Nyob hauv lub neej uas puv npo txoj kev sib txeeb thiab sib tw no, peb nyias yeej siv nyias zog qhia tawm tias yus tus kheej muaj nuj nqis. Peb khiav caum nyiaj txiag, koob npe thiab meej mom nyob hauv lub ntiajteb no, kom peb pom tias peb lub neej no muaj nqis. Tiamsis peb ho hnov qab lawm ib yam tias: tsis muaj leej twg muaj cai ntaus nqi rau peb dhau ntawm tus uas tsim peb los thiab muab nws tus kheej tuag txhiv peb.
Hnub no, yog hnub 10/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lorie Hartshorn dhau ntawm Zaj kawm NYOB HAUV VAJTSWV QHOV MUAG, KOJ MUAJ NQIS TSHAJ.
“Koj yog tus tsim kuv lub cev txhua yam huv tibsi, thiab koj yog tus uas puab kuv rau hauv kuv niam plab. Kuv qhuas koj rau qhov koj thiaj yog tus uas tsimnyog sawvdaws hwm, tej uas koj ua mas kuv xav tsis thoob thiab tsis txawj piav li…” (Ntawv Nkauj 139:13-14).
Thaum kuv rov qab nco txog lub sijhawm uas kuv ua ib tug kws qhia ntawv, kuv yeej hnov qab tsis tau tej menyuam txoj kev sib ceg nraum tshav puam. Lawv pheej sib cav li no: “Kuv txiv ntse dua koj txiv!” “Tsis yog, kuv txiv thiaj yog tus zoo dua ntais!” Ntau zaug peb yuav hnov luag rau tej lus sib tham tsis muaj qab hau ntawd, tiamsis nyob tob tob puag hauv, peb txhua tus puav leej zoo ib yam li ntawd nyob rau ib lub sijhawm twg hauv lub neej. Yam kawg thiab tob uas peb xav ua tim khawv qhia rau lwm tus paub yog qhia tias peb muaj nqis thiab tseem ceeb npaum li cas. Yog tias peb txiv yog tus zoo tshaj plaws, ces peb kuj yuav pom tias yus kuj zoo tshaj plaws! Tag nrho peb txhua tus puav leej yuav tau tab pov tias yus muaj nqis.
Lub ntsiab lus tseem ceeb hauv Vajluskub yuav chwv raug rau hauv peb lub siab thiab tus ntsujplig. Ntawv Nkauj 139 ntuas kom peb nco ntsoov tias ua ntej uas peb tau tsim hauv niam plab los, tus Tswv twb saib tias peb muaj nqis hauv Vajtswv lub qhov muag lawm.
“Koj yog tus tsim kuv lub cev txhua yam huv tibsi, thiab koj yog tus uas puab kuv rau hauv kuv niam plab. Kuv qhuas koj rau qhov koj thiaj yog tus uas tsimnyog sawvdaws hwm, tej uas koj ua mas kuv xav tsis thoob thiab tsis txawj piav li… (Ntawv Nkauj 139:13-14).
Txhua txojsia puav leej muaj nqis heev rau ntawm Vajtswv lub xub ntiag, txawm koj yuav yog leej twg, lwm tus saib koj zoo li cas, txawm koj yuav ntsib tej kev sim siab twg, lossis raug luag ua li cas lawm los, koj lub neej yeej tseem muaj nqis hauv Vajtswv qhov muag. Vajtswv hlub koj, saib xyuas koj thiab xav pub yam uas zoo tshaj plaws rau koj. Nyob hauv Ntawv Nkauj 8:3-4, tus sau thiaj nug Vajtswv txog tib neeg txoj kev muaj nqis: “Thaum kuv tsa qhovmuag ntsia saum lub ntuj uas koj tsim cia, kuv pom lub hli thiab tej hnubqub uas koj muab teeb nyias nyob muaj nyias chaw, neeg ntiajteb tsim txiaj npaum li cas, koj thiaj nco txog lawv? Noob neej zoo npaum twg, koj thiaj hlub lawv ua luaj?
Ntawm no yog lub ntsiab lus uas Vajluskub xa los rau peb: Tus uas tsim lub ntiajteb no los kuj yog tus uas tsim peb los, thiab peb muaj nqis heev rau Vajtswv. Peb txhua tus puav leej muaj nqis, yeej tsis tshwj leej twg. Vajtswv yeej tsis faib cais meej mom lossis koob npe, yeej tsis hloov pauv los ntawm meej mom, hwjchim, nplua nuj lossis txomnyem. “rau qhov Vajtswv hlub tib neeg ntiajteb…” (Yauhas 3:16).
Thiab yeej tsis muaj ib yam dabtsi twg yuav ua tim khawv meej tshaj ntawm Cawm Seej Tswv Yexus tus Ntoo Khaub Lig. Nyob ntawd, txhua tus puav leej sib luag zos – sib npaug zos ntawm tej kev txhaum, thiab tus nqi yuav tau them rau peb txoj kev tawm tsam. Tag nrho peb puav leej cheem tsum ib tug Cawm Seej, thiab saum Ntoo Khaub Lig, peb thiaj yuav nrhiav pom Tus Tswv- tus uas zoo siab hlo muab Nws tus kheej tuag theej tib neeg ntiajteb. Cawm Seej Tswv Yexus tau them ib tug nqi rau txhua txoj kev txhaum, thiab Tswv Yexus twb ua qhov ntawd rau peb! Yog koj sawv ntawm hauv paus Ntoo Khaub Lig, saib Tswv Yexus cov ntshav ntws los, koj yuav hnov lub suab ntxhia tuaj tias: “koj lub neej no muaj nqis!”
Yog li, no thiaj yog qhov tseeb: Peb leej txiv yog tus zoo kawg nkaus, vim peb muaj nqis hauv Vajtswv qhov muag. Ntawm no yog qhov tseeb uas tsis muaj leej twg yuav lwv tau.
Thov caw nrog kuv peb thov Vajtswv ua ke:
Tus Tswv uas zoo kawg nkaus, nyob hauv lub neej uas puv npo tej kev txhawj thiab kev tawm tsam li no, thov kom Leej Txiv pab kuv nco ntsoov tias kuv tsis tas yuav mus nrhiav saib kuv tus kheej puas muaj nqis nyob qhov twg. Leej Txiv koj tau hlub kuv los ntawm txoj kev hlub tsis muaj dabtsi piv tau, thiab tau tuag rau kuv kom kuv pom tias kuv muaj nqis npaum cas. Txawm kuv yuav nyob qhov twg thiab nyob rau lub caijnyoog twg los, thov kom Leej Txiv Koj pab kom nco ntsoov tias kuv muaj nqis nyob hauv koj qhov muag. Kuv thov hauv Tswv Yexus Khetos lub npe. Amees.
Cov kwv tij txhua tus, peb tau Vajtswv tus uas tsim muaj ib puas tsav yam tabpov tias muaj nqis puas thaum pib los lawm. Yog li peb tsis tag yuav siv zog mus nrhiav kom lwm tus qhuas peb thiab txais yuav peb. Tsis tas li ntawd, Tswv Yexus twb tuag saum Ntoo Khaub Lig rau peb qhia tias peb muaj nqis heev nyob hauv nws lub qhov muag. Peb tsis tas yuav mus nrhiav lawm qhov twg. Tus Tswv txoj kev hlub thiab txoj kev tuag twb txhiv peb thiab qhia rau peb tias peb muaj nqis puas thaum pib mus tag ib txhis lawm.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply