Lub ntiajteb no muaj ntau yam tseeb thiab kuj muaj ntau yam cuav, yog li peb yuav ua li cas thiaj feeb meej tau yam twg yog tseeb yam twg yog cuav? Rau qhov tej lus cuav lus dag yeej sib xyaw nrog tej lus tseeb ua rau peb tsis yoojyim feeb meej tau, ntau zaug ua rau peb tsis paub yuav mus txoj kev twg lossis ntseeg lo lus twg. Txawm tias ib ncig peb yuav muaj ntau lo lus dag los Vajtswv yog qhov tseeb coj peb kev.
Hnub no, yog hnub 15/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Brooke Boland dhau ntawm Zaj kawm SAJ PAUB VAJTSWV.
“Nej sim xav saib tus Tswv ua zoo npaum li cas rau nej lawm. Cov neeg uas los nrhiav chaw nkaum ntawm tus Tswv, lawv tau zoo nyob kaj siab lug.” (Ntawv Nkauj 34:8)
Muaj ntau zaug kuv cim civ nug tias, “Vajtswv puas tseem nrog kuv nyob?” thaum lub neej no ntxhov quav nyo Thaum lub neej no muaj ntau yam cuav thiab dag npog tej uas yog tiag thiab tseeb es yuav ua li cas thiaj feeb meej tau qhov twg yog qhov tseeb? Tsis paub peb puas hnov thiab mloog raws li Vajtswv lub suab nyob rau hauv tej lus dag ntxias? Lo lus teb tias “muaj!” Vajtswv twb qhib ib txoj kev tseg rau peb. Txawm yog txoj kev phem tab tom vij puas ncig peb, tiamsis Ntawv Nkauj 34:8 nqua hu kom peb “Saj thiaj paub” Vajtswv txoj kev zoo.
“Nej sim xav saib tus Tswv ua zoo npaum li cas rau nej lawm. Cov neeg uas los nrhiav chaw nkaum ntawm tus Tswv, lawv tau zoo nyob kaj siab lug.” (Ntawv Nkauj 34:8).
Daviv yog tus sau phau Ntawv Nkauj no thiab nws saj tau Vajtswv txoj kev zoo nyob rau lub sijhawm uas phomsij. Daviv sau Ntawv Nkauj tshooj 34 thaum uas nws tab tom khiav nkaum Xa-ules thiab nws yuav tau ua txuj ua tus neeg ruam kom thiaj yuav dim (1 Xamuyees 21:10-15). Lo lus nqua hu “Cia li sim thiaj yuav paub” muaj ib lub ntsiab lus tob heev. Daviv tsis yog tsuas caw peb los saj Vajtswv txoj kev zoo xwb tiamsis tseem txhawb peb kom ua ntau tshaj tej ntawd ntxiv. “Saj” tsis yog tsuas yog ib qhov haujlwm yooj yim; nws yog kev ntsib dhau, kev pom thiab paub txiav txim rau txhua yam. Ntawm no yog qhov khoom plig los ntawm Vaj Ntsujplig los pab kom peb paub cais yam twg zoo thiab yam twg phem thiab ntawm no yog tej uas Daviv tab tom nqua hu peb.
Nyob rau hauv lub ntiajteb puv npo txoj kev dag ntxias li no, txoj koob hmoov no yog yam uas peb yuav tsum tau muaj. Mathais 10:16 hais txog qhov tseem ceeb ntawm nqe no: “Nej cia li mloog kuv hais! Kuv txib nej mus ib yam li pab yaj uas yuav mus rau hauv pab hma. Nej yuav tsum ntse ib yam li tus nab thiab muaj lub siab mos siab muag ib yam li tus nquab” Tswv Yexus tab tom nqua hu.
Txoj kev phem nws tshwm txhua qhov, zoo li tus duab tsaus ntuj nyob puv txhua qhov, thaum zoo li ntawd, qhov uas yuav cais tau Vajtswv lub suab nyob hauv yeeb ncuab tej lus dag ntxias tseem ceeb heev. Nco ntsoov txog zaj xwm txheej nyob hauv lub Vaj Edees, thaum Evas raug tus nab ntxias, tus uas tau ntxhi tej lo lus cuav ua rau tib neeg rau txim mus ib txhis. “Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los? (Chivkeeb 3:1). Tej lus no tsis yog tsuas sim Evas txoj kev ntseeg xwb, tiamsis tseem ua rau Evas ua xyem xyav rau Vajtswv txoj kev zoo thiab tiv thaiv.
Evas lub hlwb tau yuam kev vim tej lus qab zib ntawd. Lo lus ntawd cuag li zoo, thiab saib cuag li nws hmov tshua txog thiab tseeb. “Nej yeej yuav tsis tuag os!” – nab rov qab hais ntxiv, los ntawm lub suab mos muag, puv npo hwjchim. Xwb tim Evas cia li ua xyem xyav rau Vajtswv txoj kev zoo. Tsis paub Vajtswv puas ua li Vajtswv tej lus? Lossis Vajtswv tab tom muab tej yam zoo khaws tseg lawm? Thaum Evas noj lub txiv thiab cev rau Adas, cov lus dag ntawd dhau los muaj tseeb tias nkawd muaj cuab kav ua lub neej ywj pheej tsis tas yuav Vajtswv. Txoj kev dag ntxias no tau tov sib xyaw ntxaws ua ke nrog txoj kev faib cais tias qhov twg yog thiab tsis yog, rhuav tshem txoj kev sib raug zoo ntawm Vajtswv thiab Nws tej menyuam. Vajtswv lub siab puas ntsoov, thiab lub ntiajteb pob puas.
Tiamsis Vajtswv tsis cia peb tuag hauv txoj kev tsaus ntuj. Vajtswv npaj muaj ib lub homphiaj: Txib nws tus tib los cawm thiab tso peb dim ntawm txoj kev tuag, tswj tus kav saum nruab ntug thiab txoj kev phem (Saib Efexaus 2:2 thiab Kalatias 1:4). Vajtswv pub lo lus cog tseg muaj nqis rau peb, qhib qhov rooj kom peb muaj feem tau koom ua ke nrog Vajtswv tus cwjpwm dawbhuv, cawm peb dim ntawm txoj kev puas tsuaj thiab kev sib faib puv npo hauv lub ntiajteb no.
Ntawv Nkauj 34 hais meej meej txog Vajtswv txoj kev zoo. Vajtswv tso peb dim ntawm tej kev ntshai, cawm peb tus ntsujplig dim ntawm txoj kev tuag, tiv thaiv peb dim tej kev tshaib nqhis! Thaum peb thov, Vajtswv yuav cawm peb dim tej teeb meem. Vajtswv yog tus pab thiab yog daim thaiv pov hwm peb, hloov pauv peb dhau los zoo li Tswv Yexus tus duab, vim peb twb tau saj paub thiab mloog Vajtswv txoj kev zoo, ntseeg Vajtswv lub npe dawbhuv!
Thov caw nrog kuv peb thov Vajtswv ua ke:
Tus Tswv, nyob rau hauv lub neej puv npo txoj kev dag ntxias zoo li no, thov Vajtswv pub kom kuv muaj kev txawj ntse paub cais tias qhov twg yog qhov tseeb. Thov qhib kuv lub hlwb, kom paub saj thiab paub tias qhov twg yog Vajtswv txoj kev zoo nyob hauv txhua lub caijnyoog. Thov Vajtswv pab kom kuv yog lub hauv paus kev cia siab thiab yog lub zog pab kuv, pab kom kuv paub raws qhov tseeb los ntawm lub siab ntseeg. Kuv thov hauv Tswv Yexus Khetos lub npe. Amees.
Cov kwv tij txhua tus, Vajtswv niaj hnub tshwm ntsej muag thiab coj koj kev kom peb paub tias qhov twg yog qhov tseeb thiab qhov twg yog dag ntxias. Thaum peb tig rov qab los rau ntawm Nws thiab saj tau Vajtswv txoj kev zoo, peb yuav nrhiav tau txoj kev kaj siab thiab pom kev mus ruaj khov hauv lub neej. Txawm yog lub ntiajteb no puv npo kev phomsij thiab kev sim siab los Vajtswv txoj kev zoo yog lub hauv paus kev cia siab ruaj khov. Peb yuav ruaj khov nyob rau hauv Vajtswv qhov pom kev, nrhiav tau txoj kev tiv thaiv thiab ua tus coj nyob rau hauv txhua lub caijnyoog.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply