Thaum peb sib hlub, peb xav kom tau nyob sib ze, tau sib tham, ib leeg mloog ib leeg, ib leeg pom ib leeg, ib leeg tau nrog ib leeg ua txhua yam haujlwm ua ke. Yog li tsis paub tias koj puas ntshaw tau hlub Vajtswv ib yam li txoj kev hlub ntawm tib neeg thiab tib neeg? Thaum peb coj peb lub siab qaug zos tig mus rau ntawm Vajtswv, peb yuav txais tau Nws txojkev hlub uas dav fo thiab loj kawg.
Hnub no, yog hnub 16/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Charmain Hibberd dhau ntawm Zaj kawm NTSHAW VAJTSWV.
“Vajtswv kuv kub siab lug nrhiav koj ib yam li uas muaslwj nrhiav tus dej ntws txias zias vim nws nqhis dej heev.” (Ntawv Nkauj 42:1)
Kev hlub zoo li ib txoj kev qab zib thiab ntxim hlub.
Koj lub siab hnov nco khuam ncuv, lub plawv dhia tsis nres thaum uas nrog tus neeg koj hlub sib tham. Koj tos ntsoov kom tau nyob ze tus neeg ntawd, tau hnov nws lub suab thiab pom nws tabmeeg rau ntawm koj xub ntiag.
Zoo li uas koj tabtom nrhiav pom ib yam tshiab hauv lub ntiajteb no. Ib hnub neb ib tug nrhiav pom ib yam tshiab ntawm ib tug. Tej lub sijhawm, koj yuav ntsib kev sim siab los ntawm tej yam uas neb tsis sib haum, tiamsis kuj yog lub sijhawm ntawd koj yuav tsum tau ua lub siab ruaj nres thiab neb sib koom siab kom tiv dhau tsis txhob tso tseg.
Tiamsis txoj kev hlub nrog Tswv Yexus tseem loj thiab tob dua tib neeg txhua txoj kev sib hlub – tseeb tiag nws yog ib txoj kev hlub tob, los ntawm ob lub siab sib ntsib. Vajtswv nkag siab peb zoo thiab peb kuj yuav tau kawm txoj kev kom nkag siab Vajtswv zoo dua.
Ntawv Nkauj 42:1 tshoov tej kev xav zoo txog txoj kev hlub pub rau Vajtswv. “Vajtswv kuv kub siab lug nrhiav koj ib yam li uas muaslwj nrhiav tus dej ntws txias zias vim nws nqhis dej heev.”
Thaum tus muaslwj nqhis dej, nkees, nws yeej tsis nres so tiamsis nws rau siab nrhiav lub qhov dej haus tsis tseg. Nws mus thoob hauv tej hav zoov deb deb, siv nws txoj kev ua siab ntev tiv, siv zog ua kom nws tsis mus yuam kev. Thiab thaum uas nws ntsib lub qhov dej lawm, nws zoo siab heev! Tus muaslwj tau nrhiav pom yam uas nws ib txwm twb tos ntev los lawm.
Twb yog vim muaj lub siab nqhis, ntshaw thiab tos thaum kawg kev txaus siab thiaj muaj nuj nqis. Cov phooj ywg, daim duab no nthuav tawm peb txoj kev xav thaum uas peb nrhiav tus Cawm Seej.
Ntau zaug peb yuav maj mam ua poob zuj zus peb txoj kev hlub thaum pib, peb ua li no ib hnub dhau ib hnub tsis saj tau txoj kev zoo siab hauv peb txoj kev cawmdim. Txoj kev hlub tej zaug yuav tsuag zuj zus, dhau los ua yij fab yij hwj thiab ua raws li ib txoj kev cai. Twb yog li ntawd peb thiaj yuav tau ua txhua txoj kev kom tsis poob rau qhov no.
Kom tuav txoj kev hlub ntawm peb thiab Tswv Yexus thaum twg twb cig, ces yuav tau nyob hauv Vajtswv txojlus txhua hnub. nrog Vajtswv sib tham, tseg sijhawm los tham qhia rau Vajtswv tej yam uas nyob tob tob hauv lub siab – tej kev npau suav, kev ntshaw thiab tag nrho koj tej kev txomnyem rau Vajtswv tib si.
Kuj zoo ib yam li txhua txoj kev sib hlub, txoj kev hlub ntawm koj thiab Vajtswv yuav yim hnub yim zoo yog tias koj tseg sijhawm los ywg los tu. Mus nyob ze Vajtswv, Vajtswv yuav nyob ze koj (ib yam li tau sau tseg nyob hauv Yakaunpaus 4:8).
Thaum uas koj saj tau tej lub sijhawm qab zib, koj lub siab ntshaw yuav puv npo, koj cia li saib taus lub sijhawm ntawd. Tsuas yog Cawm Seej Tswv Yexus thiaj yuav muaj cuab kav ua rau kom koj txaus siab, yeej tsis muaj lwm tus yuav ua tau.
Cia li txais yuav tej koob hmoov zoo thaum uas koj tshwm ntsej muag tabmeeg rau ntawm tus Tswv, kom koj txoj kev hlub yim hnub yim tob thiab ruaj khov dhau lub sijhawm.
Thov caw nrog kuv peb thov Vajtswv ua ke:
Kuv ua Vajtswv koj tsaug rau koj txoj kev hlub uas tsis muaj nrim koj tau pub rau kuv. Kuv ntseeg thiab cia siab tias koj yuav yog lub hauv paus dej ywg laj ntsiag kom daws tau kuv txoj kev nqhis hauv sab ntsujplig. Thov pab kom kuv tuav lub siab ntshaw thiab nqhis koj ib yam li thaum pib, tsis cia kom kuv txoj kev hlub yij fab yij fwj. Thov kom tus nplaim taws kev hlub nyob hauv kuv cig kom loj, kom kuv nyob ze koj txhua hnub. Kuv thov hauv Tswv Yexus Khetos lub npe. Amees.
Cov kwv tij, thaum koj lub siab ntshaw Vajtswv ntau tshaj txhua yam – koj yuav tsum saib lub sijhawm ntawd kom muaj nqis. Tswv Yexus tsis yog tsuas txaus siab rau koj txoj kev nqhis hauv koj lub siab xwb, tiamsis tseem pub ib txoj kev hlub uas piv tsis tau rau koj. Cia kom txhua lub sijhawm uas koj nyob ze Vajtswv dhau los ua ib txoj kev tau koob hmoov, cia txoj kev hlub ntawd loj hlob thiab ua rau kom koj lub neej yim hnub yim tshiab.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply