Tòm gùng lòt jat Yàng, oă dơ̆ bol he rngòt rngơt hala pin wil wơl. Bol he ò git nền lah he rgơi lòt gan ală bơta gơlik gơs jơ do hala ò, bơta gơlòng bol glar do gơs gùng lik sơl, hala rài kis găm tŭ lơm pah hala ò?Ală tŭ jơ behơ̆ gơlơh he in kơlôi sơ nơng oă ir bơh bơta di đap mat he mơ gơ hŭi sền gŏ Yàng.
Ngai do, ngai 21/09/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Jessica Teed bơh tơnggume: YÀNG SUM DÒN SONG.
“Ơ Jehôwa Yàng Tom Trồ Gơnap Gơnoar Dờng Làm Jơh dê, ñcau gơs gơnap gơnoar ndròm be Yàng taih? Ơ Yàng Jehôwa, bơta dòn song Yàng dê ơm gùt dar Kơnràñ.” (Đơs Crih 89:8)
Dùl tòm ală sèng Sră Goh añ gơboh gơ bài rlau jơh ơm tòm Đơs Crih 89. Tòm pơnah lồi sèng 8 dê, Yàng ràng tơlik dô cik mơ jơnau hơ̆ neh gơlơh dô bơta tòm gơl tòm añ bơh bơta git wă bơh bơta dòn song Yàng dê. Hơ̆ la cik “ơm gùt dar”.
“Ơ Jehôwa Yàng Tom Trồ Gơnap Gơnoar Dờng Làm Jơh dê, ñcau gơs gơnap gơnoar ndròm be Yàng taih? Ơ Yàng Jehôwa, bơta dòn song Yàng dê ơm gùt dar Kơnràñ.” (Đơs Crih 89:8)
Dô êt sră ndai ràng tơlik lah “Yàng Jehôwa dòn song wil tơl”, gơtha la dòn song la nùs nhơm ò tòm gơl Yàng dê.
Bơta dòn song Yàng dê la dô pơnah dờng màng mơ ò tòm gơl bơta Kơnràñ la ñcau lơi. Yàng dòn song ngan tian gơs bơta hơ̆ lik bơh Yàng mơ ơm tòm ală broă Yàng lơh. Yàng sum sum dòn song; lài ngan la “tòm sơndiang klam jơngo cik” mơ tòm tŭ bol he ò dòn song mơ Yàng.
Rôma 3:10-12 tơngkah bol he bơta do: “Be neh cih lah: Ò gơs dô nă cau lơi song ring ò, Dô nă kung ò sơl.
Ò gơs dô nă cau lơi git wă, Ò gơs dô nă cau lơi jòi jat Yàng Tom Trồ. Jơh ală bol khai neh tìs nrah, tơl nă ndròm bal gơlik gơs ò kwơ; Ò gơs dô nă cau lơi lơh bơta niam, Dô nă kung ò sơl.”
Tòm rài kis tồi glài mơ bềng bơta bơcah lề bol he dê, Yàng Tòm Trồ kư̆ dòn song wil tơl mơ bol he. Dròm be Yàng Jesu niam nùs phi să nàng chơt hơ đăng chi pơng lơh gơs phan ơn tơwài glài jơh tơl nă bol he in, Yàng kung ò pơlai tòm broă dòn song mơ bol he. Sră Goh ai bol he in git lah Kơnràñ lơh bơta do dô bă ai gòi tài bơh Yàng kòñ gơboh bol he. “Bơh jơh tơl nă neh tìs glài, siơ̆u roh bơta gơklŏ Yàng Tom Trồ dê; mơ bol khai kơnòm di bơta nđàc ai gòi Yàng Tom Trồ dê, bơh bơta tơwài glài tòm Yàng Krist Jesu, tàng geh kòp la song ring.” (Rôma 3: 23-24)
Ngan gơ dê lah bol he ò chài rgơi nàng dòn song mơ Yàng gan dê bơta pràn is he dê, mơya broă bol he siơ̆u bơta dòn hala siơ̆u dòn song mơ Yàng ò lơh nền bơta Yàng dòn song mơ bol he be lơi. Kơnràñ rơp mơ sum dòn song wil tơl tài bơh hơ̆ la Yàng mơ Yàng ò tŭ lơi tòm gơl.
Bulah tòm tŭ añ ơm ngài mơ Yàng oă rlau jơh mơ sac rwah gơplơ̆ nùs mơ Yàng, kis rài kis he kòñ, gen Yàng kư̆ dòn song mơ añ, bulah añ ò gŏ bơta hơ̆. Tŭ añ roh broă lơh, Yàng kư̆ dòn song nàng ai pà ală bơta pal càng añ jê, bơh hiu ơm añ jê, mơ phan sa hơđang cơnơng sào añ jê. Yàng ngùi tŭ jơ hơ̆ nàng ai añ in đal git lah añ rgơi kơnờm dê Yàng dô bă wil tơl ală bơta he pal càng mơ ală broă añ geh la bơh Yàng ai pà. Tòm tŭ hơ̆, mat añ gơ pò nàng đal git Yàng oă rlau tai bơh git wă rlau bơh gùng dà Yàng kòñ gơboh añ.
Tŭ jo do, tŭ lòt gan sơdiang ñìm rac tài bơh bau klau añ neh sang rài, bơta dòn song Yàng dê ràng tơlik tom ală broă mơ añ ò kơlôi sơ nơng la rgơi. Mat añ sền dê Yàng tŭ Yàng tề lam añ lòt gan tòm sơndiang hơ̆ mơ sơm bòi nùs nhơm bơcah lề añ jê. Dô dơ̆ tai, Yàng ràng tơlik bơta dòn song Yàng dê gơwèt mơ añ gan dê bơta ai pà ală broă añ pal càng, ngan gơ dê lah, Yàng neh ai pà oă bơta ring niam rlau jơh oă rlau mơ bơta bol he hòi dan mơ kơlôi sơ nơng. Añ rgơi đal bơta kòñ gơboh Yàng dê găn dê broă lơh HIu Jum Goh Yàng dê.
Tŭ jơ hơ̆, Yàng dòn song mơ añ. Tòm rài do mơ jơh rài tơnơ̆, Yàng kư̆ sum dòn song tài bơh hơ̆ la Kơnràñ. Yàng kư̆ sum dòn song bulah ồng mò oh mi geh tìp bơta lơi mơ ơm ngài mơ Yàng ò git nđò.
Dan Yàng pò mat ồng mò oh mi nàng đal git bơta dòn song Yàng dê dô bă loh làng tòm rài kis mơ ồng mò oh mi đal git Yàng sum dòn song tài bơh Kơnràñ kòñ gơboh ồng mò oh mi.
Dan jà bol he dô nùs bal tòm bơta hòi dan:
Khoai Bèp kòñ gơboh, kòn ưn ngài Yàng tài bơh bơta kòñ gơboh mơ dòn song Yàng dê hơđăng rài kis kòn. Bulah bơta gơlik gơs gùt dar kòn be loiw, bulah kalke dờng be lơi, dan tơngkah kòn lah bơta dòn song Yàng dê kư̆ dờng ngan. Dan Yàng dong kòn ơm kơ̆, pơnjat dòn kơnờm Yàng rơp tề lam mơ lơh gơs ală broă gơlik gơs kwơ ală cau kòñ gơboh dê Yàng. Mơ dong kòn kư̆ ròng siam să tòm gan dê bơta dòn song dờng ngan Yàng dê. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, Lòi tĕ dô ết tŭ jơ ưn ngài Yàng tài bơh ală bơta ồng mò oh mi git làm bơh bơta dòn song Yàng dê. Broă bol he kòp ală bơta lơngai lơ ngo Yàng ai pà rơp gơlơh bol he in sơlo dòn kơnờm Yàng mơ bơta dòn song Yàng dê. Bơta bol he jong rơ Yàng rơp tơngkah nùs nhơm mơ bồ dơngoh do gơ wèt mơ bơta ring niam mơ kòñ gơboh Yàng dê. Kơp kòñ kòp nă bol he geh ring pa gan dê jơnau Yàng tòm ngai do.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply