Thaum muab ib ceg ntoo tshiab coj los txuas ua ke nrog ib tsob ntoo, ces cov kua mis ntawm tsob ntoo ntawd yuav tu thiab ua rau kom ceg ntoo ntawd loj hlob zoo tuaj. Kuj ib yam li ntawd, thaum peb nkag los rau hauv Vajtswv tsev neeg, Vajtswv txojlus yuav muaj hwjchim pab kom peb yim hnub yim loj hlob thiab ruaj khov tshaj qub. Dhau ntawd, peb thiaj yuav tawg paj txi txiv zoo thiab ua rau Vajtswv tau koob meej.
Hnub no, yog hnub 29/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm TXUAS UA KE HAUV TXOJ KEV NTSEEG.
“Vajtswv muab tsob txiv ntoo roj nyeg cov ceg txiav, thiab muab cov ceg txiv ntoo roj qus los txuas rau ntawm tsob txiv ntoo roj nyeg cov ceg qhov chaw. Nej cov uas yog lwm Haivneeg, nej yog cov ceg txiv ntoo roj qus, nimno nej tau tov dej uas tsob txiv ntoo roj nyeg uas yog cov Yudais nqus tuaj yug nej.” (Loos 11:17)
Ob peb xyoos dhau los, kuv muaj sijhawm mus saib teb chaws Yixalayees – yog lub tebchaws dawbhuv. Ua ntej yuav mus, kuv twb thov Vaj Ntsujplig hloov pauv kuv tus ntsujplig thiab pab kom kuv nkag siab txog Vajtswv ntau dua dhau ntawm txoj kev mus zaum no. Vajtswv hnov kuv tej lus thov thiab teb kuv!
Nyob hauv ntau zaj kawm uas kuv kawm tau, yam uas ua rau kuv nco tshaj plaws yog keeb kwm thiab txoj kev zoo nkauj ntawm tej tsob txiv ntoo roj, thiab qhov uas luag tsuam cov txiv ntoo roj. Tej tsob txiv ntoo roj no saib nws sib thiab tsis khov, tiamsis tseeb tiag ho yog cov ntoo uas ruaj khov heev. Nyob teb chaws Yixalayees, txiv ntoo roj luag yuav muab tsuam peb zaug: thawj lwm ces yog cov roj uas muaj nqis luag siv rau lub sijhawm ua tej kev cai; lwm ob ces siv coj los ua noj, ua roj thiab ua tshuaj tsw qab; zaum peb siv los ua tshuaj ntxhua khawb ncaws thiab ua roj taws teeb.
Thaum luag muab tsuam, ces cov txiv no yuav tsw qab thiab muaj nqis heev. Cov txiv tsis yog raug muab rhuav pov tseg lossis yuav tsis muaj nqis. Tiamsis nws dhau los ua cov khoom tshiab muaj nqhis heev. Kuv cim civ nug tias tsis paub kuv puas yuav ua tau ib yam tshiab muaj nqis yog tias kuv raug sim siab li ntawd. Tsis paub kuv puas yuav ntog, qaug zog lossis kuv yuav vam khom kev ntseeg los nrhiav Vajtswv thiab vam khom Nws, kom txi tau tej tsob txiv qab? Ntawm no yog lo lus nug nws tshwm rawv hauv kuv lub hlwb, thiab kuv thov Vajtswv ntxiv rau qhov no thaum kuv mus.
Nyob hauv lub vaj Khexemanes, peb nkaum ntawm tej ceg txiv ntoo roj, mloog peb tus xibhwb qhia Vajtswv txojlus hauv Loos 11, ua rau kuv tau tshoov siab. Cuag li Vajtswv ntuas kuv txog daim duab ntawm tsob ntoo roj nyob hauv Vajtswv tej lus. Nqe 17 sau tias:
“Vajtswv muab tsob txiv ntoo roj nyeg cov ceg txiav, thiab muab cov ceg txiv ntoo roj qus los txuas rau ntawm tsob txiv ntoo roj nyeg cov ceg qhov chaw. Nej cov uas yog lwm Haivneeg, nej yog cov ceg txiv ntoo roj qus, nimno nej tau tov dej uas tsob txiv ntoo roj nyeg uas yog cov Yudais nqus tuaj yug nej.”
Yog cov ntseeg Vajtswv tuaj ntawm ntau haiv neeg sib txawv tuaj, peb tau los koom ua ke nyob hauv Vajtswv tsev neeg dhau ntawm Tswv Yexus Khetos, yog peb tus Cawm Seej. Peb tau txais cov kua mis ntawm tej tsob ntoo roj uas los ntawm Vajtswv los. Txoj kev sib txuas no ntaus cim rau qhov uas tsim muaj Pawg Ntseeg – vim Tswv Yexus txoj kev cawmdim tsis yog tsuas tseg rau cov neeg Yudais xwb tiamsis tseem qhib kev dav rau txhua tus. Tsis xaiv xeem neeg twg. Peb txoj kev ntseeg tau tshwj tawm los ntawm Vajtswv txoj kev hlub, tso cai rau peb koom tes rau Vajtswv tsev neeg.
Yog Vajtswv cov menyuam, peb puas tab tom nqus cov mis ciaj sia los ntawm Vajtswv tej lus los? Tsis paub peb puas ua lub neej yog raws li Vajtswv txoj kev taw qhia? Peb puas mloog Vaj Ntsujplig ua tus coj kev nyob hauv txhua feem ntawm lub neej? Tsis paub peb puas ua lub neej nrog kev ntseeg, tuav ruaj peb tej qub txeeg qub teg ntawm Tswv Yexus Khetos – lossis peb nthuav tawm lub siab qaug zog zis thaum ntsib kev sim siab hauv lub neej?
Zoo li cov txiv ntoo roj saum ntoo, tsis paub peb puas tsim muaj tej txiv qab dhau los ntawm Vajtswv tej lus – lossis peb tab tom txi tej txiv phem, tsis qhia tawm peb lub siab ntseeg ruaj khob? Peb muaj ib txoj kev sib raug zoo ua ke nrog Vajtswv los ntawm Vajtswv txoj kev hlub thiab kev tshua. Cia li thov Vaj Ntsujplig tu peb txhua hnub nyob hauv qhov tseeb no, pab kom peb ua ib lub neej pehawm Vajtswv thiab ua rau Vajtswv tau koob meej!
Thov caw nrog kuv peb thov Vajtswv ua ke:
Tus Tswv, kuv thov fij lo lus ua tsaug rau koj vim Koj yog tus txais yuav kuv rau hauv koj tsev neeg. Kuv nco koj tshav ntuj vim dhau ntawm Cawm Seej Tswv Yexus, Koj qhib ib txoj kev rau kuv tau ua lub neej ib txhis nrog koj. Thov pab kom kuv mloog koj lus nyob rau hauv txoj kev ua neej, kom tej haujlwm kuv ua, lo lus kuv hais thiab tej kev xav uas kuv xav yuav nthuav tawm koj lub hwjchim thiab txoj kev hwm koj lub npe. Kuv thov hauv Tswv Yexus Khetos lub npe. Amees.
Cov kwv tij txhua tus, los ntawm tej kua mis muaj sia hauv Vajtswv txojlus, cia siab tias lub noob uas yog qhov tseeb yuav nchau cag hauv peb lub siab, tu peb txoj kev ntseeg txhua hnub. Thaum peb lub neej puv npo kev zoo siab, cia siab tias peb yuav nrhiav Vajtswv. Thiab thaum peb ntsib kev txomnyem sim siab, cia siab tias peb kuj yuav paub vam khom rau Vajtswv. Thov kom peb txoj kev ntseeg ruaj khov, cia Vajtswv ua tus coj peb kev hauv txhua feem ntawm lub neej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply