Tŭ dô nơm ntê geh crap tòp dê tơm chi, dà bơsơt kis bơh ryas chi rơp ròng siam mơ lơh ntê gơ lik pràn kơl dang, dờng tơngguh ring niam ngan. Kung behơ̆, tŭ bol he mut tòm hiu Yàng dê, gơnap gơ noar mơ bơta ròng siam bơh Jơnau Yàng rơp hòr mut tòm hwềng soan bol he, dong kòl bơta dòn bol he dê sơ lơ ngai ntào tơngguh mơ kràñ cê rlau. Bơh hơ̆, bol he rơp gơlik gơs plai đo ring niam, lơh gơ klŏ sơn đan Yàng.
Ngai do, ngai 29/09/2024,Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Maria Schleicher bơh tơnggume: GƠTƠMKLAC BƠH BƠTA DÒN.
“Mơya dilah gơs bàr pe ntê neh gơkòl koh, mơ mê ngan la chi ôlibe brê, geh crap tòp digùl ală ntê hơ̆, nàng geh dô pơnah bal mơ bol khai tòm dà bơsơt mơ ryas chi ôlibe hơ̆ dê.” (Rôma 11:17)
Dơ̆ nam òr, an geh tŭ lòt chòp Israel – tiah sang goh. Lài mơ tŭ lik lòt, an neh hòi dan Yàng Hwềng Goh tòm gơl hwềng soan añ mơ dong añ git Yàng jrô ndơp rlau gan dê bơta lik lòt do. Kơnràñ neh iat kơno jơnau hòi dan añ jê mơ ho wơl dô bă krơi is ngan!
Tòm jơh ală bơta bơtê añ geh dòp rò, bơta lòi wơl añ in jrô ndơp rlau jơh hơ̆ lah bơta jŏ jòng mơ bơta hàng mơ nĕ ală chi ôlibe dê, kung be bơta lơh gơlik mơña ôlibe bơh plai ôlibe dê. Ală chi ôlibe do gơlơh lơbơn , mơya ngan gơ dê lah kràñ cê mơ kơldang ngan. Tòm Israel, ôlibe geh ép pe dơ̆: dơ̆ dul gơlik mơña màng ryŭ tòm ală ngai duh khoai; dơ bàr ngùi phan sa in, sơnơm mơ dà bô kơlhu; dơ̆ lồi nàng lơh xà bông um dà mơ dà ôs đèng dê.
Tŭ jơh tơn lề, ôlibe gơlik gơs phan bô kơlhu, gơs kwơ ngăn, mơ màng ryŭ. Bol gơ ò ồm lề hala gơlik ò kwơ; mơya, gơ gơlik gơs phan pa niam ngan. Añ lùp is digơlan añ rgơi lơh gơlik gơs ală “phăn” dròm be hơ̆ tŭ tìp bơta bol glar sơl. Digơlan añ gơ tup pừ mơ gơlơh lơbơn lơ ño, hala añ rơp kơ nờm bơta dòn nàng rê wơl mơ Yàng mơ dòn kơ nờm Yàng., nàng gơlik plai đo bơkah sơl? Hơ̆ la sèng lùp sùm tơlik tòm bồ dơngoh añ, mơ añ pơnjat hòi dan bơh bơta do tòm jơh gùng lòt he dê.
Tòm suơn Getsemane, hơ đơm ntê ôlibe, cau gơnoar bơto bol he dê tòm pà bơta bơtê tòm sră goh Roma 11, gơlơh bol he in chò nùs ngan. Gơlơh be Yàng neh sum tơngkah añ bơh chi ôlibe tòm ală jơnau Yàng. Sèng 17 cih lah:
“Mơya dilah gơs bàr pe ntê neh gơkòl koh, mơ mê ngan la chi ôlibe brê, geh crap tòp digùl ală ntê hơ̆, nàng geh dô pơnah bal mơ bol khai tòm dà bơsơt mơ ryas chi ôlibe hơ̆ dê.”
La ală cau don Yàng bơh ală làng bol pa is, bol he neh geh crap tòp tòm hiu Yàng Tom Trồ gan dê bơta dòn tòm Yàng Jesu Christ, la Bơtau Dong Klas bol he. Bol he gơs gơ noar dòp rò dà bơsơt bềng liu bơh ryas ôlibe krơi is Yàng Tòm Trồ dê. Bơta crap tòp do sơnnio bơta tơlik Hiu Jum Goh dê. – tài bơh bơta dong klas gan dê Yàng Dong Klas Jesu ò dê mìng cau Israel mơ pò ơnàng tus jơh tơl nă cau, ò cah is làng bol lơi. Bơta don dong bol he geh cah is kơ nờm dê bơta nđàc dơngf màng Yàng tòm Trồ dê, ai gơnoar bol he geh muttòm hiu krơi is Yàng dê.
La kòn sau Yàng dê, bol he geh dòp rò ‘dà bơsơt’ bơh Jơnau Yàng sơl? Digơlan bol he kis jat tòm toh ală bơta tề lam Yàng dê tòm ală cơn đòa lòt rài kis dê sơl? Bol he iat kơ no bơta tề làm Yàng Hwềng Goh tòm ală pơnah tòm rài kis sơl? Digơlan bol he kis mơ bơta dòn, sơm bat sre brê he dê tòm Yàng Jesu Christ – hala bol he ràng tơlik bơta siơ̆u bơta dòn he dê tŭ geh tìp ală bơta lòng bol glar kòp ngai sơl?
Dròm be ală plai ôlibe hơđang chi, digơlan bol he geh gơlik ală plai lơ ngồt gơs kwơ kơ nờm dê bơta ròng siam bềng liu bơh Jơnau Yàng – hala bol he geh gơlik gơs plai iơh, ò ràng tơlik bơta dòn he dê tòm Yàng tiah? Bol he gơs bơta tòm klac jrô ndơp mơ Yàng Tòm Trồ kơ nờm dê bơta kòñ gơboh mơ bơta nđàc dờng ơnàng Yàng dê. Rac dan mơ Yàng Hwềng Goh ròng siam bol he kòp ngai tòm jơnau song do, dong bol he kis kòp ngai jong rơ mơ lơh gơklo sơn đan Yàng!
Dan jà bol he dô nùs bal tòm bơta hòi dan:
Khoai Bèp, kòn jong rơ Yàng tài bơh Yàng wă rò kòn mut tòm hiu nha dờng ơnàng Yàng dê. Kòn ưn ngài Yàng tài bơh gan dê Yàng Dong Klas Jesu, Yàng neh pò gùng kòn in geh kis sum sum mơ Yàng. Dan dong kòn sùm dòn bơr Yàng tòm ală cơn đòa rài kis dê, nàng kòp broă lơh, jơnau đơs mơ bơta kơ lôi sơ nơng kòn dê ràng tơlik bơta gơ klŏ mơ duh rngòt sơnđan Kơnràñ. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, gơwèt mơ dà bơsơt bềng liu bơh Jơnau Yàng, kơp kòñ ală gar jơnau song rơp sơmbut ryas jrô tòm nùs bol he, ròng siam bơta dòn bol he dê kòp ngai. Tŭ rài kis bềng tơl bơta chò hòp, kơp kòñ bol he sùm jòi Yàng. Mơ tŭ geh tìp bơta gơ lòng bol glar, kơp kòñ bol he git gơn kơ nờm dê Yàng. Kơp kòñ bơta dòn bol he dê geh bơt bơtào kơ̆ cê, kơ̆ wền, nàng Yàng sùm la Bơtau tề lam bol he tòm ală pơnah tòm rài kis.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.