Geh tŭ lơi bol he gớs ală jơnau lùp lah: Tús sơnăm mờ ya…? Tŭ do mờ ò hềt…! kòp tŭ hơ̆, bol he gớs bơta moat jrùng, mờ ya bol he git sơl, kòp rài kís bol he ơm gơnoăr at bồ Yàng dê, kòp tŭ lơi, Kơnràñ sùm là Bơtau lơh broă kòp cơn đoà tòm gùng lòt rài kís he dê.
Ngai do, ngai 12/09/2024, Bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl Mikayla Barnes bơh tơnggume BƠTAU AT BỒ TŬ TƠNGAI.
“Mơya añ neh kơnòm di bơta kòñ gơboh kơ̆ dơn Yàng dê; Nùs añ hòn chò bơh bơta dong klàs Kơnràñ dê. Añ rơp đơs chò jòng ro Yàng Jehôwa, tài bơh Kơnràñ neh lơh bơta nđàc añ in ò git nđò.” (Đơs Crih 13:5-6)
Neh geh tŭ bol he lùp ís să tòm, “ Să tòm he găm kong dồs tús dê tŭ lơi?” hala, “añ păl kơp gơn cau hơ̆ tús dê tŭ lơi?”, hala “ tús dê tŭ lơi Yàng rơp hơ wơl jơnau añ hòi dăn do?” oă dơ̆ bol he kơp gơn dồ bă ò gớs kwơ, bơh bol he ò rgơi tòm gơl tŭ tơngai, ò rgơi lơh gơ lòt găn măr hala lơ yạ. Mơ ya tŭ tơngai là tŭ tơngai. bulah pơn đơl bè lơi, bol he păl lơh jat rơ noăs rnoăr.
Tŭ neh sir bơ srăm họk, añ ò lòt họk chơ pơn jat bè ala cau drờm sơnăm mờ añ. pơ lơ̆ wơl añ ơm tòm bòn, gớs dồ broă lơh, pơ jum tòm Hìu Jum Goh, mờ sơ tờm rài kís dồ nă cau dờng. Năm 21 sơn năm, Yàng hòi săc añ rê wơl mờ bơta bơ srăm. Do là tŭ añ kís jat tŭ jơ ís añ dê, tòm tiah lơngai añ dê. Añ mut ơm tòm tiah hìu ơm băl, tiah hơ̆ kòp nă dêt êt mờ añ 2-3 sơ năm.
Añ sùm kơp koñ gớs dồ hìu nhă ís, bulah găm kơ nòm, 22 sơ năm, añ koñ lơh gớs là dồ nă bau ùr. Mơ ya, añ pa mut ơm dồ bă tiah ndai, tiah ơm ala cau kơ nòm să pă sir bơ srăm. Mơ ya, sền dê cau bơ yô, là cau mut họk chơ tơ nơ̆ sir bơ srăm, neh geh dồ nă bau hơ pơ gơn mờ tŭ sir họk chơ bol khai neh ñhô bau. Añ kah geh tŭ añ moat , ñìm mờ Yàng, “Kòn neh lòt rúc băl mơ ala cau bơyô kòn dê. Kòn păl kong sền ala cau bơyô kòp nă geh cồng nha mờ ring lơngai sơl? să tòm kòn păl kơp tús dê tŭ lơi nàng geh hìu nhă ís do ơ Yàng?”
Tòm sră Đớs Crih 13, Đa-vits neh lùp Yàng: “Ơ Yàng Jehôwa, jơl tus di tŭ lơi taih? Kơnràñ rơp hŭi añ sùm sùm sơl ơ? Kơnràñ pơndơp mat di añ jơl tus di tŭ lơi taih?” (Đơs Crih 13:1 )
Mơya, bơta Đa-vít đớs mờ Yàng tòm tap dut neh lơh añ in sền gŏ. Ồng đớs “Mơya añ neh kơnòm di bơta kòñ gơboh kơ̆ dơn Yàng dê; Nùs añ hòn chò bơh bơta dong klàs Kơnràñ dê. Añ rơp đơs chò jòng ro Yàng Jehôwa, tài bơh Kơnràñ neh lơh bơta nđàc añ in ò git nđò.” (Đơs Crih 13:5-6)
Đa-vít neh lùp Yàng “Tús dê tŭ lơi”. Añ dòn nền bol he mờng ờs rơ ngòt bơh bơta pơ gơn tŭ tơngai gơlik ngai, kơnhai, tŭ jơ, mờ ya bol hè ờ sùm rac dăn mờ Yàng hala “ kơnòm di bơta kòñ gơboh kơ̆ dơn Yàng dê” bè Đa-vít neh lơh. Tơnơ̆ 3 kơnhai añ hòi dăn, dut dơl añ neh jơh nùs rê wơl mờ Yàng. Añ dòn nền Yàng rơp ai añ in bơta añ kơp koñ, mờ kung dòn nền Kơnràñ rơp lơh gớs bơta añ koñ. Tŭ tơngai ò di là kal ke tai, bơh Yàng Tòm Trồ dờng rlau mờ tŭ tơngai. Yàng git tơnơ̆ mờ poăn kơnhai añ hòi dăn, añ rơp tìp dồ nă cau klau koñ gơboh Yàng, cau klau hơ̆ rơp lùp bau mờ añ tòm kơn nhai rlô, mờ bol hi rơp lơh gớs bau klau bau ùr tơnơ̆ mờ 2 năm añ lùp Yàng “ Tús dê tŭ lơi”. Dê tŭ do, bol hi neh kwèng 4 sơnăm rau, mờ tŭ tơngai kơp gơn lòt găn mhar bè chàl khồm.
Tŭ bol hi sak rhwa kơp gơn Yàng Tòm Trồ mờ bơta kơnờm, jòng rơ, mờ ưn ngài bè Đa-vits neh lơh, tŭ tơngai ò di là bơta dờng tai bơh Yàng là dờng rlau. Yàng git he lài mờ tŭ he geh crơng mòn tòm kơn dul mè.“Lài mơ tŭ crơng mòn mê tòm kơndul mè, Añ neh git mê rau; Lài mơ tŭ mê geh deh, Añ neh ơn is mê, bơtào mê lơh gơs cau gơnoar hwơr ală lơgar in.” (Jeremi 1:5)
Kơnràñ neh rcăng kòp nă rài kís bol he, pà ai bol he in kờp bơta he kơp koñ. Bulah ngai do, bol he găm kơp gơn, gen kah té Yàng sền gŏ jơh rùp bơh rài kís he.Kơnràñ sền gŏ tŭ hê lik klàs bơh bơta bòl glăr, tŭ dồ nă cau ndai tús tòm rài kís he; Kơnràñ kung sền gŏ bol he chò hòp bè lơi tŭ git jơnau hòi dăn he dê geh Kơnràñ hơ wơl.
Dan jà bol he dô nùs bal tòm bơta hòi dan:
Ơ Yàng, bol kòn sền gŏ ngăn kòn là dêt rhền tŭ git Kơnràñ là Bơtau at bồ tŭ tơngai mờ jơh rài kís bol kòn. Dăn Yàng toh glài bơh oă tŭ dơ̆ bol kòn ò gơn kơnờm là Kơnràñ gớs rcăng ñiam dê rài kís bol kòn. Dăn dong măt kòn dê mìng git sền dê Kơnràñ bơh nùs duh rngòt tòm ala tŭ bol kòn păl kơp gơn. Kòn hòi dăn tòm sơn đăn Yàng Je-su Krist, A-men.
Ồng mò oh mi koñ gơboh, gớs broă lơi bol he păl kong ơt rlau mờ bơta pràn he dê sơl? Gớs bơta lơi bol he kơp gơn mờ ò gŏ Yàng hơ wơl? Tòm tŭ tơngai kơp gơn hơ̆, pơ lơ̆ gơ plơ̆ nùs, gen sền dê Yàng, Bơtau dờng rlau mờ tŭ tơngai mờ kờp bơta he păl kong geh, gen sak rhwa té bơta kơnòm di bơta kòñ gơboh kơ̆ dơn Yàng dê bè Đa-vít neh lơh.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply