Koj xav kom tau yam dabtsi tshaj plaws nyob rau hauv koj lub neej? Kev nplua nuj, kev txawj ntse, dag zog thiab tej uas koj ntsib dhau? Tsis paub tej uas nyob ib ntus ntawd puas ua rau koj zoo siab thiab hnov txaus rau lub neej? Thaum txais tau tej koob hmoov ntawd, tsis paub koj puas hlub Vajtswv thiab dhau los nyob ze Vajtswv, lossis tsuas cia siab ntsoov rau tej yam ntawd thiab khiav deb tus Vajtswv uas ua tau txhua yam?
Hnub no, yog hnub 01/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andrew Murray dhau ntawm Zaj kawm TUS TSIS MUAJ NRIM.
“Koj xav kom kuv muab dabtsi rau koj?” (1 Vajntxwv 3:5).
“Hmo ntawd tus Tswv los tshwm rau nws pom hauv nruab npau suav hauv Nkinpe-oos thiab hais rau nws hais tias, “Koj xav kom kuv muab dabtsi rau koj?” (1 Vajntxwv 3:5).
Koj puas tau xav txog tias yog muaj ib zaug twg Vajtswv tshwm los thiab nug koj ib lo lus no yuav zoo li cas? Ntawm no yog txoj kev ntshaw uas txhua tus menyuam yaus lawv puav leej xav – thiab kuj yog qhov uas tej menyuam txhua tus lawv puav leej nyiam tej zaj xwm txheej qub qub nrog rau tej kev npau suav uas yuav tshwm tuaj.
Ntawm kuv, Vajtswv yeej ib txwm pub yam uas muaj nqis rau peb lawm. Tswv Yexus txoj kev tuag yog qhov khoom plig muaj nqis uas Vajtswv pub rau lub ntiajteb no. Tus tsim ib puas tsav yam uas ua tau txhua yam tau txo nws tus kheej thiab muab Nws tus kheej fij rau lub ntiajteb – kom peb tau mus nyob ze Vajtswv, txais yuav txoj kev cawmdim, kawm paub txog Vajtswv thiab koom siab ua ke nrog Nws- ntau zaug peb tseem tau Vajtswv pub lub tshwjchim (Yauhas 17:22) uas tsim nyog Tswv Yexus Nws yuav tsis kam pub rau lwm tus (Yaxayas 42:8). Zoo kawg nkaus li!
Peb cia li muaj feem mus koom nrog Vajtswv tus yam ntxwv uas zoo kawg nkaus thiab dawb huv tshaj plaws, thiab pib ib lub neej tshiab tsis muaj hnub xaus – yog yog lub sijhawm hauv ntiajteb no yuav tag mus los lub neej ib txhis yuav tsis txawj ploj. Ntawm no yog tus Vajtswv uas Xalumoos paub – thiab kuj yog tus Vajtswv uas yawg hlub. (1 Vajntxwv 3:3).
Thaum Vajtswv hais rau Xalumoos, yawg muaj ib lo lus teb zoo heev. Thaum fij lo lus qhuas rau Vajtswv, yawg hais rau Vajtswv tias: “Tus Tswv uas yog Vajtswv, koj tsa kuv ua vajntxwv hloov kuv txiv chaw, txawm yog kuv tseem hluas thiab tsis muaj tswvyim tswj lub tebchaws no los xij peem. Nimno kuv nrog cov neeg uas koj tau xaiv tseg ua koj tug lawm nyob, cov neeg no coob heev tsis muaj leejtwg suav txheeb li. Yog li ntawd, thov koj pub kom kuv muaj tswvyim tswjhwm koj haivneeg ncaj ncees thiab paub qhov phem qhov zoo. Yog kuv tsis muaj tswvyim, kuv yuav ua li cas tswjhwm tau koj haivneeg uas coob heev no? ” (1 Vajntxwv 3:7-9).
Xalumoos paub nws qhov chaw nyob yog qhov twg ntawm Vajtswv tus muaj hwjchim, thiab txoj kev txo hwjchim yuav tsim muaj txoj kev dawbhuv. Tsis tas li ntawd, thaum uas tau cai thov Vajtswv ib yam dabtsi twg, yawg yeej tsis qia dub thov yam muaj nqis rau tus kheej. Yawg tsuas thov Vajtswv pub kom muaj kev txawj ntse los coj Vajtswv haiv neeg. Yog tias yog koj, koj puas yuav ua li ntawd? Kuv tus kheej xav tias kuv yeej ua tsis tau!
Tseeb tiag kuv twb tsis ua li ntawd. Thawj zaug uas kuv paub Vajtswv, paub tias Vajtswv txaus siab hlo muab Nws txojsia tuag theej kuv, kuv tau thov Vajtswv pub yam uas kuv ntshaw rau kuv, pauv qhov uas kuv qhib kuv lub siab kom dav los txais yuav Nws. kuv thiaj thov Vajtswv pub ib lub homphiaj rau kuv – kom kuv saj tau tias tus kheej muaj nqis tom qab ntau xyoo ua neej tsis muaj kev cia siab.
Thiab tseeb tiag Vajtswv tau pub yam ntawd rau kuv. Ntawm no yog qhov teeb meem: Vajtswv tsis qia dub. Vajtswv txojlus hais tias: “Tej tsiaj ntawd tos ntsoov koj pub rau lawv noj lawv haus thaum tshaib nqhis. Thaum koj pub rau lawv noj , lawv thiaj tau noj, koj pub rau lawv muaj noj muaj haus, lawv thiaj tau noj tau haus tsau (Ntawv Nkauj 104: 27-28). Vajtswv xyab tes tuaj thiab ib puas tsav yam puav leej muaj sia ua neej nyob hauv Vajtswv txoj kev hlub. Thiab Tswv Yexus hais meej meej tias: “Txawm yog nej yog neeg txhaum los nej tseem paub muab yam uas zoo rau nej tej menyuam. Yog li ntawd, nej Leej Txiv tus uas nyob saum ntuj ceebtsheej, nws yim huab yuav muab tej uas zoo dua tej ntawd rau txhua tus uas thov nws thiab! (Mathais 7:11).
Vajtswv tau pub yam uas kuv thov rau kuv – tsis yog tas li xwb. Zoo li Xalumoos, Vajtswv tsis yog tsuas pub kev txawj ntse, nplua nuj thiab hwjchim xwb, tiamsis tseem pub Vajtswv tus kheej rau kuv. Vajtswv tsis yog tsuas pub lub homphiaj rau kuv ua neej xwb tiamsis tseem ua siab ntev nqua hu thiab coj kuv tig mus rau ntawm Vajtswv, kom kuv ntsia pom tias txoj kev sib raug zoo ua ke nrog Vajtswv muaj nqis tshaj tej koob hmoov uas Vajtswv tau pub rau kuv. Thaum kuv pib muaj ntau lub nra, muaj ntau txoj kev txawj, suab npe pib nrog thiab muaj khoom ntiajteb ntau nrog rau ntau txoj kev ntxeev ntxias ua rau kuv lub siab no nyuaj ntsia pom tej yam uas yog, tiamsis Vajtswv yeej ncaj ncees rau kuv, nqua hu kuv kom tig mus rau ntawm Vajtswv tus ua tau txhua yam.
Koj puas txiav txim siab ua yam ntawd? Koj puas ntseeg tias Vajtswv yog tus ua tau thiab Vajtswv muaj cuab kav pub yam uas koj cheem tsum rau koj? Koj puas zoo siab hlo los cuag Nws thiab hlub Nws tshaj txhua yam, ib yam li Vajtswv thiaj yog koj qhov khoom plig tiag tiag thiab yog koj qub txeeg qub teg nyob mus ib txhis tiag tiag? Xalumoos thaum kawg ho ntxeev siab rau tus Vajtswv uas yawg twb hwm puas thaum ub los, thaum yawg saib txoj kev txawj ntse thiab kev nplua nuj uas tseem ceeb dua kev sib raug zoo ua ke nrog Vajtswv, thaum kawg yawg poob txhua yam. Tiamsis muaj ib tug Cawm Seej tau los thiab zam tag nrho peb tej kev txhaum, thiab Vajtswv zoo siab hlo pub txhua yam uas peb taij thov. Cia li los cuag Nws hnub no.
Thov caw nrog kuv peb thov Vajtswv ua ke:
Ua Vajtswv tsaug vim Koj yog tus ua tau txhua yam, ua ntau tshaj tej uas kuv thov thiab xav! Thov Vajtswv pab kom kuv nco ntsoov txoj kev sib raug zoo ua ke nrog Koj muaj nqis tshaj txhua yam. Thov pab kom kuv tsis raug nqus mus rau tej yam uas muaj nqis hauv ntiajteb no, hnov qab koj txoj kev tsis muaj nrim. Thov Vajtswv coj kuv kev txhua hnub, kom kuv mus nrog koj txoj kev hlub uas tsis muaj nrim thiab ncaj ncees rau koj mus ib txhis. Kuv thov hauv Tswv Yexus Khetos lub npe. Amees.
Cov kwv tij txhua tus, thaum txais yuav tej koob hmoov uas Vajtswv pub, nco ntsoov tias txoj kev sib raug zoo ua ke nrog Vajtswv nws muaj nqis tshaj txhua txoj koob hmoov uas muaj nrim. Txhob cia tej koob hmoov uas Vajtswv pub ua rau koj khiav deb Vajtswv, tiamsis peb yuav tau cia tej ntawd dhau los ua ib tug choj txuas ntawm koj mus ze Vajtswv dua. Yuav tau ceev faj thiab txo hwjchim kom pom tias, Vaj Leej Txiv txoj kev hlub thiab kev tshwm ntsej muag thiaj muaj nqis tshaj plaws.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.