Kờp ngai sền ală bơta tơnggit, oh mi ò gam ai lơh krơi tai gơwèt mơ ală bơta geh yal tơnggit ò ring lơngai hơđang oă pơnah dunnia dê, mơ plai ù bol he dê gơlơh sơlo ngai sơlo kal kê. Bơh ală bơta do tơngkah oh mi bơh bơta rê wơl Yàng Jesu dê tom dô ngai ò bat tai. La cau dòn Yàng, oh mi neh rcang sir ngai dơng mang hơ̆ in hala ò hềt?
Ngai do, ngai 01/10/2024, Bơta Hòi Dan Kờp Ngai dan jà jơh ală cau ơm iat kơlôi sơnưng Jơnau Yàng kơnom di bơta dong kơl PauL J. Palma bơh tơnggume RCANG SIR NGAI YÀNG DÊ.
“Jơnau Niam do lơgar đang trồ dê pal geh bơto yal làm jơh dunnia, tô lơh cơng jơh ală làng bol in. Tŭ hơ̆ bơta lồi-dut rơp tus.” (Mathiơ 24:14)
“Do, bơtê tĕ jơnau pơnyơu bơh chi bal. Tom tŭ ntê sơmbut nha gơcat, gen bol mê git kơnhai duh mòr tus. Kung behơ̆ sơl tom tŭ bol mê gŏ jơh ală broă hơ̆, git tĕ lah bơta hơ̆ mòr tus, ngan ơm dê đap mpông. Di ngan añ đơs mơ bol mê, jơi bơtiàn do ò lòt rlau jơl tus dê tŭ jơh ală bơta hơ̆ gơlik gơs rau. Trồ tiah rơp roh mơ ya jơnau đơs añ jê ò gơs tŭ lơi roh ò.” (Mathiơ 24:32-35)
Chi bal la chi sa plai mơ ya pal lòt gan ală kơnhai mhar ngan. Kung bè ală chi rung nha, chi bal sùm gơcat nha pa kờp năm. Tom lồi-dut kơnhai rung nha (kơnhai răm) mơ sơntom kơnhai mrềt, ală nha chi tơlir chi dê rơp gơlik gơs dà mrìt mơ rung hơđơm. Tom tŭ kơnhai phang tus, nha chi rơp gơcat wơl. Tom tŭ kơnhai duh tus, chi bal kung sơntom ai plai gơs rùp bè ntih dà, mrìt- pal. Chi bal tom kơnhwal Băc bán cầu òs sum gơlik plai tom kơnhai duh tus kơnhai răm. Plai chi do gơs oă ngan bơta kwơ mang, gơ rgơi lơh oă bơta pha is-rgơi sa mrêh hala lòi rọ, lơh mứt, lơh ban, mơ oă phan sa ndai. Mơ tom tŭ kơnhai răm jơh, chi bal rơp rung nha, mơ kơrwal hơ̆ kư pơnjat behơ̆.
Tom Mathiơ 24, Yàng Jesu neh ngui rùp sơnio bơh chi bal kung bè dô têl sơnio. Dilah chi bal sơntom gơs plai la têl sơnio ai git kơnhai duh mòr tus, kung behơ̆ sơl, bơta rê wơl Yàng Jesu dê kung rơp gơs oă têl sơnio yal lai. Bulah ngai mơ jơ ò gơs cau lơi git (seng 36), mơ ya Yàng Jesu tơngkah ală cau bơtê pal kah rngal tĕ mơ ntào kơ̆. Lai mơ tŭ Yàng Jesu rê wơl, rơp gơs kơlin, ji-gloh rung, rlơm ù, kùp kơryan, Krist ma-blac, cau bơto ma- blac rơp sơlo ngai sơlo oă (seng 7, 9-11,24). Cau dòn Yàng kis tom ngai do gam kơp gơn ngai lồi-dut hơ̆. Jơh ală bol he pal rcang sir nang ntào di đap oă bơta gơlòng, prap gar să tom mơ oh mi ndai di đap ală bơta rgơi lam bol he lòt tis gùng song Yàng dê.
Mơ ya, bal mơ jơnau lah pơrhơng Yàng Jesu dê la ală jơnau pơndom pơndiang. Bulah dunnia do lòt gan ală bơta gơlik gơs yal yau mbe lơi, gơ dơng mbe lơi, gen jơnau đơs hwơr mơ jơnau ho Yàng Jesu rơp “ò tŭ lơi roh” (seng 35). Jơnau Yàng Jesu dê la gam sùm sùm, mơ nùs nhơm Kơnrañ dê sùm sùm jơl jơh ală rài mơ ò tŭ lơi tơm gơl. Bơtau mơ bol he gam kơp gơn hơ̆ la Yàng Tom Trồ, Bơtau at bồ bơta yal yau jơh jơi kòn mơnus dê. Ală gơltang hơđang trồ, tom ù, hơđơm ù, dô ngai lơi hơ̆ pal cun gơltang di đap Kơnràñ (Philip 2:10). Jơnau Yàng pơndom pơndiang kờp nă bol he mhar lơh jat gơnoar sồr he dê hơđang ù. Yàng Jesu neh ai git dô têl sơnio tai ai gŏ bơta lồi-dut rơp tus, hơ̆ la Jơnau Niam dong klàs rơp geh bơto yal lam bă tiah:
“Jơnau Niam do lơgar đang trồ dê pal geh bơto yal làm jơh dunnia, tô lơh cơng jơh ală làng bol in. Tŭ hơ̆ bơta lồi-dut rơp tus.” (Mathiơ 24:14)
Pơnyơu Yàng Jesu ngui rùp sơnio chi bal găm gơs bơta loi wơl tai tom tŭ cau sơntòm sên sơwì bơh chi bal, ñưk la tom kơnhai gơ dê, bơta tơm pơrgơl jat kơnhai gơ dê. Ală têl sơnio pah rài dê, kung be chi bal, kung ai bol he in gŏ lah jơh ală bơta rơp roh. Mơ ya ală cau ơn bơta dòn tom Bơtau Krist, bol he rơp ntào di đap bơta bol glar bal mơ oă bơta tơm pơrgơl. Bulah behơ̆, bol he dòn nên ngan lah Jơnau Yàng sùm la ồs đeng pơnđang sol gùng bol he.
Dan jà bol he dô nùs bal tòm bơta hòi dan:
Khoai Yàng, dunnia mơ kòn kis bîng bơta jê-sồt mơ roh gơchoh. Tom tŭ ală têl sơnio bơh ngai Yàng tus sơlo loh lang rlau tai, dan Yàng dong kòn don kơ̆ tom bơta koñ gơboh ò tŭ lơi tơmgơl Kơnràñ dê mơ kis rài kis drơng kơp kờp ngai, kung git wă mơ añ ơnong kơnjơ̆ ƀơh ală hwềng soan ò hềt don dòp Kơnrañ.
Kòn jơh nùs hòi dan tom sơnđan Yàng Jesu Krist, A-men.
Ơ jơh ală ông mò, oh mi koñ gơboh, kơlin-gơtoă, dàlơp-dàlơ, kòp pluh, bal mơ ală bơta gơlik gơs hơđang plai ù bol he kis ngai do rgơi dong oh mi kis rai kis kah rngal mơ kơp gơn ngai Yàng dê hala ò? Prap gar tĕ să he tom bơta koñ gơboh Yàng mơ rac dan Kơnràñ dong oh mi dòp geh gơnoar nang bơto yal Jơnau Niam tom pah tơngai kal-kê do.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply