Puas tau muaj zaum twg koj hnov yus lub siab cuag li raug khi thiab txaj muag vim tej kev txhaum yav dhau los? Tej kev mob siab, tej lus yus cim civ cem yus tus kheej ua rau koj hnov cuag li yus tsis tsimnyog txais tau Vajtswv txoj kev hlub, thiab tsis kav qhib siab los qhuas Vajtswv lub npe? Yog li, peb yuav tau ua li cas thiaj yuav khiav dim tej lub voj hluas khi thiab tej lub nra nyhav hauv lub siab?
Hnub no, yog hnub 05/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Daphne Delay dhau ntawm Zaj kawm QHIB LUB SIAB KOM DAV.
“Nej cia li qhia hlo nej lub siab rau peb!” (2 Kauleethaus 6:13).
“Cov kwvtij uas nyob hauv lub nroog Kauleethaus, peb twb nthuav peb lub siab lub ntsws qhia tseeb rau nej lawm, peb tsis tau zais ib los hlo li. Peb tsis tau zais siab rau nej , tsuas yog nej thiaj zais siab rau peb xwb. Kuv suav hais tias nej yog kuv cov menyuam, kuv thiaj hais li no rau nej, nej cia li qhia hlo nej lub siab rau peb ib yam li peb twb qhia peb lub siab rau nej lawm. (2 Kauleethaus 6:11-13).
Paulus tsab ntawv tsis yog tsuas tseg rau cov ntseeg hauv Kauleethaus xwb, tiamsis kuj yog tseg rau koj thiab kuv. Nyob rau ib lub sijhawm twg hauv lub neej, tej zaug peb yuav hnov tias yus twb tau ua ib lub neej qia dub zoo li ntu Vajluskub no.
Kuv twb ua neej nyob rau ntau qhov chaw: ntiav tsev nyob, nrog phoojywg nyob ntawm tsev kawm ntawv, nyob tsev loj txog tsev me huvsi. Tiamsis yam uas ua rau tej chaw nyob ntawd zoo tshwjxeeb tsis yog thaj chaw loj lossis me tiamsis yog qhov uas Vajtswv tshwm ntsej muag rau thaj chaw ntawd. Tseeb tiag, muaj ntau yam zoo uas kuv muaj yog los ntawm tej lub sijhawm uas kuv nyob hauv tej qhov chaw me me ntawd – zoo ib yam li thaum uas kuv yuav tau tshawb nrhiav tag nrho kuv tej nyiaj me hauv hnab mus yuav roj tsheb. Txawm yog ua neej txomnyem rau tej qhov chaw me li ntawd los, kuv tsis ua lub neej qia dub. Kuv kawm tau tias muaj ib tug Vajtswv loj tshaj plaws hlub kuv.
Thaum tseem hluas, kuv ntsib ntau txoj kev txhawj. Thiab lub nra nyav ntawd tsis yog tuaj sab nrau tuaj tiamsis yog tawm hauv kuv lub siab los. Tej lus thuam, tej lus tsis zoo nrov hauv kuv lub hlwb tuaj, ntau zaug tseem loj dua thiab txaus ntshai dua txhua lo lus uas los ntawm lwm tus los. Yeeb ncuab tshoov kuv lub siab ua rau kuv cim civ hem kuv tus kheej.
Tiamsis nyob rau lub sijhawm ntawd, Vajtswv yeej nthuav tawm Vajtswv txoj kev hlub pub rau kuv tsis tseg dhau ntawm Vajtswv txojlus . Kuv nyiam txhua zaug uas kuv tau mus hauv tuam tsev, koom siab hu tej txoj nkauj qhuas Vajtswv – Vajtswv txojlus sib xyaw nrog tej suab nkauj, dhau los ua ib lo lus thov nyob hauv kuv lub siab. Paulus txhawb cov ntseeg Kauleethaus zog kom lawv yuav tau qhib lawv lub siab, thiab ntawd kuj yog yam uas kuv tau ua. Txhua zaug uas tsa suab hlo hu nkauj qhuas Vajtswv, kuv kuj tshem tag nrho txhua yam kev tav hauv kuv lub siab mus, tsis quav ntseg txog qhov uas puas yuav hu nkauj lossis tsis hu, kuv tsuas tsom ntsoov muab kuv lub siab fij tag nrho rau Vajtswv.
Thaum koj tau ua neej nyob rau hauv tej qhov chaw nqaim li ntawd, yeej tsis muaj ib yam dabtsi yuav zoo tshaj qhov uas koj tau tawm mus sab nraud ua si – zoo li koj txhais taw thiab sab ntsujplig puav leej tau tso dim. Qhov no kuj yog rau peb lub siab. Peb lub siab tsis yog tsim los tsis yog muab kaw cia. Kuv ntseeg tias Vajtswv zoo siab thaum ntsia pom peb pib qhib siab, cia Vajtswv – yog qhov tseeb- nkag mus rau hauv qhib peb lub siab kom nthuav dav.
Tiamsis yuav dhau ib lub sijhawm ntev kuv mam kawm tau zaj no. Kuv nco muaj ib zaug, thaum kuv tab tom sawv hauv tuam tsev thiab tsa suab hlo hu nkauj tag kuv lub siab, ces muaj ib lub suab nws nrov txhia iab siab heev hauv kuv lub siab tias: “Koj xav tias koj yog leej twg? Cia li txo koj lub suab qes thiab coj kom yog kev. Koj hnov qab tej haujlwm phem uas koj tau ua lawm los?” Tamsim ntawd, kuv cia li nyob twj ywm. Lub suab ntawd ua rau kuv nco txog tej kev txhaum yav dhau los. Vim tsis nkag siab zoo txog Vajtswv tej lus ib yam li Vajtswv txoj kev hlub, kuv tsis pom tias, tsis yog Vajtswv tabtom tav kuv – tiamsis yog yeebncuab tab tom muab kuv khi cia hauv txoj kev ntshai thiab khuv xim.
Ua Vajtswv tsaug, tomqab ib lub sijhawm ua siab ntev nyeem Vajluskub, mus pehawm, qhuas Vajtswv thiab thov Vajtswv, Vajtswv tau rhuav tshem tej kev xav phem hauv kuv lub siab. Kuv muaj ib lub neej nthuav dav, ywj pheej uas Vajtswv twb npaj txhijtseg rau kuv thiab pub rau kuv. Kuv nco Vajtswv tshav ntuj vim tau nrhiav pom lub neej ntawd.
Yog tias koj hnov koj raug khi cia, tej zaug koj lub siab yuav tau muab qhib. Ib yam li Vajluskub tau qhia, koj yeej tsis raug khi los ntawm lub caijnyoog lossis ib yam dabtsi twg: “…tsuas yog nej thiaj zais siab rau peb xwb. (2 Kauleethaus 6:12). Muab ua lwm lo lus hais, yeej tsis muaj leej twg yuav kaw tau koj lub siab tshwj koj tus kheej. Yog li, txawm yog koj yuav ntsib pes tsawg yam tsis zoo los yog koj qhib siab txais yuav Tswv Yexus ua tus coj koj mus rau lub neej txoj kev dav, puv npo kev hlub thiab kev ywj pheej.
Thov caw nrog kuv peb thov Vajtswv ua ke:
Tus Tswv uas muaj kev hlub, kuv thov muab tag nrho tej nra nyhav, kev txaj muag nrog tej kev txhaum fij rau koj. Thov Koj los thiab kho kuv tej qhov txhab uas nyob tob kom zoo, rhuav tshem daim ntsa thaiv los ntawm Koj txoj kev kaj siab thiab zoo siab. Thov kom kuv lub siab no muaj kev ywj pheej saj tau koj txoj kev qab zib, kom kuv yuav nkag mus rau hauv lub neej puv npo koob hmoov uas Koj tau npaj tseg rau kuv. Kuv thov hauv Tswv Yexus Khetos lub npe. Amees.
Cov kwv tij, nco ntsoov tias koj tsimnyog tau hlub, tsis yog los ntawm tej koj ua, tiamsis yog Vajtswv twb tau xaiv koj, hlub koj thiab tuag rau koj. Vajtswv xav coj koj tawm hauv tej kev xav nqaim nqai uas muab koj khi cia ntawd thiab Nws xav pub ib lub siab tshiab, ywj pheej rau koj. Yog li, koj yuav tsum ua lub siab tawv hla dhau tej kev xav nqaim ntawd thiab qhib koj lub siab cia Vajtswv ua tus kav ua tus kho kom zoo dua mus. Vajtswv tab tom tos koj thiab yuav pub ib lub neej tshiab, kev cia siab tshiab rau koj nyob hauv Nws txoj kev hlub pub dawb.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.