Gơs ală bơta òs mơng mơ bơta ờs yau neh gơmùt jrô tòm rài kis bol he dê, tiăn gơs bol he ò đăl git tai lah he găm ngui lơh jat nùs is he dê nàng lơh wơl hala dơr-kwềt nus kờñ Yàng. Bol he òs lơh nền bơta kơlôi sơnơng mơ lơh lot is he dê hơđăng bơta sơñio lăm Kơnràñ dê, mơ dòn lah ming lơh behơ̆ song tơm toh. Mơya tòm ală bơta ơs mơng dô rgơi cèng wơl nùs ring lơngai mơ mơng đăl, bol he ò dê la gai rnoàs jơnau song.
Ngai do ngai 08/09/2024, tơnggu hòi dan kơp ngai dan ja ồng mò oh mi kờñ gơboh kơlôi sơnơng bal jơnau Yàng găn dê cau cih Jonathan Macnab bơh tơnggu mê NÙS YÀNG HALA NÙS IS?
“Gơs dô nơm gùng sền gơlơh be di pal jơi kòn-mơnus ĭn: mơya tus dê lồi-dut gơ gơlik-gơs gùng bơta chơt” (Jơnau Pơnđik 14: 12)
“Gơs dô nơm gùng sền gơlơh be di pal jơi kòn-mơnus ĭn: mơya tus dê lồi-dùt gơ gơlik -gơs gùng bơta chơt” (Jơnau Pơnđik 14: 12)
Ồng mò oh mi neh sền gŏ he neh sơm-bat geh gùng lot pơn-jat tòm rài kis he dê sơl? Tòm ală bơta lơh nền hơ̆ ngan gơs bơta lơh jat nus kờñ Yàng dê sơl?
Sră goh neh ai jơnau lah-pơrhơng loh làng ngan lah; Gơs ală gùng gơlơh be la tơm-toh ngan jat bơta sền gŏ jơi kòn-mơnus dê- ală bơta rơndap gơlơh be di pal mơ jak chai tòm dunnia do- mơya cồng nha lồi-dùt gèn gơlăm tus hơ bơta chơt. Hala đơs dô bă ndai, ală gùng hơ̆ ò gơlăm tus hơ cồng nha niam.
Kờp ngai, alak taman cau tòm dunnia do neh tis tòm tŭ sac rwah ală gùng lot mơ bol he dòn lah di. Ting hơ̆ kŭng gơs cau neh dòn jat Yàng kŭng ò pleh di ală bơta tis ndrơm be hơ̆, tŭ pơn-đơl “yăl tơlik” nus kơñ Yàng găn krơh sơr-pềt ală bơta git lam dê mơ kơp kờñ is he dê. Bol he lơh gơs dô bơta boh lam is Yàng in, yăl tơlik gùng lơh broă Kơnràñ dê kơnòm dê ală bơta he sền gŏ, mơ kơnòm ting hơ̆ nàng ai ală bơta lơh nền tòm rài tơnơ̆ tồ cèng wơl bơta he kờp kơñ.
Bulah behơ̆, jơnau Yàng neh săng lơi bơta kơlôi do. Bol he sền lăng wơl tĕ rài kis ồng Jop dê nàng wơng loh rlau tai. Yàng Tom Trồ đơs nền lah Jop la dô nă cau sŏng-ring – ông ò tis glài mơ sùm kis jòng-rơ Yàng mơ dô rài kis sŏng ngăn. Mơ nisơna, ông pal kŏng ală bơta jề-sồt mơ bol he kalke kơlôi tus. Ồng roh jơh ală bơta-bơta pràn, hiu-nhă, mơ phăn mơ-na- tiăn gơs ồng pal ai Yàng in ală sềng lup bềng bơta pin-wil wơl. Broă ơn sềng lùp la dô bơta òs, mơya Jop neh ò dơh wơl ting hơ̆: ồng sơntơm gơs nus hăt-hal mơ driau dơng lah Yàng ò sŏng ring, lah Kơnràñ neh ò lơh tòm toh jat bơta òs mờng!
Ală bơyô ồng Jop dê neh tus mơ ồng, đơs ală jơnau bol khai kơlôi la “jak-chai”, tơm-pà bơta kơlôi găn bơta git-lam is mơya rơp ò ai gùng lơi. Ming tŭ dô nă cau pơnu sơn-đăn la E-li-hu tơlik măt, ală bơta sơntơm tơm gơl. E-li-hu dờp git ală bơta kơlôi tis bol khai dê mơ sơn tơm dŏng tò Yàng Tom Trồ, lơh nền: “ Ngan la ò gơs tŭ lơi Yàng Tom Trồ lơh tĭs, hala Bơtau Gơnap-gơnoăr Lam Jơh ò lơh tĭs bota sŏng-rĭng” (Jop 34:12). Do ò di la jơnau kơlôi is E-li-hu dê, mơ la jơnau sŏng neh geh ràng tơlik bơh nus nhơm Yàng Tom Trồ dê. Tom bơta jề-sồt, Jop ò wơng ală bơta găm gơ tơn-tus, mơya ồng pal cang dòn kơnờm dê nus nhơm ò tŭ lơi tòm gơl Yàng dê. Ala bơh hơ̆, Jop mơ ală bơyô ồng dê kŭng neh pơn-đơl pran yăl tơ lik ală broă kơnòm di bơta git làm is bol khai di, mơ lồi dùt bol khai neh kŏng alah, ò rgời wờng tơnggù tòm Yàng dê.
Dô nơm broă gơlik gơs drờm behơ̆ tòm Sră Goh Pa, loh-làng tòm Sră Broă 15. Hiu Jum Goh sơn-nrờp găm tòm gùng bơtao tơng guh pràn kơldăng, jơl tus dê tŭ dô mpôl cau tơlik măt mơ yăl tơlik lah bơta dŏng klas ò dê mìng tus bơh bơta dòn tòm Bơtau Krist kìs wơl, mơ găm càng ală bơta ndai tai (Broă 15:1). Pơ-lai sŏh ngan, bơta kơlôi sơnơng tis do mhar gơ-rề, tài bơh ală cau ăt bồ Hiu Jum Goh tŭ hơ̆ dê ming la cau Ju-đa òs yau khai di, ting hơ̆ kùng gơs dô ềt nă cau Pha-ri-si. Mpôl cau dô neh kòl Yàng Jesu lah pơrhơ̆ng bơh neh “sang lơi Jơnau Yàng Tom Trồ” ming bơh ală jơnau òs yau bol khai dê(Mathiơ 15:6).
Ò tŭ lơi la tòm toh tŭ bol he ơn ală jơnau òs yau is he dê hơđăng Jơnau Yàng, sền ală bơta ơs mòng mơ bơta git-lam is he dê la dơng mang rlau mơ jơnau song Kơnràñ dê. Gơ-wềt mơ cau at bồ Hiu Jum Goh sơnrơp, bulah neh gơs oă bơta tơm pơdăng, mơya ală bơta ò gơs bơta kalkê oă. Bol khai pal càng tă sang ală bơta kơlôi sơnưng is mơ ơn bơta dòn tòm bơta ràng tơlik Yàng dê. Bol khai pal dòn kơnòm dê Jơnau Yàng, lah jơh tơl nă cau rơp geh dong klas ming kơnòm di bơta dòn lơm. Lồi dùt bol khai kŭng neh dờp rò jơnau sŏng hơ̆ (Btoă 15:11).
Bol he kŭng pal cang lơh behơ̆. Bol he kŭng pal càng rề wơl hơ Jơnau Yàng be la tòm ryàs sòl pơnđang mìng dul ai kòp bơta lơh-nền he dê, nàng Yàng ngăn la Bơtau ăt bồ hơđang rài kis bol he dê. Gùng dà Kơnràñ dê jòng rlau jơh kòp ală gùng dà ndai jơi kòn mơnus dê. Kơnràñ git bơta lơi la di, tòm tŭ bơta git lam he dê ò tŭ lơi yăl tơlik bơta di he in. Nùs kòn mơnus dê bìng bơta mà-blac mơ jañ-bơsăk: ñcau rgơi wơng git taih? Lơi tĕ Jơnau Yàng lơh gơs krơh pơnđàng nàng bol he git cah-is nus kơñ Kơnràñ dê tòm ală bơta gơlik gơs. Lồi dùt, tòm kơp ală bơta gơ-lơh be lu-lì, bol he rgơi kơ nòm dê jơnau sŏng dô: “ Jơh nùs dòn kơnòm tĕ di Yàng Jehôwa. Ƀăñ dòn kơnòm di bơta àng loh kòn dê; Tom jơh ală gùng dà kòn dê, dòp git tĕ Kơnràñ, gen Kơnràñ rơp bơsŏng ală gùng dà kòn dê”(Jơnau pơnđik 3: 5-6).
Dan ja bol he do nus bal tom bơta hoi dan:
Khoai Yàng la tòm ryas jonau sŏng ming dùl, dan Kơnràñ tề lăm nàng kòn ò kòl chŭ bơh ală bơta wơng tis , mơ bơh ală bơta boh lăm mơ să tòm he bơtao gơs, mơ sum prăp nus he in mơ bồ dơngoh he pờ ơnang nang dờp rò bơta soñio lăm Kơnràñ dê. Dan Kơnràñ ai kòn ĭn bơta jak- chài nàng git cah is di-gùl nus kơñ Kơnràñ dê mơ nus is kòn dê,. Kòn dan jòi rề wơl gơwèt mơ Jơnau Yàng be la tòm ryas jơnau song ming dùl,sùm lơi jonau song Kơnràñ dê sòl pơn-đang kòp bơta lơh nên mơ bơta lơh lòt kòn dê. Kòn jơh nus hoi dawn tòm sơnđăn Yàng Jesu Krist, Amen.
Ơ ală ồng mo oh mi kờñ gơboh, jơnau song ò tŭ lơi tòm gơl: Jơnau song Yàng dê ming gơs dùl mơ geh ràng tơlik dô bă loh lang tòm jơnau Kơnràñ. Bol he pal cang rề wơl mơ lơi Sră Goh gơlik gơs tòm ryas bơta àng, gơlik gơs gùng lot ming dùl tòm rài kis bol he dê. Ala bơh bơta mờng mơ bơta òs yau neh gơ mùt jrô tòm bồ dơngoh, lời tĕ jơnau Yàng dê lăm gùng bol he hơđang kờp cơnđoa gùng. Ming tŭ hơ̆, bol he ngăn rgơi wơng mơ lơh jat nus kơñ Kơnràñ dô bă wil-tơl.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply