Ồng mò oh mi sên gó lah, ală bơta gơlik gơs ò jat nùs he sơl? Bulah bol he neh rcang dô bă loh lang mbe lơi, kung rơp gơs ală bơta gơlik gơs tòm tú jơ lồi dut. Bơta do sơnio he in gó lah bol he ò gơs gơnoar lơi tòm bơta at bồ, mơ gơ ơm tòm tê Yàng. Ala mơ bơta bol he pơnđơl nàng at bồ is ală bơta , bol he pal jao phi té Yàng in – Bơtau at bồ hơđang ală bơta.
Ngai do, ngai 03/09/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Esteban Castro dê bơh tơnggume: BƠTAU SƠMBAT KỚ BƠTA AT BỒ.
“Yàng Jehôwa đơs: “Bơh Añ git bơta kơlôi sơnơng Añ jê gơwèt mơ bol mê, la bơta kơlôi sơnơng lơngap lơngai, ò di la rung rài, nàng bol mê in geh bơta gơn kơnòm tòm ngai tơnơ̆ bol mê dê.” (Jeremi 29:11)
Tú bơta tòm bau kon ur ẵn jê digah dà lêng mòr sơntòm, gen gơs calrbut dơng tus. Do la dô bơta long dơng bơta dòn ẵn in.
Miu dơng duh ò tú lơi dơh. Càl khồm dơng, mơ bulah bơta yal lài trồ tơngai kung ai git lah ngai hớ rơp prang niam, mơya dô nă cau ndai neh ai git rơp gơs cal rbut dơng tòm trồ mho.
“Khoai Yàng, dan Yàng ai trồ tiah niam tòm tú sơntòm bơta tòm hòp bau, mơ kon dòn lah Kơnrẵn rơp tề lam kon ur kon dê ală bơta pal lơh” – ẵn hòi dan is tòm nùs.
Đah mơ tiah rcang bơta tòm hòp bau đơs lah kon ur ẵn jê pal lơh nền rơp lơh bơta tòm hòp bau tòm hiu hala digah dà lêng.
Kon ur ẵn jê gơboh bơta sơntòm tòm hòp bau tòm gah dà lêng, mơya ò rgơi kơlôi tus di càlrbut mơ càl chais. Ẵn ai lah niam rlau jơh la pal lơh bơta tòm hòp bau tòm hiu, tiah gơs phan rcang niam bơta tòm hòp bau in. Ẵn lòi bơta do tòm nùs is mơ hòi dan, ò đơs dô nă cau lơi in.
Ò di la jơh tơl nă cua lơh mè kung kơp kỡn bơta tòm hòp bau kon he de gơlik gơs niam rlau jơh ơ? Mơya ò di tú lơi kung jat nùs he kơp kỡn ò ơ? Ngan la ò, bơh rơp gơs ală bơta ò di gơlik gơs bulah he neh crang dô bă nên nề. Sùm gơs bơta tòm gơl tòm tú jơ lồi dut, mơ gơs tú la bơh trồ tơngai.
Ẵn lòi húi bơkao ơn tòm ao tòm hiu mơ roh dô đah pơnô. Bơtoah bơtoai ẵn in la gơs dô nă cau ai ẵn in yòng pơnô di pal mơ che wan ẵn jê. Đah mơ bơkao ẵn ngui bơkao jêng nàng ala. Cau gơp đềt mêr jó năm ẵn jê neh dong ẵn rcang bơta rcang sir lồi dut tòm pơnah tòm bau tòm mho ngai hớ, mơ bàr nă bol he kung neh git wă bơh dê bơta tề lam bơta tòm bau, ală bơta gơlik gơs niam lơm kơnòm di bơta rcang sir niam rlau jơh Yàng dê!
Bơta tòm hòp bau gơlik gơs niam rlau jơh, bulah bơta tòm hòp bau sơm tòm chơrla rlau mơ tú jơ lơh nền. Gơp bơyô mơ gơp bơtiàn kung neh kong ơt, ơt ơl bal tòm bơta kơp gơn. Ơt ơl la dô bơta niam, ẵn đơs kơnhơl lah Yàng neh ai ală cau nac crih in dô tú jơ nàng bơtê bơta ơt ơl tòm ngai hớ.
Bơh bơta sơntòm chơrla, gen cau bơrtơu lơh nên lah lơh lởi lòm bơta chụp rup nàng ală cau nac crih rgơi sa nô. Kon bơrtơu ẵn jê kung ơn măi quay nàng rgơi quay wơl ală bơta gơlik gơs tòm ngai hớ.
Ngai hớ, ẵn gơs bàr bơta kơlôi sơnưng tòm dơngoh. Ẵn kơlôi tus Bơtau Krist mơ cau ur tòm bau mơ Kơnrẵn la Hiu Jum Goh, tòm bơta tòm bau hơđang trồ. Hớ ngan ming la dô bơta tòm bau niam rlau jơh. Dớ bàr tai, ẵn kơlôi tus bơh bơta mơ Yàng ho wơl jơnau hòi dan ẵn jê. Bơta tòm bau geh lơh tòm hiu, bulah trồ tơngai niam. Cau nac crih gơs tơl mat, mơ ẵn git lah Yàng at bồ tòm ală pơnah. Ming dô nă Kơnrẵn rgơi ai bơta jak chài kon ur mơ kon bơrtơu ẵn jê bơta chài rgơi tòm bơta sac rwah tú lơh nền, mơ să tòm Kơnrẵn neh ai dô yô ur klau hớ in dô ngai tòm bau niam.
Jơnau Yàng tòm Jeremi 29:11 cih lah:
“Bơh Añ git bơta kơlôi sơnơng Añ jê gơwèt mơ bol mê, la bơta kơlôi sơnơng lơngap lơngai, ò di la rung rài, nàng bol mê in geh bơta gơn kơnòm tòm ngai tơnơ̆ bol mê dê.”
Kơnrẵn lơh dà lêng ơm thit, mơ kơryan calrbut, ai bơta lơngai ală cau rac dan in. La mè cau ur dê, ẵn git gơboh ală bơta tề lam Yàng dê hơđang rai kis kòn Kơnrẵn dê. Kon ur ẵn jê la dô nă cau ur hang mơné. Bơta hang mơné hớ gơ đềt bal mơ ală bơta rcang gùt dar. Ẵn sên gah mpồng dềt mơ sền dà lêng. Hớ la dô bơta niam rlau jơh, mơ ẵn kah sum ală tú jơ chò hòp mơ jơh tơl nă bol he neh gơs bal, tú ală cau kơnòm nõ mơ kơnhơl, ală cau nac kung chò hòp bal mơ dô yô ur klau tòm ngai hớ.
Sră Đơs Crih 107:29 sơnio wơl he in dô nơm rùp niam bơh bơta krơi is mơ Yàng neh lơh tòm ngai hớ:
“Kơnràñ sồr càl rbut ơm mŏ mŏ,
Mơ ală ryà dàlềng ơm ring.”
Ẵn hòi dan nàng ơn jơh gơnoar at bồ Yàng in, bơh Kơnrẵn la cau dong kơl rơndap bơta tòm bau niam rlau jơh. Tòm Sră Goh, Yàng đơs lah Kơnrẵn sồr calrbut ơm mó mó. Yàng ai bơta lơngai ală nùs nhơm dơrcul lơnggơr in, bơh jơh ală bơta bol he pal lơh la dòn kơnòm di Kơnrẵn, mơ bol he rơp sên gó bơta lơngai digul ală cau rbut kòp ngai.
“Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền”
(Rôma 8:28)
Dan jà bol he dô nùs bal tòm bơta hòi dan:
Khoai Yàng, kon dan ơn Kơnrẵn in jơh ală bơta kơlôi rcang kon dê. Kon dòn nền lah Kơnrẵn rơp tề lam kon tòm ală bơta gơlong bol glar mơ ceng wơl bơta lơngai hwềng nùs kon in. Dan Kơnrẵn ai kon in dô nơm hwềng nùs kớ cê nàng rgơi ntào kớ di đap càlrbut tòm rai kis. Kòn git lah gơwèt mơ Kơnrẵn, ò gơs bơta lơi la ò rgơi, mơ Kơnrẵn sùm gơs bơta rơndap tap seng niam kon in. Kon hòi dan tòm sơnđan Yàng Jesus Krist, Amen.
Ơ ală ồng mò oh mi kỡn gơboh, Yàng sum gơs bơta nàng lơh cal rbut in ơm mó mó mơ jơm gom kon sau Kơnrẵn dê tòm bơta lơngai. Ala mơ bơta pơnđơl pràn is nàng lơh jơh ală bơta, gen he ơn té Yàng in at bồ jơh ală bơta mơ dòn kơnòm Yàng jat bơta tề lam Yàng dê. Tú hớ, bol he rơp ò rngòt mơ dơrcul tai di đap ală bơta gơlik gơs dô bă nisơna tòm rai kis, bơh bơta lơngai rlau mơ bơta git wă Yàng ai nàng tề lam bol he tòm ală gung dà.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply