Tŭ koñ gơboh băl, kọn mơnùs òs kơp kỡn geh ơm rìp băl, geh tom bơh bơr, geh iat kơno băl, geh dòp git tơlik mat mơ tom pà băl kòp tŭ băl mơ cau he koñ gơboh. Behơ̆ gen, he rơp koñ gơboh Yang bơh bơta koñ gơboh bềng tơrhìr behơ̆ sơl? Tŭ gơwèt hơ Kơnrẵn bơh nùs kơp koñ, bŏl he geh rơp tơnkram tom bơta koñ gơboh jrô dờng mơ mìng Kơnrẵn rơp ai pà.
Ngai do, ngai 16/09/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Charmain Hibberd dê bơh Tơnggume TƠHÌR YANG.
“Ơ Yàng Tom Trồ, hwềng soàn añ kòñ ngan geh Yàng, Kung be jùn me tơhìr ngan dà croh.” (Đơs Crih 42:1)
Bơta koñ gơboh kŭng be dô bơta lơngồt mơ niam ngăn.
He gơlơh kah gơhôr, plai nùs gơ prơm kòp tŭ he tom bơhbơr mơ cau he koñ gơboh. He kơp kỡn geh ơm rìp cau hơ̆, iat kơno jơnau đơs mơ dòp git bơta gơs mat cau hơ̆ di.
Bơtào gơs bơta tom klac ndrom be jòi bàn dô nơm dunnia krơi. Kòp ngai he jòi bàn ală bơta pa bơh gơp bơyô he. Gơs tŭ, he păl tìp ală gơlòng bŏl glăr tŭ bar nă ò gơtom sac sor, mơya tom tŭ hơ̆, he păl cang bơta nền cê nàng dô bă băl lòt găn, ala bơta buơn son ngăn săng lòi.
Mơ ya, bơta koñ gơboh gơwèt mơ Yang Jesu pràn kơldăng rlau jrô ndơp rlau bơta koñ gơboh lơi digul kọn mơnùs băl mơ gơp- ngăn la koñ gơboh jrô dờng ơnang, tiah nùs rềp băl mơ nùs. Kơnrẵn wờng bŏl he lọh lang ngăn, mơ bŏl he kŭng kòp ngai bơtê nàng git lọh Kơnrẵn rlau tai.
Đơs crih 42: 1 neh chồl tơngguh tom ăñ ală kơp kỡn pràn ngăn bơh bơta koñ gơboh gơwèt hơ Yang:“Ơ Yàng Tom Trồ, hwềng soàn añ kòñ ngan geh Yàng, Kung be jùn me tơhìr ngan dà croh.”
Tŭ kọn jùn tơhìr croh dà, bŏl glăr, khai ò tŭ lơi dơh wơl mơya kư̆ jơh nùs jòi croh dà. Khai lòt jòi ală tiah ngài ngăn, jat be nùs òs mòng mơ jơh nùs cơnòa lòt, lòt sŏng ò tìs gùng. Mơ tŭ lồi dut tìp croh dà hor, khai chò-hòp chò-hòn ngăn! Kọn jun neh jòi bàn bơta khai kơp kỡn jŏ jọng or.
Bơh bơta kơp gơn mơ tơhir neh lơh wơl bơta hừh-nùs gơlik kas màng rlau jơh. Ơ ọh mi, rup sơñio do pơnđăng wơl nùs nhờm kơp kỡn bŏl he di tŭ lòt jòi Bơtau Dŏng-Klàs.
Gơs tŭ, bŏl he rơp rhòi rhòi rọh bơta kơp kỡn bơh sơnrờp, tài bơh hơ̆ lòt găn kòp ngai mơ ò dòp git bơta hòn-chò bơh bơta dŏng klàs he di. Bơta koñ gơboh rơp rhòi rhòi rọh, gơlik gơs ò koñ tai mơ ò càng kơlôi sơnơng tai.
Nàng kơrmap gar ồs hơng koñ gơboh digul bŏl he mơ Yang Jesu àng sọl sum, kis tĕ tom Jơnau Yang kòp ngai. Tom bơh bơr mơ Kơnrẵn, ơn tĕ tŭ jơ nàng tom pà bơta jrô ndơp tom nùs – kơp koñ, bơta gơn kơnòm, mơ ală bơta kal ke he di-mơ Yang.
Kŭng be ală bơta tom klac dềt mềr lơi, bơta koñ gơboh he băl mơ Yang rơp kơp ngai jrô ơnang tŭ he ơn tŭ jơ nàng bùr jrô. Tus rìp tĕ hơ Kơnrẵn, gen Kơnrẵn tus rìp mơ he. (be geh cih tom Jakơ 4:8)
Tŭ he dòp git geh ală bơta niam, tŭ nùs he tơhir Yang pràn dờng ngăn, păl sền màng ryŭ tŭ jơ hơ̆. Mìng Bơtau Dong klàs Jesu gen rơp cèng tus bơta hừh nùs mơ ò càng bơta lơi hala cau lơi ndai rơp geh cèng wơl.
Dòp leng wơl tĕ bơta lơngai lơngọ tŭ he tơnkram tom bơta tơlik mat Kơnrẵn di, nàng bơta koñ gơboh tom he sơlơ ngai sơlơ jrô ơnang mơ kơ̆-wền rlau jat tŭ tơngai.
Dan jà bol he dô nùs bal tòm bơta hòi dan:
Kọn Ưnngai Yang tài bơh bơta koñ gơboh dờng ơnang Kơnrẵn ai ai kọn ĭn. Dăn Kơnrẵn sum la croh dà lơh hừh nùs bơta tơhir tom hwing soan kọn. Dăn dŏng kọn kơrmap gar nùs tơhir mơ kơp kỡn be ală ngai sơnrờp, ò lòi bơta koñ gơboh kọn gơlik ò kwơ. Kơp kỡn ồs hơng bơta koñ gơboh tom kọn sum àng lơr, nàng kọn ơm rềp Kơnrẵn rlau kòp ngai tai. Kọn jơh nùs họi dăn, kọn ai sơnđăn Yang Jesu Krist, Amen.
Ơ ală ồng mọ ọh mi koñ gơboh, tŭ nùs he tơhir Yang jrô ơnang rlau jơh – sền màng ryŭ tĕ mơ pơrdờn tŭ niam hơ̆. Yang Jesu ò di mìng lơh hừh nùs ală bơta kơp kỡn jrô ndơp rlau jơh tom nùs he, mơya găm cèng tus he ĭn dô bơta koñ gơboh ò tŭ lơi pơn ndrom. Lòi tĕ kòp jơi phụk băl mơ Kơnrẵn nàng gơlik gơs dô gùng dà lơngap lơngai, nàng bơta koñ gơboh sơlơ ngai sơlơ tih dờng mơ lơh rài kis he di sơlơ ngai pa wơl.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply