Koj puas hnov qaug zog, tag kev cia siab rau tej teeb meem nyob hauv lub neej? Tej zaug koj tab tom ntsib tej kev sim siab uas cuag li koj yeej kov tsis yeej, lossis tej kev mob siab loj uas cuag li tiv tsis dhau. Thaum tag kev cia siab, Peb yuav tau ceeb toom yus tus kheej tias: txawm yog peb yuav tsis nkag siab tag nrho txhua yam los, Vajtswvyuav coj peb mus rau ntawm qhov xaus uas zoo, .
Hnub no, yog hnub 04/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sandra Holcombe dhau ntawm Zaj kawm VAJTSWV PAB KOV YEEJ KEV TU SIAB.
“Tus Tswv foom koob hmoov rau Yauj lub neej zoo heev dua thaum chiv thawj. Yauj muaj kaum plaub txhiab tus yaj, rau txhiab tus ntxhuav, ob txhiab tus nyuj thiab ib txhiab tus neesluav.” (Yauj 42:12).
Kuv hnov tsis tshua txaus siab rau Yauj qhov teeb meem. Hais tau tias ntawm no yog phau uas kuv nyiam tshaj plaws nyob hauv Vajluskub. Yog, kuv paub tias Yauj tau Vajtswv pab. Tiamsis tshuav tej teeb meem uas Yauj ntsib no ne? Yuav ua cas? Puas muaj txoj kev mob twg mob dua qhov uas tej mej nyuam tuag tag? Yauj tsis tshuav ib yam dabtsi li lawm. Yauj poj niam ces kom Yauj foom phem rau Vajtswv thiab tuag mus. Yawg Yauj kuj pom tias txoj kev tuag yog txoj kev zoo tso yawg dim lub sijhawm no.
Tseem nyuaj siab dua yog, Yauj tej phooj ywg uas ib txwm txhawb yawg zog, ho txiav txim rau yawg hais tias yawg yog tus uas tsim muaj tej teeb meem ntawd, lawv tseem hais tsis zoo rau Vajtswv (Vajtswv twb rhuav tshem lawv cov lus nyob hauv Yauj 42:7). Yog li txawm yog thaum kawg Vajtswv twb pab thiab rov kho Yauj lub neej lawm los kuv tseem hnov chim thiab npau taws. Yauj tej menyuam uas tuag lawm lawm yeej tsis rov qab los, yog li txawm yog thaum kawg Yauj tau kho dua los – kuj tsis pom zoo siab li.
Tsis ntev los no, kuv pheej nrhiav tej zaj xwm txheej uas zoo luag. Kuv nyiam saib tej zaj yeeb yam uas zoo xwb. Hos tej yeeb yam uas ua tau txaus tu siab mas kuv yeej tsis xav saib hlo li.
Tej zaug peb kuj ntsib dhau ntau txoj kev txomnyem, tshwj xeeb yog ob peb xyoo tag los no. Nyob rau lub sijhawm uas kab mob kis tshwm tuaj, kuv tau ncaim kuv ib tug kwvtij uas kuv hlub thiab tau ncaim kuv ob peb tus phoojywg zoo. Ua ntej ntawd, kuv kuj ntsib dhau tej kev txomnyem, tsis ntev los no, kuv ib tug txheeb ze tau tso peb tsev neeg tseg lawm thiab.
Tseeb tiag, kuv totaub tias tej teeb meem no yeej tshwm muaj nyob hauv lub ntiajteb no. Zoo li txoj kev mus rau ntuj ceeb tsheej yuav tau so ntawm tej lub tsev qhua uas txomnyem ntxuav. Peb tabtom ua neej rau hauv ib lub ntiajteb uas muaj ntau yam kev phem, thiab peb tsuas pom ntuj ceeb tsheej zem zuag xwb.
Qhov uas peb muab yus txoj kev txomnyem mus piv rau lwm tus tsuas ua rau peb yim hnov mob siab xwb. Ib tug nyias ntsib nyias ib txoj kev txomnyem sib txawv; yog li peb yeej tsis paub tias tus twg thiaj txomnyem dua tus twg. Txawm yog kev mob siab thaum ib tus neeg txheeb ze tau tag sim neej, kev mob siab thaum tsis tau lwm tus lees txais, lossis txoj kev txomnyem nyob hauv tej kev rov txog los – txhua txoj kev txomnyem ntawd yeej nyhav dhau peb lub peev xwm lawm.
Tej zaug Yauj txoj kev txomnyem yeej ua rau Yauj hnov tag kev cia siab tsis paub yuav ua li cas. Thiab txawm peb nyias muaj nyias ib txoj kev nyuaj siab sib txawv los, tag nrho peb puav leej xav nrhiav kom tau txoj kev pab peb dim ntawm tej teeb meem ntawd.
Yog koj tab tom tsau tsawv rau hauv tej kev sim siab, cia li tig rov qab mus saib Yauj. Txoj kev nyuaj siab uas yawg ntsib ceeb toom rau peb tias peb tsis nyob ib leeg hauv txoj kev txomnyem no.
Txuas ntxiv, cia li qhib Yaxayas 53 los nyeem tej lus cev txog Yexus Khetos raug txomnyem, thiab hla mus rau cov phau moo zoo saib txoj kev uas Tswv Yexus raug ntes thiab raug muab ntsia saum ntoo khaublig. Sim muab tej uas Tswv Yexus ntsib dhau thiab tej lus uas tau hais nyob hauv Yauj 16:10 los sib piv. Koj yuav pom tias qhov no nthuav tawm meej meej txog tej yam uas Tswv Yexus tau tiv.
“Tej neeg tuaj nyob puagncig kuv, lawv hais lus saib tsis tau kuv, thiab xuastawg ncuav rau kuv lub plhu” (Yauj 16:10).
Thaum koj muab Yauj qhov teeb meem los sib txuas ua ke nrog Cawm Seej Tswv Yexus txoj kev txomnyem, koj yuav pom tias Vajtswv muaj cuab kav muab yeebncuab lub tswv yim phem ntawd pauv los ua ib yam zoo. Nyob hauv txoj kev uas nrog tus Tswv mus txhua hnub, yuav muaj tej hnub peb pom kev txomnyem puv npo, tiamsis kuj muaj tej hnub yuav puv npo kev cia siab thiab kev muaj yeej.
Nyeem Yauj zaj xwm txheej, peb saj tau txoj kev mob vim paub tias tib neeg kev ua neej ntau zaug tsis tas yuav zoo li ntawd. Lub Vaj Edees ib txwm yog qhov chaw zoo, yog qhov chaw zoo tshaj plaws thaum pib uas tib neeg ib txwm muaj.
Myles Munroe, yog ib tug tuaj qhia hauv peb lub pawg ntseeg tau piv hais tias, lub qab ntuj no zoo li ib lub chav tu cov menyuam yaus. Ho muaj ib phau ntawv ces sau tias “Vajtswv nyiam lub ntiajteb no heev, thiab lub qab ntuj no qhia tawm txhua yam zoo nkauj uas nyob saum ntuj ceeb tsheej. Thaum ntsib teeb meem, kuv xav txog tej lus no thiab kuv hnov zoo siab.
Vim thaum kawg, txawm yog peb yuav ntsib txoj kev mob siab hauv ntiajteb no, tiamsis peb sab ntsuj plig paub tias Ntuj Ceeb tsheej tabtom tos txais peb. Vajtswv li koob hmoov nplua mias thiab Nws yuav txhawb peb thiab tuav peb tes, ris peb tej nra nyhav, coj peb kev thiab kho peb lub neej kom rov qab zoo li Yauj:
“Tus Tswv foom koob hmoov rau Yauj lub neej zoo heev dua thaum chiv thawj. Yauj muaj kaum plaub txhiab tus yaj, rau txhiab tus ntxhuav, ob txhiab tus nyuj thiab ib txhiab tus neesluav.” (Yauj 42:12). Tsuas yog Vajtswv xwb thiaj yuav coj tau peb hla dhau lub tiaj nrag kev tuag. Tso peb dim ntawm yeebncuab txoj hlua khi, thiab tshuab pa tshiab rau peb lub neej.
Thaum xav txog Yauj zaj xwm txheej puas yuav ua rau kom kuv nyiam dua? Kuv teb tias ntshe tsis ua. Tiamsis kuv pib saib zaj xwm txheej no muaj nqis dua – zoo li ib ntsiav tshuaj iab tiamsis nws yuav pab tau koj zoo mob nkeeg.
Thov caw nrog kuv peb thov Vajtswv ua ke:
Tus Tswv Yexus, yog tus muaj siab ntev thiab muaj kev hlub tsis paub kawg, thov Koj pab kuv kom kuv nco ntsoov Koj txoj kev ua siab ntev thiab Koj txoj kev hlub, txawm yog tej lub sijhawm uas txomnyem tshaj plaws hauv lub neej los, thov pub kom kuv ua siab ntev thiab muaj lub siab ntseeg ruaj khov rau koj tej kev txawj ntse, kom kuv txais tau kev kho zoo kuv tej qhov txhab uas nyob tob tshaj plaws, txhawb cov neeg uas muaj kev tu siab, thiab rov qab pab cov neeg uas muaj kev puas tsuaj uas lawv tab tom ntsib. Kuv thov hauv Tswv Yexus Khetos lub npe. Amees.
Cov kwv tij txhua tus, lub sijhawm uas tsaus ntuj tshaj plaws hauv lub neej, thaum uas txhua yam cuag li qaug tas thiab koj txoj kev ntseeg yoj yees, nco ntsoov tias koj tsis nyob ib leeg. Muaj ib tug Tswv Nws nyob rawv ntawd, tos mloog koj thiab teb koj tej lus taij thov. Cawm Seej Tswv Yexus yog tus uas twb tiv tej kev mob ntawd thiab sim siab tshaj plaws, nkag siab zoo tshaj tej uas peb tab tom ntsib. Vajtswv tab tom tos yuav muab koj puag rau hauv Vajtswv txhais tes, pub lub zog thiab kev txhawb zog rau koj tsuas yog Vajtswv xwb thiaj muaj cuab kav ua tau rau koj.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply