Ò gơs bơta lơi niam rlau mơ dô rài kis geh khat gơboh, tiah he gơs gơnoăr lơh ală bơta he kơp kỡn mơ ò geh bơ kơ̆u. Mơya, gơs dô bơta khat gơboh găm lòt rlau bơta khat gơboh rài do: Hơ̆ la bơta khat gơboh đah hwing. Hơ̆ la bơta lik klàs bơh che sreng cau sò tơm di, dô bơta khat gơboh wil tơl geh ai pà bơh bơta nđàc mơ gơnap gơnoăr dờng Bèp hơđăng trồ di.
Ngai do, ngai 02/09/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Aaron Little dê bơh Tơnggume GEH KHAT GƠBOH BƠH GƠNAP GƠNOĂR YANG.
“Tŭ do añ git nền ngan Yàng neh sồr cau gơnrơh Kơnràñ dê lòt dong tă añ…” (Broă 12:11)
Kọn mơnùs sum kòl tồi glài gut dăr bơh ală đah. Đơs buơn rlau la, tồi glài la bơta ò dòn bơr mơ Yang. Gơs dơ̆ tồi glài loh lang, mơya oă dơ̆ găm la ală “bơta tìs pồn ndơp” gen bŏl he chài rgơi pồn dơp ting jat tơnơ̆ đah bơdih rài kis kòp ngai. Tŭ tơngai lòt găn, dilah ò dòp git, gơjrañ săng glài mơ klọ săng tồi glài, bŏl he rơp rhòi rhòi kòl tồi glài gơ cap wơl. Rài kis gơlik gơs kơnjơ̆ kơnjut hơđơm ơnòng tồi glài di mơ lơh jat jơnau Satan di. Bŏl he gơplơ̆ nùs, rùc wơl, rhòi rhòi gơtơndùh tom srat bơtang, mơ lồi dut la gơ kram he lơh roh bơta gơn kơnòm tŭ tồi glài at bồ jơh he. Hwing soan he kơp kỡn geh lik klàs bơh bơta at bồ đah hwing hơ̆.
Sră Goh Broă tap 12 cèng tus dô jơnau yăl tơnggit, tềl sơñio lọh lang gơnap gơnoăr dờng Yang di dŏng tă bŏl he lik bơh di sề cau iơh. Bơtau Herot tiang pơn ro bơh bơta lơh iơh, neh kup jàm ală cau at bồ dờng hiu jum goh sơnrờp bồ dà di, bơh dô bơta koñ at bồ di làng bŏl. Herot neh tơ chớt cau Gơnoăr Bơtô Jakơ, mơ dòp git broă lơh hơ̆ loh cau Juđa chò nùs, ồng ting jat kup jàm Pier koñ lơh be ồng Jakơ. Pier kòl jàm, hơđơm ală cau kơpgar bơh poăn mpồl ling. Gơwèt mơ Pier gơlơh be ò gơs bơta gơn kơnòm, mơya Hiu Jum Goh ò dơh họi dăn mơ Yang ồng ĭn.
“Tòm mang lài mơ ngai Herôt neh lơh nền tơlik Pier nàng cahrña, gen khai ơm bic digùl bàr nă cau ling mơ kòl kơt mơ bàr dang che sreng, mơ di bơr mpồng hìu jàm gơs cau ling kơp gàr. Nisơna gơs dô nă cau gơnrơh Yàng dê tơlik să, mơ gơs bơta àng sòl gơcrà tòm hìu jàm. Cau gơnrơh tur di wĕ Pier, pơrlai khai guh mơ đơs lah: “Guh tĕ mhar;” gen che sreng gơrung mo bơh di tê khai. Cau gơnrơh đơs lah: “Kơt tĕ but mơ jă tĕ gơltau jă.” Pier lơh jat behơ̆. Cau gơnrơh đơs tai lah: “Soh tĕ ào jrùh nàng lòt jat añ.” Pier lòt jat mơ ò git bơta cau gơnrơh lơh hơ̆ la ngan, mơya tồnlah gŏ bơta gơtơnggŏ gơ dê. Tòm tŭ neh sơrlèt rlau di tiah kơp sơnròp mơ tiah kơp bàr, gen tus hơ mpồng lòs, la mpồng mut song tòm ƀòn dờng; mpồng hơ̆ gơ pò is bol khai in, lồc behơ̆ bol khai lik mơ lòt tòm gùng me, gen tŭ hơ̆ mo cau gơnrơh lòi is Pier. Gen Pier kah wơl mơ đơs lah: “Tŭ do añ git nền ngan Yàng neh sồr cau gơnrơh Kơnràñ dê lòt dong tă añ lik klàs bơh di tê Herôt mơ bơta kơp gơn làng bol Juda dê.” (Broă 12:6-11)
Kơlôi tồn lah ò gơs tiah dô lik, Yang Tom Trồ gơnap gơnoăr neh dŏng tă Pier dô bă krơi is ngăn. Do la cơng tang gơnap gơnoăr ĭn gen Kơnrẵn ai pà bŏl he ĭn, dŏng bŏl he bơh bơta kŏng cap tồi glài di tom rài kis mơ geh khat gơboh wil tơl.
Pier kòl jàm mơ ò tŭ lơi kơnòm pràn is dô lik bơh bơta rọh gơcọh hơ̆, tŭ cau sò tơm gơs kai gơmơ̆ koñ tơnrọh ồng. Tom tŭ hơ̆, Hiu Jum Goh găm ò dơh họi dăn, ơn wil tơl bơta dòn di Yang. Rác dăn bơta dŏng tă. Lồi dut, Yang neh ho wơl jơnau hòi dăn hơ̆, Kơnrẵn neh tus mơ dŏng tă lik klàs Pier bơh che sreng cau sò tơm di.
Jơnau yăl tơnggit do la cơng tang bơta dŏng tă Yang ai pà kòp bŏl he, lơh nền cê lah Kơnrẵn rơp dŏng tă bŏl he lik bơh che sreng đah hwing tom rài kis do.
Mơya, sơnrờp ngăn la bŏl he păl dòp git să tom he ò gơs bơta gơn kơnòm, ò jai dŏng tă is să he. Băñ hŭi lah tơnggume cau sò tơm di la tơn rọh bŏl he, mơ bơta dŏng tă mìng rơp tus di bŏl he ơn bơta dòn tom Yang.
Pơnjat, kis tĕ tom klac mơ mpồl jơnŭm dòn duh, ală cau rơp họi dăn mơ chồl bơtrut bŏl he tom gùng dà kal ke do. Kis tĕ tom bơta dòn, dòp leng bơta khat gơboh đah hwing nàng geh dŏng tă lik klàs bơh ală gơnoăr klăm jơngọ găm jọi kai koñ tơn rọh bŏl he, mơ kơp gơn bơta khat gơboh găm sum sum Yang neh ho ai. Bŏl he geh lik klàs kơnòm bơh gơnap gơnoăr dờng Yang Tom Trồ di. Ưnngai tĕ mơ hòn-chò tài bơh bơta khat gơboh Yang neh ai pà he ĭn ngai do.
Dăn jà bŏl he họi dăn mơ Yang:
Ưnngai Yang tài bơh bơta nđàc dŏng tơwài mơ bơta khat gơboh niam ngăn Kơnrẵn neh ai pà kọn ĭn. Ưnngai Kơnrẵn tài bơh bơta nđàc dờng òs sum tơngkah tơngkăñ nàng dŏng tă tơlik kọn lik bơh ală che sreng cau sò tơm di. Dăn Yang bơtô kọn git ơn bơta dòn di Kơnrẵn, bulah tom ală tŭ kọn rọh bơta gơn kơnòm rlau jơh, git lah gơnap gơnoăr dờng rlau jơh Kơnrẵn di pha lin sum sum. Kọn jơh nùs họi dăn, Kọn ai sơnđăn Yang Jesu Krist, Amen.
Ơ ală ồng mọ ọh mi koñ gơboh, bulah he găm kòl jàm bơh tồi glài hala gơlơh be rọh bơta gơn kơnòm mbe lơi, gơnap gơnoăr mơ bơta nđàc Yang di găm tơngkah tơngkăñ nàng dŏng klàs he lik bơh ală tŭ bŏl glăr kal ke rlau jơh. Kah tĕ lah ò gơs bơta lơi la dờng ir hala kal ke ir tus di Kơnrẵn ò phalin bơh he. Ơn tĕ bơta dòn tom bơta koñ gơboh dờng ò git nđợ Kơnrẵn di, mơ pò nùs wă rò bơta dŏng klàs Kơnrẵn neh rcang he ĭn. Yang Tom Trồ la Bơtau Dŏng tơwài, mơ Kơnrẵn rơp tề lăm he tus di tiah lơngap lơngai mơ khat gơboh ngăn.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply