Nyob rau hauv lub neej tsis muaj sijhawm khoom txhua hnub zoo li no, yeej tsis yoojyim rau peb nres thiab saib ib puas tsav yam uas Vajtswv tsim los nyob hauv lub ntiajteb no. Tiamsis koj puas paub, ib puas tsav yam uas Vajtswv tsim los puav leej yog zoo thiab nthuav tawm Vajtswv tus kheej. Vajtswv tsim peb los, saib xyuas peb, cawm peb thiab txhua hnub hloov pauv peb raws li Vajtswv tus yamntxwv.
Hnub no, yog hnub 26/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm Zaj kawm TAU TSIM DUA TSHIAB.
“Tus uas nrog Yexus Khetos koom ib txojsia, tus ntawd yog neeg tshiab. Nws lub neej qub twb dua lawm nimno nws muaj lub neej tshiab” (II Kauleethaus 5:17)
Kuv yog ib tug neeg nyiam lub caij nplooj ntoo zeeg, thiab kuv hnov zoo siab heev thaum lub caij nplooj ntoo zeeg los txog, pom tej huab cua laj ntxias ntsawj dhau ntawm tej qhov rai, ua rau kuv hnov kaj siab heev.
Kuv cia siab kom yus muaj ntau lub sijhawm mus rau tom hiav txwv thiab nce mus pem tej yaj sab. Kuv twb cog lus rau kuv tus ntxhais xeeb Destiny hais tias, thaum twg nws pib mus kawm ntawv thiab kuv tus ntxhais rooj tshoob tiav, peb yuav mus ua si ib zaug.
Kuv tus ntxhais xeeb nyiam khaws tej nyuag plaub noog thiab tej nyuag qe zeb me me, ntau zaug nws tseem nyiam khaws tej nyuag nplooj ntoo zeeg thiab. Kuv nyiam qhia rau kuv tus ntxhais xeeb paub tias Vajtswv yog tus hloov xim rau tej nplooj ntawd, thiab thaum uas tsob ntoo tsis muaj nplooj lawm ces yuav txog lub caij tej nag daus poob los npog tej tsob ntoo ntawd.
Kuv kuj hais rau kuv tus menyuam xeeb paub tias ntoo nws cheem tsum ib cov nplooj tshiab tom qab lub caij ntuj no xaus. Txhais tias thaum ntuj tshiab tuaj thiab ntuj kub los, Vajtswv yuav pub kom lawv muaj ib cov nplooj tshiab.
Peb yuav kawm paub txog lub ntiajteb dav thiab zoo nkauj uas Vajtswv tau tsim los qhia rau peb tej menyuam, tej xeeb ntxwv txog tus Vajtswv zoo, tias Vajtswv tau tsim lub ntiajteb no los kom peb muaj kev zoo siab txais yuav.
Vajtswv niaj hnub saib xyuas Vajtswv tej menyuam, pub nag pub tshav kom tej nroj tsuag txawj hlav. Tiamsis peb ho pheej ua tug tsis paub tsis quav ntsej txog tej me me ntawd.
Nyuam qhuav hnub dhau los xwb, kuv saib kuv tus miv ua si nrog ib daim nplooj thiab pom tias nws zoo siab npaum cas. Nws dhia ncig daim nplooj tas muab pov nce ntuj. Tus miv nyiam ua si, dhia rau ub rau no tsis hnov nkees li.
Tiamsis puas ho muaj zaum twg peb hnov nkeeg rau tej uas pheej ua ncig mus ncig los ntawd? Puas muaj zaum twg peb nres thiab xav txog tej uas Vajtswv tau tsim los, thiab ua Vajtswv tsaug vim txhua hnub tau ua neej thiab txais yuav txhua yam zoo hauv lub ntiajteb no?
Kuv nyiam lub sijhawm uas tej nplooj ntoo ntsuab pauv mus rau nplooj daj, tas liab. Thaum muab tej nplooj ntawd los tso ua tej tshooj, kuv thiab kuv tus ntxhais xeeb yuav muab pov rau saum nruab ntug, thiab rov qab muab tes cug. Thaum ua li no kuv yuav qhia rau kuv tus ntxhais paub txog Vajtswv thiab tag nrho ib puas tsav yam uas Vajtswv tsim los.
Tej nplooj no ua rau peb nco txog tej haujlwm uas Vajtswv tau ua, thiab Vajtswv tau pub Nws tib leeg tub los cawm peb. Kuj zoo li tej nplooj ntawd, thaum poob thiab tuag mus, peb kuj yuav tuag mus, tiamsis peb txhua tus cheem tsum Vajtswv pab kom hloov pauv peb dhau los ua ib tug neeg tshiab.
Thaum peb caw Tswv Yexus los nyob rau hauv peb lub siab, Vajtswv ua rau kom peb dhau los ua neeg tshiab, muab nws lub tsho ncaj ncees los hnav rau peb. Hloov pauv peb kom zoo li Nws tau hloov tej nplooj ntawd. Vajtswv pab kom peb tus neeg qub tuag mus thiab ua lub neej tshiab nyob hauv Nws.
Lwm zaug thaum uas tej nthwv cua ntsawj dhau, thiab koj pom tej nplooj yoj mus yoj los, tseg koj lub sijhawm los xav txog thiab nco Vajtswv txiaj ntsig txog tej uas Vajtswv tsim los.
“Tus uas nrog Yexus Khetos koom ib txojsia, tus ntawd yog neeg tshiab. Nws lttb neej qub twb dua lawm nimno nws muaj lub neej tshiab.” (II Kauleethaus 5:17)
Thov caw nrog kuv peb thov Vajtswv ua ke:
Tus Tswv, thaum peb saib lub ntiajteb uas Vajtswv koj tsim los, peb paub tias peb yog tus uas zoo tshaj plaws. Ua Tswv Yexus tsaug vim koj tau cawm peb, thiab pub kom peb muaj lub neej tshiab hauv Koj. thov kom Vajtswv txoj kev hlub yuav tshoov kuv siab kom ua lub neej haum Vajtswv siab thiab saj tau lub neej hloov pauv dua tshiab thaum uas nyob hauv Tswv Yexus. Kuv thov hauv Tswv Yexus Khetos lub npe. Amees.
Cov kwv tij, peb muaj ib lo lus cog tseg tias: “Yog leej twg nyob hauv Yexus Khetos, tus ntawd yog neeg tshiab.” Tswv Yexus yog peb lub hauv paus cia siab thiab yog txojsia rau tus uas ntseeg nws. Txhua yam qub yuav dhau mus, txhua txoj kev txhaum yuav raug zam thaum uas peb nkag los saj Vajtswv txoj kev hlub!
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply