Digul bơta kis sơrbac sơrbang mơ oă broă tòm rài kis kơp ngai, kalkê ngăn nang bol he ơm bơdơh wơl mơ sền rmê bơta crơng gơs Yàng dê hơđăng dunnia do. Mơ ya ồng mò oh mi git ò, jơh ală phăn Yàng crơng gơs là niam lơm mơ ràng tơlik bơh să tờm Kơnràñ. Yàng neh crơng gơs bol he, sền gar bol he, dong klas mơ kơp ngai tơm gơl pa bol he jat rùp să Kơnràñ.
Ngai do, ngai 26/09/2024, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl mò Cathy Irvin dê bơh tơnggumê GEH CRƠNG GƠS PA.
“Behơ̆ dilah cau lơi ơm tòm Bơtau Krist, hơ̆ la cau neh crơng gơs pa; ală bơta yau neh roh rau, do ală bơta gơlik gơs pa lơm.” (II Kôrintô 5:17)
Là dô nă cau kòñ gơboh kơnhai jrùh nha, mơ sùm hòn chò kơp kơnhai jrùh nha tus, bulah cal truh ết gợi kơp măng kung tơl lơh añ in kòñ – lơbơn, ring lơngai mơ niam ngăn.
Añ gam kơp kòñ he rơp gơs tŭ lòt tus tòm tiah digah dàlềng oă rlau tai kung be ală tiah yồ jơnhoa. Añ neh hơ mơ kơmòn ur dềt añ jê, Destiny, lah tŭ lơi khai sơntơm lòt bơtê mơ bơta tơmbau kòn ur añ neh sir, bol he rơp sơntơm gơs bơta lòt tòm ngai lồi poh dê.
Kơmòn ur añ là cau kòñ dơñ ală sơnò sềm mơ ală lŭ dềt, kung digơlăn khai kung kòñ dơñ ală nha rmit, pơrhê duh tòm kơnhai jrùh nha. Añ kòñ đơs kơmòn añ in git lah Yàng Tòm Trồ la Bơtau tơmgơl ñồm dà ală chi in, mơ tus dê chi ò găm ală nha lơi, gen rơp geh jrơm gom mơ pier tòm ală ngai noat mrềt rlau.
Añ kung đơs kơmòn in git lah chi rơp cang dô dap nha pa tơnơ̆ lòt găn dê kơnhai mrềt. Gơtha la kơnhai chi che bơkao mơ kơnhai phang tus, Yàng rơp tơnsoh bol gơ in dô dap ao pa mơ ală nha tơlir pa.
Bol he rgơi bơtê git bơh dunnia dơng ơnang, hang niam Yàng Tòm Trồ dê mơ bơtọ wơl ală kòn sau, sơno sơnê in bơh dô Bơtau niam, lah Kơnràñ neh crơng gơs plai ù dô nàng bol he geh dơp leng.
Yàng sùm sền gar ală kòn sau Kơnràñ dê. Yàng ai miu mrềt bal mơ tơngai răm nàng bơkao hòn rờ rai. Mơ ya bol he ơs săng lơi mơ ò wet tus ală bơta dềt rhền dô.
Pa lúi dô ngai nê, añ neh lăng kòn mèo he dê kơnhơl mơ dô nơm nha mơ gŏ gơ chò hòp mbe lơi. Gơ sơnđoh gut dar nha, gen tơng nha tus hơđang pah gời. Ngal ngăn, mhăr ngăn mơ ò ngkam dô ết lơi.
Mơ ya gơs tŭ lơi bol he gơlơh ò gơdăn tai bơh ală bơta gơlơh wil wơl hala ò? Gơs tŭ lơi bol he ơm dơh wơl mơ kơlôi bơh bơta crơng gơs crih crai Yàng Tòm Trồ dê, dô nùs bal ưnngai Kơnràñ bơh kơp ngai geh kis mơ dơp leng ală bơta gơs tòm dunnia do hala ò?
Añ kòñ ngăn tŭ jơ ală nha gơlik tus dà mrit, dù mơ pơrhê. Tŭ neh tơrgom nha chi dô dap, añ mơ kơmòn ur rơp sih jơh hơđang pah gợi, gen kơp wơl bol gơ. Lơh bơta do rơp dong añ đơs mơ kơmòn bơh Yàng Tom Trồ mơ jơh bơta crơng gơs crih crài Kơnràñ dê.
Ală nha kơnhai kơnhai jruh nha tơngkah lah bol he là broă Kơnràñ lơh, mơ Yàng Tom Trồ neh ai Kòn Dùl Kơnràñ nàng dong bol he. Kung ndrơm be ală nha, jruh mơ chơt, mơ ya bol he rơp ò chơt, mơ ya kơp nă bol he pal cang geh Yàng bơtao wơl nàng gơlik gơs cau geh crơng gơs pa.
Tŭ bol he jà Yàng Jêsus ơm at bồ nùs he, Kơnràñ lơh bol he gơlik gơs pa. Kơnràñ tơn soh bol he in ao song ring Kơnràñ dê. Kơnràñ tơmgơl bol he be Kơnràñ neh tơmgơl dà ñôm ală nha dê. Kơnràñ dong bol he rhơi rhơi chơt cau yau nàng geh bơta kis pa tòm Kơnràñ.
Dơ̆ ngkơi tŭ cal khôm, mơ ồng mò oh mi gŏ ală nha lơnggơh, lơi tĕ nùs nhơm ồng mò oh mi kơlôi sơnưng mơ git ưnngai bơh bơta crơng gơs crih crài Kơnràñ dê.
“Behơ̆ dilah cau lơi ơm tòm Bơtau Krist, hơ̆ la cau neh crơng gơs pa; ală bơta yau neh roh rau, do ală bơta gơlik gơs pa lơm.” (II Kôrintô 5:17)
Dan jà bol he dô nùs bal tòm bơta hòi dan:
Ơ Yàng, tŭ bol kòn sền lăng trồ tiah mơ Yàng neh crơng gơs, bol kòn git bol kòn là phăn crơng gơs crih crài rlau jơh. Ưnngai Yàng Jêsus bơh neh dong klas bol kòn, mơ ai bol kòn in bơta kis pa tòm Kơnràñ. Kơp kòñ bơta koñ gơboh Yàng sùm chôl bơtrôt kòn kis niam nùs Kơnràñ nàng kòn git lam rai kis tơmgơl pa wil tơl tŭ geh ơm tòm Kơnràñ. Kòn ai sơnđăn Yàng Jêsus Krist hòi dan mơ Yàng Bèp, Amen.
Ơ ală ồng mò oh mi kòñ gơboh, bol he sùm gơs dô jơnau hơ lah: “dilah cau lơi ơm tòm Bơtau Krist, hơ̆ la cau neh crơng gơs pa”. Yàng Dòng Klàs Jêsus la tơm ryas bơta gơn kơnòm mơ bơta kis cau lơi in ơn bơta dòn dê Kơnràñ. Jơh ală bơta yau rơp roh, ală tồi glài rơp geh toh tŭ ồng mò oh mi cơnđoà mut tơm mơ git lam bơta kòñ gơboh Kơnràñ dê!
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng.
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply