yus tej lus thov? Lossis koj puas pom tias yus txoj kev thov Vajtswv tab tom qhuav qhawv thiab qaug zog zis?
Hnub no, yog hnub 30/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gordon Robertson dhau ntawm Zaj kawm THOV RAWS LEEJ TXIV LUB SIAB NYIAM.
“Peb tsis ntshai mus cuag Vajtswv, rau qhov peb paub tseeb hais tias yog peb thov tej uas raws li Vajtswv lub siab nyiam, Vajtswv yeej yuav mloog peb tej Ius thov”. (I Yauhas 5:14).
Yuav ua li cas kom peb thiaj paub tias yus tab tom thov Vajtswv raws li Vajtswv lub siab nyiam? Peb nrhiav tau tus yaum sij nyob hauv zaj xwm txog tus pojntsuam thaum nws ua siab ntev thov tus nom pab txiav txim rau Nws. Vim li cas Tswv Yexus ho tham zaj xwm txheej no rau cov thwjtim mloog? Ntawd yog qhia kom lawv yuav tau thov Vajtswv txhob nkees” (Lukas 18:1).
Vajtswv pheej teb tej lus thov raws li I Yauhas 5:14 tau sau: Peb tsis ntshai mus cuag Vajtswv, rau qhov peb paub tseeb hais tias yog peb thov tej uas raws li Vajtswv lub siab nyiam, Vajtswv yeej yuav mloog peb tej Ius thov.
Yog li yuav ua li cas thiaj yuav paub Vajtswv lub siab nyiam? Yog koj xav hnov Vajtswv lub suab, cia li nyeem Vajluskub. Vajtswv lub siab nyiam tau nthuav tawm nyob hauv Vajtswv txojlus. Thiab thaum peb thov Vajtswv raws li Vajtswv lub siab nyiam, ces Vajtswv yuav hnov thiab teb peb tej lus thov.
Thaum peb nkag siab Vajtswv tej lus, peb thiaj yuav muaj cuab kav tiv taus tej kev sim siab uas los raug rau yus. Peb muaj lub siab ntseeg tias Vajtswv yuav coj kev thiab peb tab tom mus raws li Vajtswv lub siab nyiam. Tswv Yexus tau los thiab taw kev rau peb paub txog Leej Txiv. Tswv Yexus hais nyob hauv Yauhas 14:10 tias: “Tej lus uas kuv qhia rau nej no tsis yog kuv tej lus. Tiamsis yog Leej Txiv tus uas nyob hauv kuv, ua nws tes haujlwm xwb.”
Thaum peb nyob hauv Nws, peb yuav nrhiav pom peb tus kheej thiab yuav maj mam kawm paub Vajtswv lub siab nyiam. Tiamsis thaum peb qaug zog thiab ua txhaum, peb yuav xav tias peb zoo tsis txaus, yus tsis nyeem Vajluskub ntau, lossis saib tej movies qias neeg….” peb pib ua poob peb lub siab npuab Vajtswv- yog tus Tswv uas nyob hauv peb.
Tswv Yexus cov ntshav tau ntws los rau koj thiab kuv peb tej kev txhaum, vim li no, Tswv Yexus thiaj dua daim ntaub hauv tuam tsev kom ntuag nrhe, peb thiaj muaj cuab kav mus rau hauv Vajtswv kev tshwm ntsej muag – thiab qhov tseem ceeb dua yog Vajtswv kev tshwm los nyob hauv peb lub neej. Thaum peb paub txog qhov no, peb yuav pom tias Vajtswv yuav hais rau peb los ntawm lub suab mos muag “Kev nyob ntawm no, cia li taug mus” (Yaxayas 30:21).
Yog li Vajtswv yuav ua haujlwm dhau ntawm peb li cas?
Nyob rau Manila, kuv muaj ib lub chav me me los ua kevcai yoo mov thiab thov Vajtswv. Kuv tej menyuam tseem me. Tiamsis txhua tus hauv tsev puav leej paub tias tsis tab kaum kuv thaum uas kuv kaw qhov rooj thiab tseg sijhawm nrog Vajtswv nyob ua ke.
Muaj ib hnub, kuv tab tom nyob hauv kuv chav thiab thov Vajtswv tias: “Tus Tswv, kuv xav kom paub koj ntau dua! Kuv cheem tsum koj” xwb tim kuv hnov lub suab khob qhov rooj thiab kuv tus ntxhais ob xyoos tsa suab hlo hais tias “Txiv, kuv xav haus dej txiv ntoo.”
Kuv teb tias: “Koj mus kom niam muab rau koj” thaum kawg, kuv tab tom nrog Vajtswv sib tham. Tiamsis nws rov qab khob qhov rooj dua ib zaug: “Niam mus lawm, txiv, kuv xav haus dej qab zib”.
Koj puas pom tias cov menyuam lawv yuav tsis tso tseg yog tias nws pom koj tseem ua twjywm? Kuv tus ntxhais zoo ib yam li tus pojntsuam ua siab ntev ntawd. Kuv yog tus pub dej qab zib rau nws thiab kuv tus ntxhais yuav khob qhov rooj mus txog rau thaum nws txais tau khob dej.
Pom tias kuv yuav thov tsis tau Vajtswv mus ntxiv, kuv sawv los ua kom tiav leej txiv tes haujlwm. Kuv qhib qhov rooj thiab xav tias ntshe thaum no yuav zoo siab. Tsis yog! Kuv tus ntxhais puag rawv kuv ko taw. Thiab thaum kuv mus ntawm kuv chav thov Vajtswv rau hauv chaw ua mov, nws tuav kuv ruaj ruaj thiab hais. “Txiv, kuv xav haus dej tsuam txiv ntoo!”
Kuv qhib tủ lạnh los thiab muab dej nchuav rau hauv khob thiab hais tias: “Koj tsis pom los, txiv tab tom hliv dej no ne!” Tiamsis kuv tus ntxhais kua muag kua ntws si thiab quaj ntxiv “Txiv kuv xav tau dej” kuv thiaj muab rho nws tes nchua tawm ntawm kuv txhais ko taw thiab muab khob dej cev rau nws tes cug rau ntawm nws qhov ncauj. Thaum uas nws cev tau khob rau ntawm qhov ncauj lawm nws thiaj tsis quaj ntxiv.
Thiab kuv hnov ib lub suab mos muag: “Ntawm no yog tej uas koj tab tom ua rau Kuv ntag”.
Tej zaug koj kuj tab tom zoo li ntawd. Tiamsis nco ntsoov qhov no: Koj muaj dej, muaj kev mus. Koj yog Vajtswv tus muaj hwjchim li menyuam. Koj tau ywj pheej mus cuag nws. Yam twg uas Vajtswv muaj, ces koj kuj muaj. Koj yog tus nrog Tswv Yexus Khetos koom txais Vajtswv tej qub txeeg qub teg. Tib qhov teeb meem thaum no yog: Koj puas ntseeg qhov no xwb? Vajtswv tsis qia dub. Vajtswv yuav tsis muab taub dej ntawd khaws cia. Vajtswv kuj tsis muaj ib tug menyuam uas Vajtswv hlub tshaj. Yog koj nyeem pom tej lus cog tseg pub rau koj. Raws li II Kauleethaus 1:20, Vajtswv txhua lo lus cog tseg puav leej yog “muaj” thiab “Amees” xwb, yam uas peb yuav tau ua yog ntseeg.
Kuv cheem tsum dej, yog li kuv thiaj thov kom Vajtswv pub, tiamsis kuv tsis paub tias taub dej nws twb muaj nyob ntawd lawm.
Peb txais tau kev txhawb zog los ntawm Paulus thaum yawg sau nyob hauv Loos 8: 26-27 tias:
“Thaum peb tsaug muag Vaj Ntsujplig pab peb; rau qhov peb tsis paub hais tias peb yuav thov yam twg, tiamsis Vaj Ntsujplig thov Vajtswv pab peb thaum peb tsis paub yuav hais li cas. Vajtswv tus uas porn peb lub siab yeej paub tej uas Vaj Ntsujplig thov, rau qhov tej uas Vaj Ntsujplig thov Vajtswv pab peb, tej ntawd yeej raws li Vajtswv lub siab nyiam”.
Tswv Yexus tab tom thov Vajtswv rau peb. Vaj Ntsujplig paub Leej Txiv lub siab nyiam thiab tab tom thov Vajtswv rau koj thiab kuv. Yog li peb muaj cuab kav muaj lub siab tawv hais tias: “Tus Tswv, kuv yog ib tug menyuam yaus xwb. Yog ib tug menyuam tsis paub muab dej haus, tiamsis Vajtswv koj paub. Vajtswv paub lo lus teb. Vajtswv paub yam uas kuv yuav thov Vajtswv. Kuv thov kom Vajtswv lub siab nyiam tau ua hauv kuv lub neej. Thov kom kuv dhau los ua ib feem nyob hauv koj lub homphiaj.”
Thov caw nrog kuv peb thov Vajtswv ua ke:
Tus Tswv, kuv ua Koj tsaug vim koj tau nrog nraim kuv thiab nyob hauv kuv. Kuv ua koj tsaug vim koj tsis yog ib tug Vajtswv nyob deb. Txhua yam uas kuv cheem tsum puav leej muaj nyob hauv koj, yog li, koj yog kuv lub hauv paus cawm siav. Thov qhia rau kuv txoj kev uas yuav thov kom haum Leej Txiv siab. Thov pab kom kuv thov Vajtswv nrog txoj kev ntseeg thiab ua siab ntev. Kuv xav kom tau hnov Vajtswv lub suab thiab xav kom dhau los ua ib tug neeg thov Vajtswv. Thov pab kom txhua hnub kuv hnov Vajtswv lub suab hu. Kuv thov hauv Tswv Yexus Khetos lub npe. Amees.
Cov kwv tij txhua tus, hnub no, ua ntej uas koj yuav ua ib qhov haujlwm dabtsi twg, cia li tseg ib me ntsis sijhawm los thov Vajtswv, thov Vajtswv coj koj kev thiab foom hmoov rau koj. Thiab cia kom peb dhau los ua tus neeg thov Vajtswv raws li Leej Txiv lub siab nyiam, koj txhob hnov qab koj lub sijhawm kawm Vajtswv txojlus. Cia Vajtswv txojlus ciaj sia rau koj lub siab thiab hloov pauv koj lub hlwb. Thaum ntawd, koj yuav ntsia pom koj tsis xav lossis tsis thov Vajtswv raws li txoj kev qub lawm tiamsis raws li Vajtswv tej lus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.