Tơm dunnia bìng bơta yăl tơnggit niam hala iơh drờm băl, lơh be lơi nàng bol he git cah is bơta lơi la niam mơ bơta lơi la iơh? Tơm tŭ bơta ma blac mơ bơta niam gơtòmklac băl tian gơs ò rgơi đăl git, bol he gơlơh wi wơ di gùl ală bơta tòm rài kis. Bơta niam Yàng dê la bơta àng pơn đăng sol hơđăng gùng klăm jơngo. Yàng pợ dô nơm gùng tồ bol he đăl git jơnau song, bulah gut dăr he mìng là bơta ma blac.
Ngai do, ngai 15/09/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl ồng Brooke Boland bơh tơnggume: LÒNG TĔ YÀNG.
“Lòng tĕ mơ sền Yàng Jehôwa la niam ò git nđò! Lơngai cau lơi in kìng crŭ tòm Kơnràñ!” (Đơs Crih 34:8 )
Ò git đợ dớ añ lụp is la, digùl ală bơta gơtòmklac bơta jơh mơ niam tòm rài do: “Yàng ơm băl mơ añ ò ơ?” Tơm pah rài bìng lìu jơnau ma blac pồn ndơp jơnau song, bol he wil tơl bơta àng loh nàng đăl git bơta song ò ơ? Bol he iat mơ kơnô jơnau Yàng dìgùl bơta rngôr rgac bơta ma blac ò ơ? Dợp sèng jơnau lụp hớ la “Gơs” Yàng pợ dô nơm gùng gơ wet mơ bol he. Đơs Crih 34: 8 hòi tĕ bol he “Lòng tĕ mơ sền” bơta niam Yàng dê, găm tŭ bơta iơh ơm gut dăr he.
“Lòng tĕ mơ sền Yàng Jehôwa la niam ò git nđò! Lơngai cau lơi in kìng crŭ tòm Kơnràñ!” (Đơs Crih 34:8 )
Cau cih Đơs Crih la ồng Dabit neh lot găn bơta niam Yàng Tom Trồ dê tơm tŭ tịp kălke. Ông cih Đơs Crih 34 tŭ dô pleh bơh Sol mơ khai lơh tànggơ kung be cau sơrang ( I Samuel 21: 10-15). Jơnau hòi jạ “Lòng tĕ mơ sền…” gơs dô nơm gơtha kwơ màng rlau jơh. Dabit ò di mìng hoi jạ bol he sền tĕ bơta niam Yàng dê mơ kung sôr bơtrut bol he lơh oă rlau mơ bơta hớ.
“Lòng tĕ “ ò di mìng la dô nơm broă lơh ờs, hớ la bơta lot găn, sền mơ đăl git bơta kwơ màng ală broă. Hớ là dô nơm phăn bàn bơh Yàng hwềng Goh, dong bol he git cah is bơta niam mơ bơta jơh, dô kung la bơta mơ Dabit hòi jạ.
Tơm pah rài bìng lìu bơta ma blac be do, bơta nđac đah hwềng la pơnah ò rgơi siớu gơ wet mơ bol he. Mathiơ 10: 16 đơs tờm toh ngăn bơta kwơ màng bơta do: “Do Añ sồr bol mê lòt kung ò gơkrơi be belàt digùl mpồl so rhau. Behơ̆ chài rgơi tĕ be bơs, mơ lơbơn niam tĕ be sềm ntòp.”- Yàng Jêsu neh hòi jạ.
Bơta jơh ơm gut dăr, be bơta klăm jơngo drơm gòm jơh ală gùng. Tơm bơta hớ, bơta cah is jơnau hòi jạ Yàng dê digùl ală jơnau ma blac gơwet cau sò tơm la bơta kwơ màng ngăn. Kah tĕ pơnyơu tơm suơn Eden, tơm tiah bơs neh ơniai Ebia, lah cau neh pơrlồm bơh ală jơnau lụp jơh gơlơh dunia in roh lơm tus lồi dut rài “Ngan la Yàng Tom Trồ neh sồr ùr klau ai bañ sa plai ală chi tòm suơn sơl?”(Sơnròp Gơlik Gơs 3:1 ). Ală jơnau hớ ò di mìng lòng bơta don mọ Êbia dê, mơ găm ntào bơta pìn wi wơ bơh bơta niam mơ bơta drơm gòm Yàng Tom Trồ dê.
Nùs kơlôi Ebia dê gơlik gơs jơ ngo bơh bơta pran ală jơnau lơ ngot. Ală jơnau hớ gơlơh di ngăn, bìng lìu bơta pơndơm pơniang mơ song ngăn “Ùr klau ai ò gơs tŭ lơi chơt ò,”- bơs đơs tai be hớ, băl mơ jơnau đơs lơbơn niam be brài lơbơn, bìng gơnap gơnoar mơ ò buôn nàng tom dră wơl. Nisơna, Ebia pìn wi wơ bơh bơta lơbơn niam Yàng Tom Trồ dê. Ngăn Yàng lah don song ò ơ? Hala Yàng neh prap jơh ală bơta niam rlau jơh Yàng ò ơ? Tŭ Ebia sa plai kuớ mơ tơng Adam in sa, ală jơnau ma blac gơlơh di ngăn – bol khai găm kis mơ khat gơ boh lơh nền ală broă mơ ò càng Yàng. Bơta ma blac gơlơh drơm ndơp bơta đăl git jơnau niam mơ jơh, phà tơlah bơta gơtomsor Yàng Tom Trô mơ ală kon sau Yàng dê. Nùs Yàng Tom Trồ moat jrung, mơ dunnia kung ơm tơm bơta rung rài.
Mơya Yàng Tom Trồ ò lời bol he chớt roh tơm bơta klă jơngo. Yàng neh rcăng lài dô nơm rơndap dờng màng: ai Kòn Dùl Kơnràñ dê tus nàng dong klas mơ bơtào bol he bơh bơta ăt bộ bơta chơt, kung dong tă bol he klàs bơh rài iơh do ( sền Ephesô 2: 2, Galati 1: 4). Yàng neh ai bol he in jơnau hơ pơgòn dờng màng kas ngăn, pợ dô nơm gùng tồ bol he in gơs pơnah tom bơta sàng goh, dong tắ he dô ple bơh bơta roh rùi mơ tom cah is tom dunnia do.
Đơs Crih 34 tom toh loh lang bơta niam Yàng Tom Trồ dê dong tă bol he klas bơh ală bơta rngọt, dong klas hwêng soàn bol he bơh bơta chơt, mơ drơm gòm bol he bơh bơta jơgloh rung! Tŭ bol he hòi dan, Yang dong klas bol he bơh bơta rung rài. Yàng La theng kơ̆ cê añ jê mơ la Bơtau dong tă añ, tơm gơl bol he gơlik gơs be rụp să Yàng Jêsu, Bơh he neh lòng tĕ, sền Yàng, mơ pơn dệt să di đap bơta niam Yàng Tom Trồ dê, don kớ tom Sơn đăn Sàng goh Yàng dê!
Dan jà bol he dô nùs bal tòm bơta hòi dan:
Khoai Yàng, digùl pah rài bìng bơta ma blac, dan Yàng ai kon in gơs bơta àng loh nàng kon git cah is be lơi lah jơnau song. Dan Yàng pợ nùs mơ hwềng soàn nàng kon in git lòng tĕ mơ sền go bơta niam Yàng dê tơm jơh ală bơta gơlik gơs.. Dan Yang kư lah bơta kơp gơn mơ pran kon dê. Dong kơl kon joi jat jơnau song băl mơ nùs dòn nền kơ dơn. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mọ oh mi kòñ gơboh., Yàng găm sùm, tề lam mơ pơnđăng àng nàng bol he git cah is bơta niam mơ jơh. Tŭ bol he rê wơl mơ Yàng mơ lòng tĕ bơta niam Yàng dê, bol he joi bàn bơta lơngai lơngo mơ gùng lot nền cê tom rài kis. Bulah dunnia bềng lìu rung rài, bơta niam Yàng dê lah bơta gơn kơ nơm ò tu lơi tơm gơl. Bol he pran kơdăng lot jat tom bơta àng Yàng dê, joi bàn bơta drơm gòm mơ tề lam Yàng dê kợp tú.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply