Rài kis ơs ceng tus ală bơta gơlong nisơna, mơ gơs dơ̆, ală mpồng mơ bol he ơn bơta gơn kơnòm gen til diđap mat he. Ală tŭ lơmpah hơ̆ lơh bol he gơlơh lot tis nrah mơ ò rgơi lơh bơta lơi. Mơ ya ồng mò oh mi gơs kơlôi lah tòm tŭ mpồng do til, gen dô mpồng ndai niam rlau rơp pờ, ceng bol hư mut tòm bơta rơndap dơng ryŭ mơ Yàng neh rcăng lai?
Ngai do, ngai 18/09/2024, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl ồng Joan Ingram dê bơh tơnggumê TŬ MPỒNG NISƠNA TIL WƠL.
“Ơ hwềng soàn añ, ñchi bơh tài mê gơplơ̆ nùs mơ ñchi bơh tài ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, La Bơtau dong kòl añ mơ la Yàng Tom Trồ añ.” (Đơs crih 43:5)
Àng drim ngai hơ̆, añ gơlơh gơs dô ít pha is tŭ tiang liang mpồng rơnggô, pơnjat la dô bơta teh mpồng pràn. Tŭ pờ mpồng, dô nă cau ồng còp să añ, mơ lùp añ lah añ ngăn la cau tòm hiu do hala ò. Añ hơ wơl dô bă pin wil wơl, nùs gơhao bơta pin rngòt bơh tơnggu ngăn cau ông do dê.
Nisơna, ồng yal dô bơta yal tơnggit gơlơh mơp dơl: hiu mơ añ jồm opah neh kol cau ai wơl mơ mor geh cèng brô diđap oă cau. Añ ai lơh krơi mơ mơp dơl ngan diđap bơta yal iơh do.
Ồng lik ri tơn, añ hòi tơn mơ ală cau ai ơpah hiu añ in nàng lùp bơta lơi gơlik gơs. Bol khai hơ nền lah cau tòm hiu neh ò tơm wơl ală pơnah lèng can mơ neh kol dôs, lam tus bar nơm hiu tòm bọn kol ai wơl.
Añ ò pleh klas gơhao gơjrañ mơ sơ êt sơ il, tai bơh tŭ lơmpah lòt găn, añ neh tơm khà jên ơpah hiu tơm toh dê kơp kơnhai. Bơta gơlik gơs be neh kol cau pơrlôm, sền òsơp mơ kơlôi rcăng oă lơh añ in ò dơh tơm bơta kơlôi sơnưng bơh bơta gơlik gơs nisơna dô.
Đơs ngăn, añ ò git pla lơh mbe lơi! Khà jên prìa ò gơs, mơ bol he kung ò gơs bơta sac rwah lơi: pơnah ơn tơrgom añ jê ò tơl nang roat hiu hala gơs mat bal nàng ai roat wơl hiu do.
Ngăn, añ leh lơh prong preh oă tŭ jơ tòm bơta kơlôi rcăng, ala mơ jao phi jơh ală bơta àñ kơnjơ̆ Yàng in. Añ pal cang dơp git mơ yal mơ Yàng lah añ gơri mơ Yàng wil tơl. Tŭ lơh behơ̆, añ neh geh dong klàs bơh bơta hưh nùs is mơ bơta ơs gơn kơnòm is să he.
Bơh bơta dòn, añ lơh nền tus tòm tiah cau brô wơl hiu mơ ò hềt git bơta lơi rơp ơm gơn añ hơđap nê. Ntao digùl tŭ lơmpah kơnjơ̆ hơ̆, añ gơlơh roh gơn kơnòm mơ moat jrung. Dà mat hor dê bồ, añ ñim tòm bơta jê sồt bơh ò git dô rài kis añ rơp lòt tiah lơi, tŭ hiu nhă añ ò găm tiah ơm tai.
Añ rơndap lòt gơñ. Tŭ gam ntao đah bơdih ơnih cau kwang cahrña dê, dô nă cau ồng tus rềp mơ lùp añ kòñ roat hiu lơi. Añ moat jrung hơ wơl la añ ò tus năng roat hiu, mơ yal loh ală bơta gơlik gơs mơ añ. Nisơna, ồng đơs lah hơ̆ la hiu ồng kòñ roat.
Mơ nùs nhơm bơcah moat, añ yal ồng in kơnọ kơp pơnah dềt bơh hiu kơp kòñ niam dô. Ò rgơi kơlôi tus, ồng hòn chò mơ rcăng sir pal roat hiu dô, bơta lơh nền rlau mơ cau ồng bơh lai neh teh mpồng hiu añ.
Mhô ngai hơ̆, añ pờ mpồng wă rò hiu nhă cau tòm hiu pa mut tòm hiu añ. Bol khai ò pồn ndơp bơta ai lơh krơi tòm tŭ gŏ hiu niam oă rlau mơ bol khai neh kơlôi bơh sơnrơp.
Bơta tìp mat hơ̆ be là dô nơm phan bàn Yàng ai tòm tŭ añ pal càng rlau jơh. Bol he neh pơyom sir ơpah hiu mơ sơrbac sơrbang rơndap lik hiu. Hiu nhă añ rơp tus tòm dô nơm hiu dềt bol khai dê, mơ dô nơm sră cơng tang opah hiu jơl tus dê tŭ añ jòi geh dô nơm hiu ơnang rlau.
Prau kơnhai tơnơ̆, tŭ at kai pờ mpồng hiu pa he dê, añ dơp geh ală tŭ tơngai niam gam tus rềp – ngai mơ añ ò găm pal kơlôi rcang tai bơh khà jền ơpah hiu kơp kơnhai tai.
Gơs ală dơ̆ bol he ò rgơi wơng ñchi bơh tai ală bơta ò jat nùs kòñ neh gơlik gơs tòm rài kis. Mơ ya digùl ală bơta sơlung sơlăng hơ̆, he rgơi dòn kơnòm wil tơl lah Yàng rơp bơ di dê tŭ tơngai – tai bơh Kơnnràñ sùm tus tòm tŭ lơmpah ò wil tơl, ò tŭ lơi gơñ mơ kung ò tŭ bat.
“Jơh nùs dòn kơnòm tĕ di Yàng Jehôwa.Bañ dòn kơnòm di bơta àng loh kòn dê; Tòm jơh ală gùng dà kòn dê, dòp git tĕ Kơnràñ, Gen Kơnràñ rơp bơsong ală gùng dà kòn dê.”
Yàng gam til mpồng mơ pờ mpồng lơi tòm rài kis ồng mò oh mi dê?
Digơlăn ală mpồng til wơl ò di là jơh, mơ la cơnđoà lòt nàng ồng mò oh mi in rcăng ai ală bơta crih crai rơp tus in. Tai bơh Yàng sùm gơs dô bơta rơndap dơng rlau ơn is ồng mò oh mi in.
Dan jà bol he dô nùs bal tòm bơta hòi dan:
Khoai Yàng, tŭ ală mpồng nisơna til wơl, dan Kơnràñ dong kòn dòn kơnòm là Kơnràñ găm tì lăm kòn tus bơta niam rlau. Dan ai kòn in bơta lơngap lơngai mơ kơ̆ nùs tòm tŭ ơm gơn, mơ pờ nùs dơp lèng ală tŭ lơmpah pa mơ bơta tì lăm Kơnràñ dê. Kòn dan dòn kơnòm dê bơta rơndap wil tơl Yàng dê mơ hòi dan Kơnràñ pơnjat tì lăm kòn mơ bơta kòñ gơboh ò tơmgơl Kơnràñ dê. Kòn ai sơnđan Yàng Jesus Krist hòi dan mơ Yàng Bèp, Amen.
Ơ ală ồng mò oh mi kòñ gơboh, kơp dơ̆ dô nơm mpồng til wơl, dòn tĕ lah Yàng gam pờ ồng mò oh mi in dô nơm gùng pa, ơnang rlau mơ bềng jơnau hơ rlau. Ălă bơta gơlong bol glar mơ tơmgơl ò di la jơh, mơ la tŭ lơmpah nàng ồng mò oh mi mùt tơm tơnggu rơndap niam rlau mơ Kơnràñ neh rcăng sir. Kư prăp kơ̆ bơta dòn mơ nùs nhơm kơ̆ nùs, bơh tŭ tơngai Kơnràñ dê sùm wil tơl mơ ò tŭ lơi siơ̆u bơta krơi.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply