He găm kis kòp ngai mbe lơi taih? Nàng gơ lòt găn dô bă ò kwơ mơ plai tĕ tŭ jơ nàng bơtê git Yang mơ tih dờng tom Kơnrẵn. Gơs dơ̆ bŏl he kư̆ kis mơ lòi tŭ tơngai lòt găn bơh ală oă broă gen hŭi să tom he păl sền kwơ màng kòp ngai he kis. Mơya he git sơl, kwơ màng rài kis bŏl he di sơlơ dờng rlau tŭ kòp dô ngai lòt găn tom bơta lơngai lơngọ mơ bơta sền gar Bèp hơđăng trồ di.
Ngai do, ngai 09/09/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Anthony Cox dê bơh Tơnggume KHÈL BƠTA DÒN DI.
“Ơ Yàng Jehôwa, Kơnràñ ai lơngai cau song ring in; Kơnràñ ai bơta nđàc jơm gòm khai kung be khèl sơl.” (Đơs Crih 5:12)
Ăñ kah wơl ngai ur klau ăñ dòp priă jền lồi dut nàng lơh sir broă rwat hiu pa he di. Hơ̆ la sơnrờp dô bơta mpau gơlik gơs di ngăn, bơta hòn chò ơm băl mơ he tom dô ngai hơ̆ bơh bơta pa gơlik gơs. Khà jền hơ̆ dô ềt rlau mơ bơta kơlôi sơnơng bơh sơnrờp bŏl he di. Ăñ gơs dô nơm broă lơh wil tơl be bơta he kơp kỡn, gen broă lơh ò ăñ ji sơlơ ngai sơlơ bơtào tơngguh. Ăñ ưnggai Yang oă ngăn, mơ tŭ do ăñ gơs dô nơm hiu, dô hiu nhă nàng ăñ sìn gar mơ kỡn gơboh.
Bơta sơnrờp ăñ ji la tŭ dờñ kai mpồng hiu la ăñ ai ala ală kai mpồng ndai. Pơnjat, an sền ală mpồng lik mut mơ mpồng dềt, nền cê la bŏl gơ găm wil tơl be ală bơta neh yăl tơnggit. Digơlan, Cau dŏng kòl sên sơwì la dô nă cau niam ngăn mơya ăñ ò khin lòt rlau. Tom tŭ ăñ git nền cê ală mpồng, kai mpồng mơ ală mpồng dềt găm rĭng lơngai, ăñ gơs dô bơta kơlôi, gen behơ̆ ăñ jòi git bơh công nghệ cao-sền sơwì bơh măi cảm biến chuyển động, kai mpồng jak chài mơ đèng jak chài. Ăñ sền sơwì ală sră sơñio git tom hiu mơ lòng sền ală bơta tis ală bảo hiểm bŏl he gơs nàng kơhia ală bơta. Ăñ lơh jơh jơh ală bơta hơ̆ nàng ò tis bơta lơi mơ bŏl he geh lơngai wil tơl.
Tom Sră Goh Jơnau Pơnđik 21:31, bŏl he sền gŏ bơta Bơtau Salomon cih bơh gơnoăr at bồ Yang Tom Trồ di: Ơseh rcang sir ngai tòmlơh in; mơya bơta pha lin rlau gơrê bal mơ Yàng Jehôwa.
Tom sèng do, bŏl he rơp gơs geh gŏ lòt găn bơh bơta rĭng băl krơi is digul bơta rơndăp kọn mơnùs di mơ gơnoăr at bồ Yang di. Bŏl he rơp rcang sir ngai tòmlơh in, jat be bơta he lơh. Bŏl he òs nền cê hiu nhă rĭng lơngai, bơt ală pơnggar, rwat teng leng rơngo tơngkah di hiu mơ rơndeh poăn kŏng, jat be òs bŏl he lơh, mơya bơta phalin mơ bơta rĭng lơngai bŏl he di wơl lah bơta ơm bơdih mpàng tê bŏl he – ngăn tài bơh ală bơta hơ̆ ơn tom mpàng tê Bơtau Gơnap gơnoăr di.
Bơtau Dabit la cau jat nùs koñ Yang Tom Trồ. Tom tŭ tìp bơta iơh rlau jơh, nùs ồng kung là dô bă tiah bơkah lơngồt Jơnau Yang ĭn. Mơ tŭ ồng koñ sền gar ală kọn sau Yang, ồng hòi dăn: “Ơ Yàng Jehôwa, Kơnràñ ai lơngai cau song ring in; Kơnràñ ai bơta nđàc jơm gòm khai kung be khèl sơl.” (Đơs Crih 5:12)
Tŭ ăñ sền sèng Sră Goh do tơnơ̆ ăñ neh pơrdoñ hiu ndai, ăñ wờng git la bơta nđàc Yang ai pà hiu nhă ăñ ĭn mơ hiu nhă he ò di mìng la sum sum mơya găm la ală bơta nđàc geh lơh cơng tang.
Ală bơta nđàc Yang di geh lơh cơng tang.
Ăñ dòp git lah Yang ai lơngai bŏl he in be bơta òs mòng – broă Kơnrẵn yò đo bŏl he, kòp nhờm tă, jơh tŭ do tus di tŭ ndai, mơ gơrwang gut dăr bŏl he bơh bơta nđàc mơ ò gơs dô mpồng lik mut lơi, mpồng dềt hala lơnggơr tơngkah lơi rơp geh lơh.
Tom Sră Goh Đơs crih 4: 8, Jơnau Yang ai bŏl he ĭn git: “Ơ Yàng Jehôwa, añ rơp bic mơ bic lơhă lơngap lơngai; Bơh mìng dô nă Kơnràñ lơh añ in bic ring lơngai.”
Ăñ neh lơh ală bơta nàng rơp geh lơh cơng tang hiu nhă he di geh rĭng lơngai, nàng Yang rơndăp broă tê ăñ lơh, mơ ăñ git Ưnngai Yang git nđợ, tài bơh tus lồi dut, tŭ ăñ ơm bic, bơta rĭng lơngai hiu nhă ăñ ji mơ bơta rĭng lơngai hiu nhă he di, găm ơm tom mpàng tê Yang.
Jọng ro Yang Jehôwa!
Dăn jà bŏl he hòi dăn mơ Yang:
Khoai Bèp koñ gơboh, kọn Ưnngai Yang tài bơh nùs koñ gơboh nđàc dơng ơnang Yang di gơwèt mơ kọn. Kọn Ưnngai Yang tài bơh bơta nđàc Yang di jơm ndơp, sền gar, mơ prap gar kọn. Kọn Ưnngai Yang ngăn tài bơh rài kis gơs Yang, bơh bơta rĭng lơngai mơ lơngap lơngai kọn gơs tom Kơnrẵn. Ưnngai Yang mơ jọng ro sơnđăn sang gọh Kơnrẵn di! Kọn dăn Yang sơlơ ai tai bơta nđàc Kơnrẵn di hơđăng kọn, hiu nhă kọn mơ ală broă tê kọn lơh, mơ Dăn Yang jơm ndơp kọn bơh bơta tơlik mat màng ryŭ Kơnrẵn di sum sum. Kon jơh nùs họi dăn, Kon ai sơnđăn Yang Jesu Krist, Amen.
Ơ ală ồng mọ ọh mi koñ gơboh, dăn bơta lơngai mơ hòn chò Yang di jơm ndơp hwing nùs tŭ git lah he gơs dô Bơtau sum òs sền gar mơ kơrmap gar he. Dilah he siơ̆u roh bơta lơngai mơ hòn chò, ơn tĕ tŭ jơ iat kơno wơl Jơnau Yang ngai do nàng tơn mut tom nùs he mơ lơh he ĭn dòp git lah Yang koñ gơboh he ngăn. Dăn kơp kỡn ală bŏl he sum gơs dô bơta dòn kơ̆ wwền mơ rĭng lơngai di Yang bŏl he
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply