Tòm rài kis kòp ngai bol he mòng đăl mơ ală bơta gùt dar he, mơ kơlôi lah he rgơi lơh geh, rgơi geh ăt bô ală bơta gơlik gơs. Mơya tòm tŭ càl rbùt dờng gơtơn tus dô bă nisơna, bol he đăl git he ngăn dềt rhền, pran cau ò rgơi pơndròm mơ càl rbùt dờng. La cau jat Yàng, bol he gơs jơnau hơ lah he rgơi lòt găn cal rbùt dờng behơ̆.
Ngai do, ngai 25/9/2024, tơng bơta hòi dan kop ngai dan ja ồng mồ oh mi kơlôi sơnơng jơnau Yàng bal mơ cau cih Cathy Irvin bơh tơnggumê CÀL RBUT DỜNG RAI KIS.
“Yàng la tiah kìng crŭ ăñ jê,Yàng sền gar ăñ klàs di bơta bòl glar; Yàng ai jơnau driau hòn chò gòm gơrwang añ mơ dong tă añ.” (Đơs Crih 32: 7)
Tòm tŭ añ nggui sền bơta yăl tơnggit gơ-rềng tùs càl-rbut dờng neh gơ hwoai lòt găn, añ dờp git bơta àñ kơñ-jơ̆ ai ală cau ơm rềp kŏng bơta gơ-rềng. Măt añ ngơr dà tŭ kơlôi tùs ală cau dờng sơnăm roh jơh ală bơta. Añ nggùi sền dô nă cau ùr tòm ti-vi mơ jơnau đơs tưh òl: “ añ pàl càng lòt dŏng cau bơyô rềp añ jê.” mò găm ơm tòm hiu lề-sềt he dê.
Oă cau lang bol tòm tiah rbùt lòt găn neh ưn-ngai Yàng bơh bol hai găm kis. Dô nă mò 81 sơnăm neh lòt găn rbùt is dô nă ai tơnggit mò ò gơs tiah lơi nàng lòt. Jơh tơl nă cau ơm gut dàr neh dô lik. Mò sền gŏ hiu khai dê gơ lơng-gơh lơng-gơr mơya añ geh rìng lơngai. Bulah mò ò hềt git hiu gur dàr neh tơr-lơm lề jơh wil-tơl.
Di gơ na Yàng tòm hiu jum bơ yô añ jê dờp hit bơta àñ-kơñ jơ̆ bơh ală cồng nha kờñ jơ̆ mơ càl rbùt dờng neh cèng wơl. Ồng neh hòi jà dŏng kờl càu làng bòl tòm pe poh pơ-jum. Mơ rờp gờs oă càu dŏng kờl bơh ală pơnah jền priă băl mờ nùs-nhờm.
Broă bơt wơl dô rài kis dô nă càu lơi hơ̆ la dô bơta pàl càng ơn nùs. Bơta dô lơh añ in kơlồi bơh bơta dờng mang broă gơs bơta dòn pran kơl dăng dê, rai kis geh bơt bơtao hơđăng pơnai lŭ kơ̆-cềla Yàng Jesu. Ming tòm Kơnràñ rgời ai bơta rìng lơngai tòm kờp ală càl rbùt dờng mơ bol he tòm tip tòm rai kis. Tòm tiah bol he kis, bol he ming dờp git ală bơta gơ-rềng-nggòc bơh càl rbùt dờng dê lơm. Mơya gơs ơnih tiah mdai bulah ờm ngai mơya găm pàl kŏng gơ gùh dầ kŏ. Bulah kơnă gơrềng pha is, jơh tơl nă bol he kŭng ơn jơnau ưn ngai Yàng bơh bơta sền gàr, gòm gơr wàng mờ dŏng kờl Kơnràñ dê.
Càl rbùt dờng lòt găn lời wơl oă cồng nha kờñ-jơ̆ kờñ-jùt. Hiu tŭm rgơi bơt wơl, phăn sa mơ ui ào geh ai pà, mơya roh rùi bơh să jăñ la ò rgơi lơh pa wơl.
Tòm tìp mơ ală bơta gơlik gơs ngăn hơ̆ añ geh tơngkah bơh bơta lơi la dờng mang tòm rài kis do. Loh làng hơ̆ la hwềng sòan jơi kòn mơnùs dê. Hơ̆ la tơnggu ñchì bơh tài bol he păl ơn prăp oă tòm broă dŏng bol khai dòn kơnòm dê Yàng mơ pơnjat la ai bol khaibin ală bơta dŏng kờl bơh phăn mơna tòm kờp tŭ mơ bol he rgơi lơh.
Dilah bol he gơs bal mờ gơs bơta dòn kơ̆ cề tòm Yàng, bol he rgời lòt găn jơh ală càl rbùt dờng rài kis dê. Hơ̆ di hơlăn la nơta gơlòng kờp ngai hala dô càl rbùt dờng lơi hơ̆ găm ntoat tus hơ đah bol he.
Càu yăl wơl bơh trồ miu càl neh pơn-đơl pràn nang tơngkah ală càu in bơh bơta sơr-bơng roh rơp gơlik gơs ală cau tòm mpồl bol khai in. Mơya ò di tŭ lơi bol khai kŭng rgơi git lài lơm. Oă càl rbùt dờng rờp brồ tơm pràn ngăn tòm tŭ mơ bol he ò kờp kơñ rlau jơh. Bơta do tơngkah wơl añ kah tùs cau sò tơm bol he la cà-ràk. Khai brồ lơh bol he tòm ală tŭ bol he ò kơlôi tus. Bol he pal sùm drơng kờp mơ ơn bơta dòn kơnòm dê Yàng. Bơh Kơnràñ la Bơtau ăt sơmbat rài tơnơ̆ bol he dê.
Bol he ò rgời sùm rcăng sìr ai kòp ală càl rbùt dờng in, rbùt sơr-bơng hala càl wàl bong, mơya bol he rgơi gơs bơta dòn tòm Yàng kờp dô ngai. Bol he rgơi rìng lơngai di gùl kơp ală rbùt dờng gơlik gơs tòm rài kis hala bơta brồ lơh ală cau sò tơm dê jòi gùng nàng tơn-roh bol he. Yàng Jesu la Bơtau dŏng tă, Bơtau dŏng tơwai ồng mò oh mi dê mơ la dô gơlăng jòng rih.
Yàng đơs mơ càl rbut lah “ờm tĕ mŏ mŏ”. Dan jơh bol he ngui gơnap gơnoăr mơ he geh gơs tòm Yàng Jesu nàng đơs mơ càl rbut dờng rai kis jơnau drờm be hơ̆.
Dan jà bol he dô nùs bal tòm bơta hòi dan:
Ơ Bềp kơñ gơboh, kòn ưn ngai Yàng bơhKơnràñ la Bơtau ăt sơm-băt rai kis mơ rai tơnơ̆ kòn dê. Kòn ưn ngai Yàng bơh Kơnràñ la khèl mơ la tiah kìng crŭ pồn să añ jê, tiah kìng crŭ ring lơngai kòn dê. Kòn ưn ngai Yàng bơh bulah càl rbut dờng hala bơta brồ lơh ală cau sò tơm dê dờng mƀe lơi, gen ală bơta hơ̆ kŭng ò dờng rlau mơ Yàng kòn dê. Ưn ngai Yàng bơh bơta rìng lơngai Yàng ai. Dan Yàng pơn jat tề lăm kòn kơp dô ngai, bơtô sồr kòn tòm gùng da Yàng dê nang kòn kư̆ gơn kơnòm mìng yòm dô nă Kơnràñ lơm. Dan Yàng ngui kòn nang tề lăm oă cau ndai găm tòm càl rbut jòi geh tiah kìng crŭ tòm Kơnràñ. Kòn jơh nus hòi dan, tòm sơnđăn Yàng Jesu Krist, A-men.
Ơ ală ồng mò oh mi kờñ gơboh, kơp kờñ jơnau Yàng bơn-tơl bơta dòn mơ dŏng bol he kừ kơ̆ tòm gơnoăr ăt bồ wil tơl Bềp hơđang rlau jơh dê. Bơh ngăn ò gơs bơta lơi bol he tòm tìp ơm bơdih bơta ăt bồ jrô ơnang Kơnràñ dê. Kờp kờñ tŭ ông mò oh mi geh bơta pơndòm pơniang mơ neh lòt găn càl rbut dờng lơi hơ̆, Yàng rơp bơn tơl ồng mò oh mi in bơta khin cha nang tòm pà jơnau lơh cờng hơ̆ ai ală cau kŭng gơ tìp be bol he. Bol he geh pơndòm pơniang nàng gơlik gơs cau pơndòm pơniang cau ndai. Dan Yàng ngui bol he nang yăl tơlik bơta kờn gơboh, bơta dŏng klas mơ bơta rìng lơngai Kơnràñ dê ai kờp nă cau in.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.